ក្រុមឧទ្ទាមស៊ីរីនិយាយថា ពួកគេនឹងផ្អាកការចរចាដើម្បីចូលរួមការពិភាក្សាសន្តិភាពនៅប្រទេសកាហ្សាក់ស្ថាននៅចុងខែនេះពីព្រោះតែអ្វីដែលពួកគេនិយាយថាកងទ័ពរដ្ឋាភិបាលស៊ីរីបានរំលោភបទឈប់បាញ់គ្នាម្តងហើយម្តងទៀត។
ក្រុមឧទ្ទាមនិយមផ្លូវកណ្តាលចម្រុះភាគច្រើនគឺក្រុមកងទ័ពស៊ីរីសេរី បានចេញសេចក្តីថ្លែងការណ៍កាលពីថ្ងៃចន្ទដោយនិយាយថា «ពួកគេគោរពបទឈប់បាញ់គ្នានៅទូទាំងប្រទេសស៊ីរី ក៏ប៉ុន្តែរបបអាសាដនិងសម្ព័ន្ធមិត្តរបស់គេ មិនបានបញ្ឈប់ការបាញ់គ្នាហើយបានចាប់ផ្តើមរំលោភបទឈប់បាញ់គ្នាយ៉ាងខ្លាំងនិងជារឿយៗ។
ក្រុមឧទ្ទាមនិយាយថា ការរុលទៅមុខដោយកងទ័ពស៊ីរីជាការរំលោភបទឈប់បាញ់គ្នាហើយថាពួកគេនឹងចាត់ទុកការឈប់បាញ់គ្នានេះជាមោឃៈ។
ប្រទេសរុស្ស៊ីនិងតួកគីដែលកំពុងរៀបចំការចរចាសន្តិភាពនៅក្នុងទីក្រុង Astana នៃប្រទេសកាហ្សាក់ស្ថាន មិនទាន់ធ្វើសេចក្តីអត្ថាធិប្បាយអំពីសេចក្តីថ្លែងការណ៍របស់ពួកឧទ្ទាមទេ។
បទឈប់បាញ់គ្នាបានចូលជាធរមានកាលពីចុងសប្តាហ៍មុន។ក៏ប៉ុន្តែ ពួកឧទ្ទាមបាននិយាយថា ពួកអ្នកប្រយុទ្ធកងទ័ពរដ្ឋាភិបាលស៊ីរីហើយនឹងក្រុមសម្ព័ន្ធមិត្ត Hezbollah កំពុងខិតខំដណ្តើមយកតំបន់ដែលកាន់កាប់ដោយពួកឧទ្ទាមនៅជិតរដ្ឋធានីដាម៉ាសដែលជាតំបន់ផ្គត់ផ្គង់ទឹកទៅឲ្យរដ្ឋធានី។
ប្រទេសរុស្ស៊ីដែលគាំទ្ររដ្ឋាភិបាលអាសាដ ហើយប្រទេសតួកគីដែលគាំទ្រពួកឧទ្ទាមបានរៀបចំការចរចានេះហើយបានធ្វើឲ្យមានការឈប់បាញ់គ្នានៅពេលបច្ចុប្បន្ននេះ៕
