លោកនាយករដ្ឋមន្រ្តីហ៊ុន សែនបានសម្រេចយកថ្ងៃទី១៤ ខែមករា ឆ្នាំ២០១៧ដើម្បីជួបជជែកជាមួយអ្នកសារព័ត៌មាន តាមការផ្តួចផ្តើមរបស់លោកខៀវ កាញារីទ្ធ រដ្ឋមន្រ្តីក្រសួងព័ត៌មានដើម្បីបង្កើតទិវាជួបជុំអ្នកសារព័ត៌មាន ហើយផ្តល់ឱកាសឲ្យអ្នកសារព័ត៌មានមកពីគ្រប់ស្ថាប័នសួរសំណួរលោកពាក់ព័ន្ធនឹងបញ្ហាផ្សេងៗដោយផ្ទាល់។ នេះបើតាមការឲ្យដឹងពីលោក អ៊ុក គឹមសេង អ្នកនាំពាក្យក្រសួងព័ត៌មាន។
គម្រោងនៃការជួបជុំរវាងអ្នកសារព័ត៌មាន និងលោក ហ៊ុន សែននេះត្រូវបានគ្រោងធ្វើឡើងនៅពេលដែលលោក ហ៊ុន សែនទទួលបានពានរង្វាន់«សន្តិភាពនិងការអភិវឌ្ឍ» ដែលផ្ដល់ដោយ សហព័ន្ធអ្នកសារព័ត៌មានអាស៊ាន (Union Media ASEAN-UMA) កាលពីចុងខែមីនា កន្លងទៅនេះ។
ថ្លែងក្នុងពេលលោកទទួលពានរង្វាន់នោះ លោកនាយករដ្ឋមន្ត្រីហ៊ុន សែនលើកឡើងថា លោកចង់ចងសម្ព័ន្ធភាពជាមួយអ្នកកាសែតដើម្បីឲ្យមានភាពជិតស្និទ្ធរវាងថ្នាក់ដឹកនាំរដ្ឋាភិបាល និងអ្នកសារព័ត៌មានជាតិ។
ថ្លែងអំពីគម្រោងណាត់ជួបរវាងលោកជាមួយអ្នកសារព័ត៌មានជារៀងរាល់មួយឆ្នាំម្ដងដើម្បីជជែក បរិភោគអាហារនិងរាំកម្សាន្តជុំគ្នានេះ លោកហ៊ុន សែនបានបញ្ជាក់ថា៖
«សុំឯកឧត្តមខៀវ កាញារីទ្ធពិនិត្យមើល តើមានប៉ុន្មានដើម្បីយើងកំណត់ ថាតើគួរជួបគ្នានៅ Restaurant (ភោជនីយដ្ឋាន)ណា? ជួបគ្នាផង ជជែកគ្នាផង សួរគ្នាផង ទើបឆ្ងាញ់បាយ។ ប៉ុន្តែខ្ញុំសង្ឃឹមថា ការជួបនេះនឹងមិនមានអ្នកចោទចំពោះខ្ញុំថា ទិញទឹកចិត្តអ្នកសារព័ត៌មានទេ»។
ក្នុងពិធីនោះដែរ លោកហ៊ុន សែនបានណែនាំអ្នកសារព័ត៌មានជាតិ និងអន្តរជាតិឲ្យសរសេរអ្វីដែលជាការណ៍ពិត ដោយលោកថ្លែងថា កន្លងមកធ្លាប់មានអ្នកសារព័ត៌មានខ្លះរាយការណ៍ខុសការណ៍ពិត ឬខុសពីអ្វីដែលលោកបាននិយាយ។
លោកអ៊ុក គឹមសេង អ្នកនាំពាក្យក្រសួងព័ត៌មាន បានប្រាប់ VOA ថា លោកនាយករដ្ឋមន្រ្តីហ៊ុន សែនបានកំណត់យកថ្ងៃទី១៤ ខែមករា ឆ្នាំ២០១៧ ជាថ្ងៃជួបជាមួយអ្នកសារព័ត៌មាន ដើម្បីជជែក និងផ្តល់ឱកាសឲ្យសួរសំណួរទៅមកដោយផ្ទាល់។ លោកបន្ថែមថា គម្រោងនៃការជួបជុំនេះមិនទាន់បានកំណត់ទីតាំងជាក់លាក់នៅឡើយ ប៉ុន្តែលោកថា នឹងមានការចូលរួមពីអ្នកសារព័ត៌មានប្រមាណជា៧០០នាក់ មកពីគ្រប់ស្ថាប័នសារព័ត៌មាន មិនថា ស្ថាប័នដែលមានទំនោរគាំទ្ររដ្ឋាភិបាល និងស្ថាប័នដែលតែងតែរិះគន់រដ្ឋាភិបាលនោះទេ។
លោកបញ្ជាក់ថា៖
«យើងឃើញថា ជំនួបពេលនេះគឺជាការជួបជុំជាប្រវត្តិសាស្រ្តមួយសម្រាប់ប្រមុខរដ្ឋាភិបាល ជាមួយបណ្តាញសារព័ត៌មាន ហើយក៏គ្រោងគិតថា រៀបចំការជួបនេះឲ្យទៅជាទិវាមួយសម្រាប់អ្នកសារព័ត៌មាន និងប្រមុខរដ្ឋាភិបាល»។
