អស់រយៈពេលតែជាង៥ខែប៉ុណ្ណោះបន្ទាប់ពីគណបក្សសង្គ្រោះជាតិ និងគណបក្សប្រជាជនកម្ពុជាបានសន្យាផ្ទាល់មាត់នៅក្នុងមន្ទីររដ្ឋសភាជាតិថា ឈប់វាយប្រហារគ្នានិងងាកមករកវប្បធម៌សន្ទនាគា្នម្តងវិញដើម្បីរកដំណោះស្រាយលើបញ្ហាជាតិធំៗនោះ ការប្រឈមមុខគ្នាកើតមានឡើងវិញ។
ការសន្យានេះបានរលាយបាត់ទៅវិញ បន្ទាប់ពីលោកនាយករដ្ឋមន្ត្រីហ៊ុន សែន បានព្រមានថា ឈប់លែងមានវប្បធម៌ជជែកសន្ទនាគ្នារវាងលោក និងលោក សម រង្ស៊ីទៀតហើយ ដោយសារតែប៉ុន្មានថ្ងៃមុននេះ លោកកឹម សុខា អនុប្រធានទី១នៃរដ្ឋសភា និងជាអនុប្រធានគណបក្សសង្គ្រោះជាតិ បានបរិហាររិះគន់ឥតសំចៃទៅលើការដឹកនាំរយៈពេល៣០ឆ្នាំរបស់លោកហ៊ុន សែន។
លោកនិយាយថា៖ «សម្តីឈ្លើយនោះឈ្លើយ។ ខ្ញុំគ្រាន់តែបញ្ជាក់ទៅវិញ ល្មមៗបានហើយ អាសម្តីតាមចិញ្ចើមថ្នល់ រំខានប្រជាពលរដ្ឋ។ បន្ទាប់ពីការបោះឆ្នោត ហើយងិក ងក់ៗ បាតុកម្មចុះ បាតុកម្មឡើង មិនទាន់អស់ចិត្តទេអី!»
កាលពីខែកញ្ញា ឆ្នាំ២០១៤ បន្ទាប់ពីគណបក្សសង្គ្រោះជាតិដឹកនាំអ្នកតំណាងរាស្ត្រជាប់ឆ្នោតចូលរួមប្រជុំរដ្ឋសភាដើម្បីបំពេញភាពស្របច្បាប់ដល់រដ្ឋាភិបាលអណត្តិទី៥នេះ មេដឹកនាំគណបក្សសង្គ្រោះជាតិគឺលោកសម រង្ស៊ី និងលោកហ៊ុន សែនខាងគណបក្សប្រជាជនកម្ពុជាបានសន្យាថា នឹងបញ្ឈប់វប្បធម៌រិះគន់គ្នា និងចាប់យកវប្បធម៌សន្ទនាគ្នាវិញដើម្បីដោះស្រាយបញ្ហារបស់ប្រទេសជាតិ។
មានប្រសាសន៍ក្នុងពិធីចែកសញ្ញាប័ត្រនៅក្នុងខេត្តស្វាយរៀង នៅថ្ងៃច័ន្ទនេះ លោកនាយករដ្ឋមន្ត្រីហ៊ុន សែនក្រៅពីប្រកាសបញ្ចប់វប្បធម៌សន្ទាគ្នានេះ លោកថែមទាំងព្រមានថា នឹងដកហូតអភ័យឯកសិទ្ធិសមាជិកសភាតំណាងរាស្ត្រគណបក្សសង្គ្រោះជាតិចំនួន៧រូបដើម្បីបើកផ្លូវឲ្យតុលាការដំណើររឿងក្តីពាក់ព័ន្ធសំណុំរឿងអំពីព្រឹត្តិការណ៍នៅសួនប្រជាធិបតេយ្យឡើងវិញ។
លោកនិយាយថា៖ «អត់រួចខ្លួនទេ ប្រាប់ឲ្យហើយ។ អ្នកពាក់ព័ន្ធទាំងអស់អត់រួចខ្លួនទេ។ ចង់ទៅជាអ្វីក៏ទៅៗ។ តុលាការធ្វើតាមនីតិវិធី រាប់ទាំងអ្នកតំណាងរាស្ត្រ៧រូបអត់រួចខ្លួនទេ សុំប្រាប់ឲ្យហើយ ពីព្រោះអ្វីតំណាងរាស្ត្រទាំង៧រូបនេះបានអភ័យឯកសិទ្ធិក្រោយពីតុលាការចោទប្រកាន់ផ្លូវច្បាប់ អត់រួចខ្លួនទេ»។
