បន្ទាប់ពីបើកសវនាការអសាធារណៈដែលប្រើពេលអស់ពីរថ្ងៃក្នុងការសួរដេញដោលសកម្មជនបរិស្ថាននៃចលនាមាតាធម្មជាតិទាំងបីនាក់ និងអ្នកពាក់ព័ន្ធនៅក្នុងសំណុំរឿងទប់ស្កាត់ការបូមខ្សាច់នៅខេត្តកោះកុង តុលាការខេត្តដែលមានព្រំប្រទល់ជាប់ប្រទេសថៃមួយនេះ នឹងប្រកាសសាលក្រម នៅថ្ងៃទី១ ខែកក្កដាខាងមុខនេះ។
តុលាការខេត្តកោះកុងបានបញ្ចប់អង្គសវនាការរបស់ខ្លួនក្នុងការជម្រះក្តីសកម្មជនបរិស្ថានបីនាក់ កាលពីល្ងាចថ្ងៃអង្គារ ហើយត្រៀមប្រកាសសាលក្រមនៅថ្ងៃទីមួយខែកក្កដាខាងមុខនេះ។ នេះបើយោងទៅតាមការបញ្ជាក់ពីមន្ត្រីសិទ្ធិមនុស្ស និងអ្នកតំណាងគ្រួសារជនជាប់ចោទនៅខេត្តកោះកុង។
អង្គសវនាការកាត់ក្តីសកម្មជនទាំងបីនាក់នៃចលនាមាតាធម្មជាតិនេះ បានចាប់ផ្តើមឡើងតាំងពីថ្ងៃច័ន្ទ ទី២៧ ខែមិថុនា ឆ្នាំ២០១៦។ ជនជាប់ចោទទាំងបីនាក់នោះ រួមមានលោក សាន់ ម៉ាឡា លោក ទ្រី សុវិគា និងលោក ស៊ីម សំណាង។
លោក អ៊ិន គង់ជិត មន្ត្រីសិទ្ធិមនុស្សនៃអង្គការការពារសិទ្ធិមនុស្សលីកាដូ បានប្រាប់ VOA កាលពីល្ងាចថ្ងៃអង្គារថា អង្គជំនុំជម្រះបានសម្រេចតម្កល់ការចោទប្រកាន់របស់តំណាងអយ្យការ ដែលបានចោទប្រកាន់សកម្មជនបរិស្ថានទាំងបីនាក់នោះ ពីបទគំរាមកំហែង និងធ្វើឲ្យខូចខាត។
លោកពន្យល់ថា បទចោទនេះគឺត្រូវបានធ្វើឡើង ដោយសំអាងទៅលើការអះអាងរបស់ក្រុមហ៊ុនថា សកម្មជនទាំងបីនាក់នោះបានឡើងទៅលើទូកដឹកជញ្ជូនរបស់ក្រុមហ៊ុនឯកជន និងបានគំរាម ប្រសិនបើមិនព្រមចាកចេញពីទីកន្លែងបូមខ្សាច់។
ក៏ប៉ុន្តែលោក អ៊ិន គង់ជិត បានបញ្ជាក់ថា នៅចុងបញ្ចប់នៃអង្គសវនាការនោះ សកម្មជនទាំងបីបានសំណូមពរឲ្យដោះលែងពួកគេ ដោយបានអះអាងចំពោះមុខអង្គជំនុំជម្រះថា សកម្មភាពរបស់ពួកគេ គឺធ្វើដើម្បីការពារសម្បតិ្តធម្មជាតិតែប៉ុណ្ណោះ និងមិនបានគំរាមកំហែងបុគ្គលណា ដូចការចោទប្រកាន់នោះឡើយ។
«អ្នកទាំងបីបានសំណូមពរទៅចៅក្រមជម្រះ ឲ្យពិចារណា វិនិច្ឆ័យ រកយុត្តិធម៌ឲ្យគាត់ គឺសុំឲ្យលើកលែងការចោទប្រកាន់ ដល់រូបគាត់ទាំងបីនាក់ និងសុំឲ្យមានការដោះលែង ឲ្យពួកគាត់មានសេរីភាពទៅវិញ គឺគាត់ទាំងបីនាក់អះអាងថា គាត់មិនបានប្រព្រឹត្តដូចការចោទប្រកាន់នោះទេ ហើយសកម្មភាពដែលពួកគាត់នេះ គឺដើម្បីផលប្រយោជន៍ការពារបរិស្ថាន ការពារធនធានធម្មជាតិ គឺផលប្រយោជន៍ជួយសង្គមជាតិ»។