ជារឿយៗ លោកនាយករដ្ឋមន្រ្តីហ៊ុន សែនតែងហៅស្ថាប័នសារព័ត៌មានមួយចំនួន ដែលរិះគន់ការដឹកនាំរបស់រដ្ឋាភិបាល ថា ជាសារព័ត៌មានប្រឆាំង និងមានភាពលម្អៀងគាំទ្រគណបក្សប្រឆាំង។ ហើយលោកហៅសារព័ត៌មានដែលតែងសរសេរព័ត៌មានគាំទ្រការដឹកនាំរដ្ឋាភិបាលថា ជាស្ថាប័នព័ត៌មានដែលមានវិជ្ជាជីវៈ។
លោកអ៊ូ វីរៈ ប្រធានវេទិកាអនាគត និងជាអ្នកវិភាគនយោបាយឯករាជ្យ ប្រាប់ VOA ថា អ្នកសារព័ត៌មានជាក្រុមមនុស្សមានឥទ្ធិពល ដូច្នេះលោកថា គម្រោងជួបជុំជាមួយអ្នកសារព័ត៌មាននេះ នឹងធ្វើឲ្យចំណេញនយោបាយរបស់គណបក្សកាន់អំណាច។
លោកបន្ថែមថា៖
«ជាការដឹកនាំឆ្លាត ហើយធ្វើនយោបាយឆ្លាត។ ជាទូទៅ អ្នកដែលមានឥទ្ធិពលគឺអ្នកសារព័ត៌មាន អីចឹងការជួបជាមួយអ្នកសារព័ត៌មានគឺជារឿងមួយល្អ ដើម្បីឲ្យស្គាល់គ្នាទៅ។ ជួនកាលអត់ស្គាល់គ្នាទៅ វាមានអារម្មណ៍កាន់តែឃ្លាតពីគ្នា។ ប៉ុន្តែស្គាល់គ្នាទៅ ជួនកាលអាចមានបញ្ហាអី អាចសួរនាំអី អាចមានអារម្មណ៍មិនលម្អៀង។ ជួនកាលអាចមានអារម្មណ៍លម្អៀងវិជ្ជមាន លម្អៀងអវិជ្ជមានជូនដល់អ្នកនយោបាយទៀត។ ខ្ញុំគិតថា ធ្វើទៅចំណេញនយោបាយគណបក្សកាន់អំណាច។ ប៉ុន្តែដូចខ្ញុំថា អីចឹង រឿងប្រជាធិបតេយ្យ ការព្យាយាមចំណេញនយោបាយបែបហ្នឹងគឺត្រឹមត្រូវបំផុត ហើយអត់មានអីខុសទេ»។
លោកមឿន ឈានណារិទ្ធ ប្រធានវិទ្យាស្ថានកម្ពុជាសម្រាប់ការសិក្សាផ្នែកសារព័ត៌មាន បានប្រាប់ VOA ថា គម្រោងរបស់លោកនាយករដ្ឋមន្ត្រីហ៊ុន សែនក្នុងការជួបជុំជាមួយអ្នកសារព័ត៌មានដើម្បីពិសារអាហារជាមួយលោកគឺជាជំនួបដែលគួរឲ្យចាប់អាម្មណ៍។ នេះគឺជាជំនួបលើកទី១ដែលមិនធ្លាប់មានចាប់តាំងពីឆ្នាំ១៩៩៣មក។ លោកបន្តថា ជំនួបនេះនឹងអាចធ្វើឲ្យអ្នកសារព័ត៌មានមានឱកាសប្រាស្រ័យទាក់ទងផ្ទាល់ជាមួយមន្រ្តីកាន់អំណាច ប៉ុន្តែលោកថា ការជួបជុំដែលនឹងមានការពិសារអាហារ និងការកម្សាន្តជុំគ្នានេះនឹងធ្វើឲ្យប៉ះពាល់ដល់វិជ្ជាជីវៈរបស់អ្នកសារព័ត៌មាន។
លោកបញ្ជាក់ថា៖
«យើងទៅរួមតុបាយជាមួយនឹងថ្នាក់ដឹកនាំហើយ ពេលហ្នឹងចង់មិនចង់ យើងហាក់ដូចជាបន្ទន់ឥរិយាបទដែរ ព្រោះអីក្រមសីលធម៌វិជ្ជាជីវៈសារព័ត៌មានតែងតែហាមអ្នកសារព័ត៌មានមិនឲ្យទទួលកាដូ ឬក៏អំណោយណាមួយពីមន្រ្តីរដ្ឋាភិបាល ឬក៏ស្ថាប័នណាមួយដែលយើងត្រូវទៅយកព័ត៌មាន។ កាដូនោះ យើងអាចទទួលបាន បើសិនវាមានតម្លៃស្នើនឹងកាហ្វេមួយពែង ឬក៏កូកាកូឡាមួយកំប៉ុង អាហ្នឹងយើងអាចទទួលយកបាន។ អញ្ចឹងការរៀបចំជាពិធីជប់លៀងធំៗអីចឹង វាអាចប៉ះពាល់ទៅលើអារម្មណ៍របស់អ្នកសារព័ត៌មាន»។
បាយការណ៍ប្រចាំឆ្នាំរបស់ក្រសួងព័ត៌មាន ដែលចេញផ្សាយកាលពីខែមីនា ឆ្នាំ២០១៥ បង្ហាញថា ក្នុងឆ្នាំ២០១៤ កម្ពុជាមានស្ថាប័នវិទ្យុចំនួន១៧៥ ទូរទស្សន៍ចំនួន២៤ និងកាសែតជាតិចំនួន៤៥៦នៅទូទាំងប្រទេស។ ទោះជាយ៉ាងណា គេមើលឃើញថា ស្ថាប័នព័ត៌មានដែលកំពុងដំណើរការ មិនមានចំនួនច្រើនដូចក្នុងរបាយការណ៍នោះទេ៕