អ្នកតំណាងរាស្ត្រគណបក្សសង្គ្រោះជាតិចំនួន៧រូបត្រូវបានតុលាការសម្រេចដោះលែងឲ្យនៅក្រៅឃុំជាបណ្តោះអាសន្ន បន្ទាប់ពីមានការសម្របសម្រួលផ្នែកនយោបាយនៅក្នុងកិច្ចប្រជុំកំពូលកាលពីថ្ងៃទី២២ខែកក្កដាឆ្នាំ២០១៤។
អ្នកតំណាងរាស្ត្រទាំង៧រូប ដែលជាប់ក្នុងសំណុំរឿងសួនប្រជាធិបតេយ្យកាលពីថ្ងៃទី១៥ខែកក្កដា រួមមានអ្នកស្រីមួរ សុខហួរ លោកហូរ វ៉ាន់ លោកឡុង រី លោកនុត រំដួល លោករៀល ខេមរិន្ទ លោកម៉ែន សុឋាវរិន្ទ និងលោកកែវ ភិរម្យ។
លោកស្រីមួរ សុខហួរ អ្នកតំណាងរាស្ត្រខាងគណបក្សសង្គ្រោះជាតិ មានប្រសាសន៍ថា ការគំរាមកំហែងដកអភ័យឯកសិទ្ធិអ្នកតំណាងរាស្ត្រគឺជាការគំរាមកំហែងដល់សំឡេងរបស់រាស្ត្រជាម្ចាស់ឆ្នោត។
លោកស្រីបានបញ្ជាក់ថា លោកស្រីមិនខ្លាចការដកអភ័យឯកសិទ្ធិទេ តែរាល់ការដកអភ័យឯកសិទ្ធិអ្នកតំណាងរាស្ត្របានទាល់តែមានសំឡេង២ភាគ៣នៃសមាជិកសភាទាំងមូល។
លោកស្រីនិយាយថា៖ «បើសិនជាតំណាងរាស្ត្រនៅតែទទួលនូវការគំរាមកំហែងពីសំណាក់បុគ្គលណាក៏ដោយ តើសភាដែលជាស្ថាប័នកំពូលនៃព្រះរាជាណាចក្រកម្ពុជានឹងក្លាយទៅជាស្ថាប័នអ្វី?»
លោកនី ចរិយា ប្រធានក្រុមស៊ើបអង្កេតរបស់សមាគមសិទ្ធិមនុស្សអាដហុក មានប្រសាសន៍ថា យោងតាមច្បាប់រដ្ឋធម្មនុញ្ញ អភ័យឯកសិទ្ធិអ្នកតំណាងរាស្ត្រមិនអាចដកបានទេ លុះត្រាតែមានសំឡេងសមាជិកសភាគ្រប់គ្រាន់។ ប៉ុន្តែអ្វីដែលជាការព្រមានរបស់លោកហ៊ុន សែនជាសារមួយទៅថ្នាក់ដឹកនាំគណបក្សសង្គ្រោះជាតិដើម្បីឲ្យឈប់វាយប្រហារមកលើគណបក្សប្រជាជនកម្ពុជា បើមិនដូច្នេះទេ មិនដោះលែងសកម្មជនដែលកំពុងជាប់ឃុំនោះទេ។
លោកនិយាយថា៖ «ខ្ញុំមើលទៅប្រហែលជាគាត់មានការខកចិត្ត ដោយសារតែកំណែទម្រង់ការងារបោះឆ្នោតទាក់ទងកំណែទម្រង់គណៈកម្មាធិការជាតិបោះឆ្នោត។ អញ្ចឹងគ្រាន់តែស្រែកដើម្បីសន្សំយកជាលេសដើម្បីកុំឲ្យមានការធ្វើការកែទម្រង់ ពីព្រោះយើងដឹងហើយថា គ.ជ.ប.ពីដើមមកហ្នឹងគឺថា ១០០%នៅលើកណ្តាប់ដៃគណបក្សប្រជាជនកម្ពុជា»។
មានសកម្មជនគណបក្សសង្គ្រោះជាតិចំនួន១១នាក់ផ្សេងទៀតកំពុងស្ថិតក្នុងមន្ទីរឃុំឃាំង និងមួយចំនួនទៀតកំពុងស្ថិតនៅក្រៅឃុំជាបណ្តោះអាសន្នទាក់ទិននឹងសំណុំរឿងសួនប្រជាធិបតេយ្យ ក្នុងនោះមានលោកមាជ សុវណ្ណារ៉ា ប្រធាននាយកដ្ឋានព័ត៌មានគណបក្សសង្គ្រោះជាតិ៕
