លោកប្រធានាធិបតីជាប់ឆ្នោត ដូណាល់ ត្រាំ បានជ្រើសយកលោក James Mattis អគ្គស្នងការជើងទឹកដែលបានចូលនិវត្តន៍ជារដ្ឋមន្ត្រីក្រសួងការពារប្រទេស ប៉ុន្តែលោក Mattis ត្រូវការមានការកែប្រែច្បាប់សហព័ន្ធដើម្បីឲ្យលោកអាចទទួលតំណែងនេះបាន។
លោក ត្រាំ បានមានវត្តមាននៅក្នុងការប្រមូលផ្តុំសាធារណៈដើម្បីអបអរជ័យជម្នះរបស់លោកក្រោយការបោះឆ្នោតនៅក្នុងទីក្រុង Cincinnati រដ្ឋ Ohio កាលពីយប់ថ្ងៃព្រហស្បតិ៍។ លោកបានថ្លែងពីជម្រើសរដ្ឋមន្ត្រីការពារប្រទេសរបស់លោកនៅទីនោះជាផ្លូវការ។
លោក Mattis ត្រូវបានគេដាក់រហស្សនាមឲ្យថា «Mad Dog« ឬជាភាសាខ្មែរហៅថា «ឆ្កែកម្រោល» ដោយសារតែលោកបានធ្វើអត្ថាធិប្បាយថា លោកចូលចិត្តការប្រយុទ្ធគ្នា។ លោក Mattis គឺជាអតីតមេបញ្ជាការកងទ័ពជើងទឹកនៅក្នុងសង្គ្រាមក្នុងប្រទេសអាហ្វហ្គានីស្ថាននិងប្រទេសអ៊ីរ៉ាក់។
អតីតមន្ត្រីកំពូលម្នាក់នៃក្រសួងការពារប្រទេសអាមេរិកបានថ្លែងប្រាប់ The Washington Post ថា លោក Mattis គឺជាមនុស្សម្នាក់ដ៏គួរឲ្យគោរពខ្លាំងណាស់។
ប៉ុន្តែប្រសិនបើលោក Mattis ត្រូវព្រឹទ្ធសភាអនុម័តមែននោះ នោះសភាត្រូវដកកំហិតលើច្បាប់ដែលតម្រូវឲ្យរដ្ឋមន្ត្រីក្រសួងការពារប្រទេសចូលនិវត្តន៍យ៉ាងហោចណាស់ចំនួន៧ឆ្នាំសិនចោល។ លោក Mattis ទើបតែចូលនិវត្តន៍កាលពីឆ្នាំ២០១៣ប៉ុណ្ណោះ។
លោក ត្រាំ បានធ្វើដំណើរទៅកាន់រដ្ឋ Ohio កាលពីថ្ងៃព្រហស្បតិ៍ ដើម្បីសាទរជាមួយនឹងម្ចាស់ឆ្នោតរបស់លោក ដែលធ្វើឲ្យលោកទទួលបានតំណែងនៅសេតវិមាន៕
