ប្រជាពលរដ្ឋប្រមាណ ២០០ នាក់ កាលពីព្រឹកថ្ងៃអង្គារ បានប្រមូលផ្តុំគ្នានៅខាងមុខសាលាខេត្តកណ្តាល ដោយទាមទារឱ្យអភិបាលខេត្តកណ្តាលបញ្ជាក់ឱ្យបានច្បាស់ទាក់ទងការបាញ់ថ្នាំពណ៌បង់លេខរៀង នៅតាមខ្នងផ្ទះរបស់ពួកគេ ដែលជាហេតុធ្វើឱ្យពួកគេព្រួយបារម្ភអំពីការបណ្តេញចេញពីលំនៅដ្ឋាន នៅថ្ងៃណាមួយ។
ពួកគេមានការព្រួយបារម្ភ ដោយហេតុថា ប្រជាពលរដ្ឋរស់នៅភូមិតាឡុង ដែលកំពុងមានវិវាទដីធ្លីជាមួយក្រុមហ៊ុនសាងសង់ព្រលានយន្តហោះថ្មី OCIC របស់លោកឧកញ៉ា ពុង ឃាវសែ ក្នុងស្រុកកណ្តាលស្ទឹង រងការបណ្តេញចេញរួចទៅហើយ។
ប្រជាពលរដ្ឋដែលរស់នៅក្នុងភូមិអំពៅព្រៃ ឃុំកណ្តោក ស្រុកកណ្តាលស្ទឹង និងភូមិអាចម៍កុក សង្កាត់កំពង់សំណាញ់ ក្រុងតាខ្មៅ ខេត្តកណ្តាល បាននាំគ្នាធ្វើដំណើរតាមម៉ូតូ និងរថយន្តឈ្នួល មកកាន់សាលាខេត្តកណ្តាល នៅថ្ងៃអង្គារ ដើម្បីស្នើសុំអភិបាលខេត្តកណ្តាល លោក គង់ សោភ័ណ្ឌ បើកវេទិកាសាធារណៈ ដើម្បីបញ្ជាក់អំពីហេដ្ឋារចនាសម្ព័ន្ធនានា ព្រមទាំងគម្រោងព្រលានយន្តហោះថ្មីនៅក្នុងភូមិសាស្រ្តរបស់ពួកគេ។
លិខិតស្នើសុំ ចុះថ្ងៃទី ២៧ ខែធ្នូ ដែលមានស្នាមមេដៃប្រជាពលរដ្ឋទាំងពីរភូមិនោះដាក់ទៅអភិបាលខេត្តកណ្តាលនោះ ឱ្យដឹងថា មូលហេតុដែលប្រជាពលរដ្ឋស្នើសុំនេះ គឺដោយសារតែមានបុគ្គលិករបស់ព្រលានយន្តហោះ និងអាជ្ញាធរមូលដ្ឋានចម្រុះបានមកបង់លេខផ្ទះ ស្រង់ទិន្នន័យប្រជាពលរដ្ឋ និងដាក់ឱសានវាទឱ្យពលរដ្ឋមួយចំនួនរុះរើផ្ទះ ជាពិសេសហាមឃាត់ប្រជាពលរដ្ឋមិនឱ្យសាងសង់លំនៅដ្ឋានលើដីរបស់ពួកគេ ដោយគ្មានមូលហេតុ។
លិខិតនោះបញ្ជាក់ថា៖ «ន័យដូចមានចែងក្នុងកម្មវត្ថុ និងមូលហេតុខាងលើ សូមឯកឧត្តមនៃគណៈអភិបាលខេត្តកណ្តាល [លោក គង់ សោភ័ណ្ឌ] មេត្តារៀបចំវេទិកាសាធារណៈ ដើម្បីពន្យល់ប្រជាពលរដ្ឋដែលរស់នៅក្នុងភូមិសាស្ត្រខាងលើ [ភូមិអំពៅព្រៃ ឃុំកណ្តោក ស្រុកកណ្តាលស្ទឹង និងភូមិអាចម៍កុក សង្កាត់កំពង់សំណាញ់ ក្រុងតាខ្មៅ ខេត្តកណ្តាល] និងសាធារណជនឱ្យយល់បានច្បាស់ ដើម្បីឱ្យប្រជាពលរដ្ឋ និងសាធារណជនបានចូលរួមក្នុងដំណើរការអភិវឌ្ឍន៍តំបន់អាកាសយានដ្ឋានអន្តរជាតិតេជោ ប្រកបដោយតម្លាភាព និងយុត្តិធម៌ ព្រមទាំងនិរន្តភាពនៃការអភិវឌ្ឍសព្វជ្រុងជ្រោយ»។
នៅពេលពលរដ្ឋមកដល់ខាងមុខសាលាខេត្តកណ្តាល មន្ត្រីសាលាខេត្តបានហៅពួកគេឱ្យចូលក្នុងសាលាខេត្តដើម្បីប្រជុំពិភាក្សា ប៉ុន្តែអង្គការសង្គមស៊ីវិល និងក្រុមអ្នកសារព័ត៌មានមិនត្រូវបានអនុញ្ញាតឱ្យចូលស្តាប់ទេ។
