ក្រុមអ្នកសង្កេតការអន្តរជាតិក្នុងប្រទេសភូមា ផ្តល់ការចាប់អារម្មណ៍ចម្រុះគ្នាលើការបោះឆ្នោតជាប្រវត្តិសាស្ត្រកាលពីថ្ងៃអាទិត្យ ខណៈដែលការរាប់សន្លឹកឆ្នោតបានឈានចូលដល់ថ្ងៃទី២។
ដំណើរការបោះឆ្នោតមានភាពល្អប្រសើរជាងការរំពឹងទុករបស់មនុស្សជាច្រើនដែលបានទស្សទាយនៅមុនការបោះឆ្នោត។ នេះបើយោងតាមសម្តីលោក Alexander Graf Lambsdorff ប្រធានបេសកកម្មឃ្លាំមើលការបោះឆ្នោតនៃសហភាពអឺរ៉ុប ថ្លែងក្នុងសន្និសីទកាសែតមួយក្នុងទីក្រុង Yangon នៅថ្ងៃអង្គារនេះ។
មនុស្សជាង៣០លាននាក់បានចេញទៅបោះឆ្នោតកាលពីថ្ងៃអាទិត្យ ដែលជាការបោះឆ្នោតដោយសេរីលើកទីមួយ ក្នុងប្រទេសដែលកងយោធាក្តាប់អំណាចអស់ពេល២៥ឆ្នាំ។ លទ្ធផលផ្លូវការដែលចេញផ្សាយដោយគណកម្មការរៀបចំការបោះឆ្នោតបង្ហាញថា គណបក្សប្រឆាំងគឺគណបក្សសម្ព័ន្ធជាតិដើម្បីលទ្ធិប្រជាធិបតេយ្យ មកទល់នឹងពេលនេះ បានឈ្នះកៅអី១២៦ ក្នុងសភាជាន់ទាប ខណៈដែលគណបក្សសាមគ្គីអភិវឌ្ឍន៍សហព័ន្ធ ដែលគាំទ្រដោយពួកយោធា បានឈ្នះតែ៨កៅអីប៉ុណ្ណោះ។
គណបក្ស NLD ដែលដឹកនាំដោយជ័យលាភីរង្វាន់ណូបែលសន្តិភាព អោងសាន ស៊ូជី (Aung San Suu Kyi) បានប្រកាសជោគជ័យភ្លូកទឹកភ្លូកដីរួចជាស្រេចទៅហើយ។ ក្នុងបទសម្ភាសន៍មួយជាមួយ ទូរទស្សន៍ប៊ីប៊ីស៊ី (BBC) នៅថ្ងៃអង្គារនេះ លោកស្រី អោងសាន ស៊ូជី បានថ្លែងថាគណបក្សរបស់លោកស្រីបានឈ្នះកៅអីទាំងអស់ប្រហែល៧៥ភាគរយ៕
