នៅសល់ពេលត្រឹមតែមួយសប្តាហ៍ទៀតប៉ុណ្ណោះ តួនាទីជាប្រធានាធិបតីស្បែកខ្មៅទី១របស់សហរដ្ឋអាមេរិកដែលមានរយៈពេល៨ឆ្នាំនឹងឈានមកដល់ទីបញ្ចប់។
លោក បារ៉ាក់ អូបាម៉ា បានចូលកាន់តំណែងជាប្រធានាធិបតីតាំងពីឆ្នាំ២០០៩ ជាពេលដែលលោកបានបង្កើតទំព័រប្រវត្តិសាស្ត្រថ្មីមួយឲ្យសហរដ្ឋអាមេរិក និងប្រជាពលរដ្ឋអាមេរិកាំងស្បែកខ្មៅ ដោយបានក្លាយជាប្រធានាធិបតីស្បែកខ្មៅទី១។
លោកបានក្លាយជាមេដឹកនាំរបស់ប្រទេសមហាអំណាចខ្លាំងមួយនៅលើពិភពលោក បន្ទាប់ពីលោកបានជាប់ឆ្នោតជាប្រធានាធិបតីនៅឆ្នាំ២០០៨។
ក្នុងរយៈពេល៨ឆ្នាំកន្លងមកនេះ ប្រធានាធិបតីនៃប្រទេសមហាអំណាចរូបនេះ បានបន្សល់ទុកនូវស្នាដៃជាច្រើននៅលើទឹកដីសហរដ្ឋអាមេរិក ជាអាទិ៍ការផ្តួចផ្តើមគោលនយោបាយសុខភាពអូបាម៉ា ឬហៅថា Obama Care ការអនុញ្ញាតឲ្យមានភាពស្របច្បាប់នៃអាពាហ៍ពិពាហ៍មនុស្សស្រឡាញ់ភេទដូចគ្នា និងការបង្កើតកម្មវិធី YSEALI ដើម្បីផ្សាភ្ជាប់ទំនាក់ទំនងរវាងលោកអូបាម៉ា និងអ្នកដឹកនាំវ័យក្មេងនៅតំបន់អាស៊ីអាគ្នេយ៍ រួមទាំងយុវជនកម្ពុជាជាដើម។
(ទស្សនាការថ្លែងសុន្ទរកថាចុងក្រោយរបស់លោកប្រធានាធិបតីបារ៉ាក អូបាម៉ា)
ដូចប្រជាជននៅលើពិភពលោកដែរ ប្រជាពលរដ្ឋមួយចំនួនរួមទាំងយុវជនក្នុងប្រទេសកម្ពុជា បង្ហាញការចាប់អារម្មណ៍ទៅលើភាពជាប្រធានាធិបតីរបស់លោកអូបាម៉ា។ពួកគេយល់ថា ភាពជាអ្នកដឹកនាំរបស់លោក បារ៉ាក់ អូបាម៉ា អាចជាគំរូល្អសម្រាប់មេដឹកនាំរបស់ប្រទេសនានានៅលើពិភពលោក។
កញ្ញា រ៉ុង លីណា វ័យ២១ឆ្នាំ បច្ចុប្បន្នជានិស្សិតផ្នែកគណនេយ្យនៃសាកលវិទ្យាល័យជាតិគ្រប់គ្រង ប្រាប់ VOA ថា កញ្ញាធ្លាប់មើលឃើញលោកអូបាម៉ា តាមរយៈទូរទស្សន៍ និងបណ្តាញសង្គមនានា។
បើទោះជាកញ្ញាមិនដែលបានជួបលោកអូបាម៉ា ដោយផ្ទាល់ក៏ដោយ លីណា កត់សម្គាល់ឃើញថា ភាពសាមញ្ញរបស់លោកអូបាម៉ា គឺជាចំណុចលេចធ្លោរបស់មេដឹកនាំកំពូលរូបនេះ។
«ខ្ញុំចូលចិត្តគាត់ត្រង់គាត់សាមញ្ញ។ ទៅកន្លែងណា អត់ប្រកាន់ ទោះឋានៈគាត់ខ្ពស់ក្តី គាត់អាចចូលរួមជាមួយអ្នកឋានៈទាបបាន ពេលទៅញ៉ាំអាហារអីចឹង បែបលក្ខណៈទូទៅ មានសិទ្ធិស្មើគ្នា»។
និស្សិតឆ្នាំទី១ ផ្នែកអក្សរសាស្ត្រអង់គ្លេសនៃសាកលវិទ្យាល័យបញ្ញាសាស្ត្រកម្ពុជា កញ្ញា សិទ្ធិ ស៊ីម៉ូនីកា វ័យ១៨ឆ្នាំ យល់ថា ប្រធានាធិបតីរូបនេះផ្តល់តម្លៃខ្ពស់ដល់សិទ្ធិមនុស្ស និងភាពស្មើគ្នានៅក្នុងសង្គម ដែលធ្វើឲ្យកញ្ញាកោតស្ងប់ស្ងែង។
«កន្លែងដែលខ្ញុំចូលចិត្តគាត់ជាងគេ គឺពេលដែលគាត់ឡើងកាន់តំណែងជាប្រធានាធិបតីសហរដ្ឋអាមេរិក គឺគាត់លើកតម្កើងជនក្រីក្រ ជាពិសេសពួកស្បែកខ្មៅ និងពួកជនអន្តោប្រវេសន៍ ដែលចេញតាមប្រទេសក្រីក្រ ដូចជាអាស៊ី ដូចប្រជាជនខ្មែរនៅអាមេរិកចឹង គាត់លើកតម្កើង ហើយផ្តល់ការងារឲ្យធ្វើច្រើន»។