ពលរដ្ឋម្នាក់ រស់នៅភូមិអំពៅព្រៃ ឃុំកណ្តោក ស្រុកកណ្តាលស្ទឹង អ្នកស្រី ប៉ុត ចាន់សុផាននី ដែលអះអាងថាបានរស់នៅទីនោះរយៈពេល ២០ ឆ្នាំមកហើយ បានបញ្ជាក់ប្រាប់អ្នកសារព័ត៌មានក្រោយចេញពីប្រជុំជាមួយអភិបាលរងខេត្តកណ្តាលលោក នូវប៉េង ច័ន្ទតារា ថា សាលាខេត្តថាមិនបានដឹងអំពីបុគ្គលិកក្រុមហ៊ុន ដើរបាញ់ថ្នាំបង់លេខរៀងតាមខ្នងផ្ទះរបស់ប្រជាពលរដ្ឋទាំងពីរភូមិនោះទេ។
អ្នកស្រីបន្ថែមថា អភិបាលរងខេត្តកណ្តាលដែលបានជួបប្រជុំជាមួយប្រជាពលរដ្ឋបានយល់ព្រមតាមសំណើរបស់ប្រជាពលរដ្ឋ ដោយថា នឹងរៀបចំវេទិកាសាធារណៈនៅក្នុងខែមករា ឆ្នាំ ២០២៣ ខាងមុខ ប៉ុន្តែមិនទាន់អាចកំណត់ពេលវេលាបាននៅឡើយទេ។
អ្នកស្រីបន្តថា អភិបាលរងខេត្តកណ្តាលប្រាប់ពលរដ្ឋកុំឱ្យមានការភ័យខ្លាច ដោយលោកថា មិនមានអ្នកណារងការបណ្តេញចេញ ឬរុះរើផ្ទះសម្បែងណាមួយនៅទីនោះទេ។ ប៉ុន្តែអ្នកស្រីថា ទាល់តែមានការរៀបចំវេទិកាសាធារណៈ និងមានការបញ្ជាក់ពីអភិបាលខេត្ត លោក គង់ សោភ័ណ្ឌ ដោយផ្តល់ប្លង់កម្មសិទ្ធិដីធ្លីដល់ពលរដ្ឋ ទើបប្រជាពលរដ្ឋស្ងប់ចិត្ត។
អ្នកស្រីថ្លែងថា៖ «លោកឯកឧត្តម [អភិបាលរង ដែលប្រជុំជាមួយពលរដ្ឋ]ម៉ិញ គាត់បានមានប្រសាសន៍ថា គាត់ទទួលដឹងឮហើយ [ហើយ] គាត់ទទួលសំណើពីប្រជាជនហើយ គឺគ្មានការរុះរើទេ [ដោយ] ខាងព្រលាន[យន្តហោះថ្មី] គ្មានសិទ្ធិមកឱ្យប្រជាជនរុះរើទេ»។
បើតាមអ្នកស្រី ប៉ុត ចាន់សុផាននី កាលពីថ្ងៃទី ២៤ ខែវិច្ឆិកា បុគ្គលិកសាងសង់ព្រលានយន្តហោះថ្មីរបស់ក្រុមហ៊ុន OCIC បានដើរបាញ់ថ្នាំ បង់លេខរៀងលើផ្ទះប្រជាពលរដ្ឋរស់នៅទាំងពីរភូមិនោះ ដោយមិនបានបញ្ជាក់មូលហេតុឱ្យបានច្បាស់នោះទេ ដែលជាហេតុធ្វើឱ្យពលរដ្ឋមានការព្រួយបារម្ភ។
អ្នកស្រីបន្ថែមថា៖ «ខ្ញុំមានការបារម្ភដូចគ្នា[ទៅនឹងអ្នកភូមិតាឡុង] ដូចថា បើគាត់ឱ្យរុះរើមែន ថាឱ្យពួកប្អូនទៅនៅឯណា? ហើយការរុះរើ ប្អូនៗមួយៗ [ម្នាក់ៗ] សុទ្ធតែជំពាក់គេទាំងអស់។ ពួកប្អូនអត់ចង់ទៅណាទេ។ ពួកប្អូនគឺចង់នៅកន្លែងហ្នឹង...»។
ចំណែកពលរដ្ឋម្នាក់រស់នៅក្នុងភូមិអាចម៍កុក សង្កាត់កំពង់សំណាញ់ ក្រុងតាខ្មៅ អ្នកស្រី ង៉ុយ សំណាង អាយុ ៣១ ឆ្នាំ ដែលបានអះអាងថារស់នៅភូមិនេះជាង ២០ ឆ្នាំ ក៏សម្តែងការព្រួយបារម្ភដូចគ្នា។
