យន្តហោះចម្បាំង និងកាំភ្លើងធំរបស់រដ្ឋាភិបាលស៊ីរី ដែលមានការគាំទ្រពីសម្ព័ន្ធមិត្តរុស្ស៊ី បានបង្កើនការវាយប្រហារលើតំបន់ក្រុមបះបោរកាន់កាប់នៅ Aleppo នៅព្រឹកថ្ងៃសុក្រនេះ។ មនុស្សជាច្រើនបានស្លាប់ រួមទាំងកុមារផងដែរ។ នេះជាការវាយប្រហារតាមអាកាសជាថ្មី៤ថ្ងៃជាប់គ្នាដោយយន្តហោះចម្បាំងរដ្ឋាភិបាលស៊ីរី តាំងពីរដ្ឋាភិបាលក្រុងមូស្គូប្រកាសកាលពីថ្ងៃអង្គារបញ្ចប់ការប្រយុទ្ធគ្នាដើម្បីបើកឱកាសសម្រាប់បេសកកម្មមនុស្សធម៌រយៈពេលមួយខែ។
មានជនស៊ីវិលយ៉ាងតិច៦៥នាក់បានស្លាប់តាំងពីការវាយប្រហារនោះបានចាប់ផ្តើមឡើងវិញ នេះបើតាមអង្គការសិទ្ធិមនុស្ស Syrian Observatory for Human Rights មានមូលដ្ឋាននៅប្រទេសអង់គ្លេស។ អង្គការសិទ្ធិមនុស្សនេះបន្តថា ក្រុមបះបោរបានបាញ់រ៉ុក្កែតជាង១០គ្រាប់ចូលក្នុងតំបន់រដ្ឋាភិបាលកាន់កាប់នៅទីក្រុង Aleppo។ ការវាយប្រហារបំផ្លិចបំផ្លាញតំបន់រស់នៅរបស់មនុស្សជាង២៥ម៉ឺននាក់កាលពីសប្តាហ៍មុន បានចាប់ផ្តើមដោយការប្រកាសរបស់រុស្ស៊ីអំពីផែនការវាយប្រហារភាគខាងជើងខេត្ត Idlib កាន់កាប់ដោយក្រុមបះបោរ និងខេត្ត Homs នៅភាគកណ្តាល។
ក្រុមបះបោរត្រូវកងទ័ពរដ្ឋាភិបាលឡោមព័ទ្ធនៅភាគខាងកើតក្រុង Aleppo តាំងពីខែកក្កដា។ ភ្នាក់ងារជំនួយនិយាយថា ការឧបត្ថម្ភអាហារត្រូវបញ្ចប់។ ទីក្រុង Aleppo ដែលពីមុនជាមណ្ឌលពាណិជ្ជកម្ម និងឧស្សាហកម្ម ត្រូវបំផ្លិចបំផ្លាញដោយការប្រយុទ្ធគ្នាតាំងពីឆ្នាំ២០១២ នៅពេលពួកបះបោរចូលកាន់កាប់ភាគខាងកើត។ មនុស្ស១,២លាននាក់រស់នៅក្នុងតំបន់រដ្ឋាភិបាលកាន់កាប់ត្រូវរងការវាយប្រហារដោយរ៉ុក្កែតរបស់ក្រុមបះបោរ៕