ដូចជាប្រជាពលរដ្ឋដទៃទៀតនៅលើពិភពលោកដែរ ក្រៅអំពីចំណុចវិជ្ជមានរបស់លោក អូបាម៉ា ហើយនោះ ម៉ូនីកា ក៏ពេញចិត្តចំពោះភាពឆ្លាតវ័យ ភាពប្រាកដប្រជា និងភាពប៉ិនប្រសប់របស់ស្រ្តីទី១នៃសហរដ្ឋអាមេរិក គឺលោកស្រី Michelle Obama ដែលជាភរិយារបស់លោកអូបាម៉ា ថែមទៀតផង។
«ចំណុចមួយទៀត គឺចូលចិត្តគ្រួសារគាត់ ដូចជាអ្នកស្រី Michelle Obama ពេលគាត់និយាយចេញមក គាត់ចូលចិត្តលើកទឹកចិត្តស្រ្តី ហើយគាត់និយាយមកជាមនុស្សមានចំណេះដឹងខ្ពស់គួរឲ្យចូលចិត្ត»។
ប្រធានាធិបតី អូបាម៉ា ធ្លាប់ធ្វើដំណើរមកកាន់ប្រទេសកម្ពុជា កាលពីចុងឆ្នាំ២០១២ ដើម្បីចូលរួមកិច្ចប្រជុំកំពូលអាស៊ាន ដែលកាលនោះកម្ពុជា គឺជាម្ចាស់ផ្ទះនៃកិច្ចប្រជុំកំពូលអាស៊ាននោះ។
លោក ប៊ុន សឿន វ័យ៣៨ឆ្នាំ ជាអ្នករត់រ៉ឺម៉កកង់បីមួយរូបក្នុងរាជធានីភ្នំពេញ នៅចាំយ៉ាងច្បាស់ថា លោក អូបាម៉ា ធ្លាប់មកកាន់ប្រទេសកម្ពុជា។ លោកយល់ថា ការធ្វើដំណើរមកកាន់ប្រទេសក្នុងតំបន់អាស៊ី ដូចជាកម្ពុជា បង្ហាញថាមេដឹកនាំថ្នាក់កំពូលនេះយកចិត្តទុកដាក់ចំពោះប្រទេសតូចៗនៅលើពិភពលោក។
«ពេញចិត្តនឹងការដឹកនាំរបស់គាត់ ដោយសារគាត់បានដឹកនាំគ្របដណ្តប់សហរដ្ឋអាមេរិក ហើយគាត់បានធ្វើសកម្មភាពជាច្រើនពាក់ព័ន្ធនឹងអាស៊ី ដូចជាកម្ពុជាផ្ទាល់ គាត់ធ្លាប់អញ្ជើញមក ហើយគាត់លើកពីសិទ្ធិមនុស្សជាមួយនាយករដ្ឋមន្ត្រីកម្ពុជា។ ហើយខ្ញុំពេញចិត្ត ចំណុចគាត់ជាច្រើន ដោយសារការដឹកនាំរបស់គាត់ គាត់ជាមនុស្សមានមនោសញ្ចេតនា»។
(ចុចមើលកម្រងរូបភាពនៃការថ្លែងសុន្ទរកថាចុងក្រោយរបស់លោកប្រធានាធិបតីបារ៉ាក់ អូបាម៉ា)
កម្រងរូបភាព៖ «ការថ្លែងសុន្ទរកថាចុងក្រោយរបស់ប្រធានាធិបតី អូបាម៉ា នៅទីក្រុង Chicago»
ក្រៅពីលោកបារ៉ាក់ អូបាម៉ា លោកស្រី Michelle Obama ក៏បានធ្វើដំណើរមកកាន់ខេត្តសៀមរាប ក្នុងប្រទេសកម្ពុជា កាលពីខែមីនា ឆ្នាំ២០១៥ ដើម្បីជំរុញ និងលើកកម្ពស់ឲ្យក្មេងស្រីនៅកម្ពុជា ទទួលបានការអប់រំកម្រិតខ្ពស់កាន់តែច្រើនឡើងផងដែរ។
លោក ជា រ៉ាឌី វ័យ៣១ឆ្នាំ ជាអ្នកលក់កាហ្វេរទេះមួយរូបក្នុងរាជធានីភ្នំពេញ យល់ថា វត្តមានអ្នកដឹកនាំកំពូលស្បែកខ្មៅរូបនេះ ជួយកាត់បន្ថយការរើសអើងពូជសាសន៍ក្នុងពិភពលោក។
«ចូលចិត្តគាត់ត្រង់ថា គាត់អត់សូវចេះរើសអើងពូជសាសន៍។ គាត់ចូលចិត្តលូកដៃចូលប្រទេសណា ដែលគាបសង្កត់ គាត់លូកដៃចូលរកដំណោះស្រាយ គាត់ចេះជួយគេចឹង។ គាត់អត់សូវប្រកាន់រឿងប្រទេសតូចៗទេ គាត់ឃើញត្រូវ គាត់ថាត្រូវ ឃើញខុស ថាខុស»។
លោក បារ៉ាក់ អូបាម៉ា នឹងបញ្ចប់តួនាទីជាប្រធានាធិបតី២អណត្តិរបស់លោកនាថ្ងៃទី២០ ខែមករាខាងមុខនេះ។ លោក ដូណាល់ ត្រាំ មហាសេដ្ឋីអចលនទ្រព្យមកពីគណបក្សសាធារណរដ្ឋរបស់អាមេរិក នឹងចូលមកកាន់តំណែងជាប្រធានាធិបតីសហរដ្ឋអាមេរិកទី៤៥ បន្តពីលោក បារ៉ាក់ អូបាម៉ា៕