អ្នកស្រីថ្លែងថា៖ «ភ័យខ្លាចណាស់! បង ខ្លាចថា ដូចពួកគាត់[អ្នកភូមិតាឡុង]ដែរ ...មានការបារម្ភ អ៊ីចឹងបានស្នើឱ្យអភិបាលខេត្តទៅបើកវេទិកាឱ្យពួកខ្ញុំបានដឹង ឱ្យមានទំនុកចិត្ត ភាពកក់ក្តៅអីខ្លះ កុំឱ្យពួកគាត់ភ័យខ្លាច»។
នៅពេលវីអូអេទាក់ទងតាមទូរសព្ទ អភិបាលរងខេត្តកណ្តាល លោក នូវប៉េង ច័ន្ទតារា សុំមិនធ្វើការអត្ថាធិប្បាយអ្វីនោះទេ ដោយលោកថា សាលាខេត្ត នឹងចេញសេចក្តីប្រកាសព័ត៌មានមួយ។ វីអូអេក៏មិនទាន់អាចទាក់ទងលោក ពុង ឃាវសែ ដែលជាម្ចាស់ក្រុមហ៊ុន OCIC តាមទូរសព្ទបានដែរ នៅថ្ងៃអង្គារនេះ។
ភូមិអំពៅព្រៃ ឃុំកណ្តោក ស្រុកកណ្តាលស្ទឹង និងភូមិអាចម៍កុក សង្កាត់កំពង់សំណាញ់ ក្រុងតាខ្មៅ ខេត្តកណ្តាល គឺនៅជាប់គ្នា និងមានចម្ងាយប្រមាណ ៥ គីឡូម៉ែត្រ ពីព្រលានយន្តហោះថ្មី OCIC។ ប្រជាពលរដ្ឋទាំងពីរភូមិ មានប្រមាណ ៥០០ គ្រួសារ ដែលបានរស់នៅទីនោះ ដោយផ្ទះខ្លះសាងសង់ពីស័ង្កសី ខ្លះធ្វើពីឈើជាដើម។ ហើយពលរដ្ឋនៅតំបន់នេះប្រកបមុខរបរបេះត្រកួន នេសាទត្រី និងលក់ដូរនៅតាមផ្ទះ។ ពលរដ្ឋខ្លះអះអាងថា ពួកគេបានរស់នៅទីនោះយូរមកហើយចន្លោះពី ២០ ឆ្នាំទៅ ៣០ ឆ្នាំ។
មន្ត្រីស៊ើបអង្កេតជាន់ខ្ពស់របស់សមាគមការពារសិទ្ធិមនុស្សអាដហុក លោក យី សុខសាន្ត យល់ថា រដ្ឋាភិបាល និងអាជ្ញាធរត្រូវតែសិក្សាឱ្យបានច្បាស់លាស់អំពីផលប៉ះពាល់នៃគម្រោងអភិវឌ្ឍន៍ណាមួយ និងត្រូវបញ្ជាក់ប្រាប់ប្រជាពលរដ្ឋឱ្យបានដឹងច្បាស់លាស់អំពីគម្រោងអភិវឌ្ឍន៍នានា។
លោកថ្លែងថា៖ «ប្រសិនបើរាជរដ្ឋាភិបាល ចង់ធ្វើការអភិវឌ្ឍ គាត់ត្រូវសិក្សាអំពីផលប៉ះពាល់ ហើយនឹងដំឡើងប៉ាណូ ស្លាកធំៗថា តើការសាងសង់នេះ រយៈពេលប៉ុន្មានឆ្នាំ? ឱ្យទៅក្រុមហ៊ុនណា? ក្រុមហ៊ុនឈ្មោះអី? ធ្វើដើម្បីអី? ចំណុចហ្នឹងហើយដែលរដ្ឋាភិបាលត្រូវតែបញ្ជាក់»។
គួរបញ្ជាក់ថាក្រុមហ៊ុន OCIC កំពុងសាងសង់ព្រលានយន្តហោះអន្តរជាតិភ្នំពេញថ្មី ដែលគេស្គាល់ឈ្មោះមួយផ្សេងទៀតថា «អាកាសយានដ្ឋានអន្តរជាតិតេជោក្រុងតាខ្មៅ» មានតម្លៃជាទឹកប្រាក់ប្រមាណ ១.៥០០ លានដុល្លារអាមេរិក ក្នុងស្រុកកណ្តាលស្ទឹង ខេត្តកណ្តាល។
បច្ចុប្បន្ននេះ ក្រុមហ៊ុននេះក៏កំពុងមានវិវាទដីធ្លីជាមួយពលរដ្ឋ ដែលរស់នៅក្នុងឃុំមួយចំនួន ក្នុងតំបន់អភិវឌ្ឍន៍ព្រលានយន្តហោះថ្មីនោះផងដែរ ដែលទាក់ទងនឹងការផ្តល់សំណងដីធ្លី ដែលពលរដ្ឋថា ក្រុមហ៊ុនឱ្យថោកត្រឹម ៨ ដុល្លារក្នុងមួយម៉ែត្រការ៉េ ខណៈតម្លៃដីលើទីផ្សារចន្លោះពី ៥០ដុល្លារទៅ ១០០ ដុល្លារ ដែលពលរដ្ឋថាមិនអាចទទួលយកបាននូវតម្លៃរបស់ក្រុមហ៊ុនផ្តល់ឱ្យ៕