ការចោទប្រកាន់របស់តំណាងអយ្យការត្រូវបានធ្វើឡើងដោយយោងតាមមាត្រា៤២៤នៃក្រមព្រហ្មទណ្ឌ។ មាត្រា៤២៤នៃក្រមព្រហ្មទណ្ឌនៃព្រះរាជាណាចក្រកម្ពុជាបានចែងថា អំពើគំរាមកំហែង តាមមធ្យោបាយណាក៏ដោយ ថានឹងប្រព្រឹត្តការបំផ្លិចបំផ្លាញ ការធ្វើឲ្យទ្រុឌទ្រោម ឬការធ្វើឲ្យខូចខាត ត្រូវផ្តន្ទាទោសដាក់ពន្ធនាគារពី១ឆ្នាំទៅ២ឆ្នាំ និងពិន័យជាប្រាក់ពី២លានរៀលទៅ៤លានរៀល ប្រសិនបើការគំរាមកំហែងនេះមានភ្ជាប់នូវបញ្ជាឲ្យបំពេញ ឬមិនបំពេញកិច្ចអ្វីមួយ។
បន្ថែមលើការចោទប្រកាន់ដោយយោងទៅតាមមាត្រានេះ ក្រុមហ៊ុន Direct Access ដែលជាដើមបណ្តឹងនៅក្នុងរឿងនេះក៏បានទាមទារឲ្យសកម្មជនបរិស្ថានទាំងបីសងជំងឺចិត្តជាទឹកប្រាក់ចំនួន១០ម៉ឺនដុល្លារផងដែរ។
VOA នៅតែមិនទាន់អាចទាក់ទងលោក អ៊ីវ ត្រាយ ព្រះរាជអាជ្ញារងនៃតុលាការខេត្តកោះកុងបានទេ កាលពីយប់ថ្ងៃអង្គារ ដោយទូរស័ព្ទរបស់លោករោទិ៍ តែមិនមានអ្នកទទួល។
(ទស្សនាវីដេអូស្តីពីគ្រួសាររបស់សកម្មជនចលនាមាតាធម្មជាតិដែលជាប់ឃុំស្វែងរកយុត្តិធម៌ ដែលផ្តល់ឲ្យដោយចលនាមាតាធម្មជាតិ និង N1M)
អ្នកស្រី ថា សុភា ភរិយារបស់លោក ស៊ីម សំណាង បានប្រាប់ VOA កាលពីយប់ថ្ងៃអង្គារថា តុលាការនឹងផ្តល់យុត្តិធម៌ដល់លោក ស៊ីម សំណាង និងសកម្មជនពីរនាក់ផ្សេងទៀត ដោយអ្នកស្រីសំអាងថា អ្នកទាំងបីមិនបានប្រព្រឹត្តអំពើហិង្សា ឬមិនមានចេតនាបំភិតបំភ័យនរណាឡើយ។ អ្នកស្រីឲ្យដឹងថា គ្រួសារអ្នកស្រីពុំមានលទ្ធភាពនឹងបង់ប្រាក់ជំងឺចិត្តដ៏ច្រើនសន្ធឹកសន្ធាប់នោះទេ។
«ខ្ញុំអត់មានលទ្ធភាពនឹងសងគេ ហើយក៏ខ្ញុំអត់យល់ព្រមដែរ ព្រោះវាជាភាពអយុត្តិធម៌មួយសម្រាប់ពួកខ្ញុំ និងសម្រាប់ប្តីខ្ញុំ»។
ការសម្រេចឃុំខ្លួនសកម្មជននៃចលនាមាតាធម្មជាតិទាំងបីនាក់ដែលបានធ្វើឡើងនៅក្នុងសវនាការនោះកើតមានឡើង បន្ទាប់ពីសកម្មជនទាំងបីបើកយុទ្ធនាការកាលពីខែកក្កដា ដើម្បីបណេ្តញសាឡង់បូមខ្សាច់របស់ក្រុមហ៊ុនពីរគឺក្រុមហ៊ុន Direct Access និង International Rainbow Company ដែលបានដំណើរការជាច្រើនខែនៅមុនយុទ្ធនាការនោះចាប់ផ្តើមឡើង នៅក្នុងតំបន់ជីផាត់ និងព្រែកអណ្តូងទឹក ដែលស្ថិតនៅក្នុងស្រុកបទុមសាគរ ខេត្តកោះកុង។
យុទ្ធនាការទប់ស្កាត់ការបូមខ្សាច់របស់អ្នកទាំងបីនៅពេលនោះ ក៏មានការចូលរួមពីប្រជាពលរដ្ឋក្នុងសហគមន៍ដែលរងផលប៉ះពាល់ពីការបូមខ្សាច់នោះដែរ។ ពួកគេយល់ថា ការបូមខ្សាច់នេះបានបង្កឲ្យមានការបាក់ច្រាំងនៃដៃសមុទ្រ និងបានបំផ្លាញដល់សម្បត្តិជីវៈចម្រុះនៅក្នុងសមុទ្រ៕
