លោកនាយករដ្ឋមន្ត្រីកម្ពុជា ដែលកាន់អំណាចយូរ បានទទួលស្គាល់នៅថ្ងៃពុធនេះថា លោកមានកំហុសមួយចំនួន នៅក្នុងការដឹកនាំរបស់លោករយៈកាលកន្លងមកនេះ។
ការសារភាពនេះធ្វើឡើងនៅចំថ្ងៃខួបទី៣០ឆ្នាំនៃការឡើងកាន់អំណាចជានាយករដ្ឋមន្ត្រីថ្ងៃទី១៤ខែមករាឆ្នាំ១៩៨៥ ដល់ថ្ងៃទី១៤ខែមករាឆ្នាំ២០១៥។
លោកហ៊ុន សែនថ្លែងបែបនេះមួយថ្ងៃក្រោយពីមានរបាយការណ៍ប្រកបដោយការរិះគន់ខ្លាំងៗពីអង្គការឃ្លាំមើលការរំលោភសិទ្ធិមនុស្សមួយរបស់សហរដ្ឋអាមេរិក Human Rights Watch។ អង្គការដែលមានមូលដ្ឋាននៅក្នុងទីក្រុងញូយ៉កនេះ បានពិពណ៌នាអំពើហិង្សា ការគាបសង្កត់ និងអំពើពុករលួយ បញ្ហាដីធ្លីនិងការបង្កឲ្យជនស៊ីវិលស្លាប់ និងក្រុមបាតុករស្លាប់រួមទាំងការសម្លាប់សកម្មជននយោបាយដែលប្រជែងអំណាច។
លោកប្រមុខរដ្ឋាភិបាលខ្មែរទទួលស្គាល់ថា មានកំហុសក្រោមការដឹកនាំរបស់ខ្លួនមែន ប៉ុន្តែគេត្រូវចេះថ្លឹងថ្លែងលើគុណសម្បត្តិរបស់លោកផងដែរ។
«ការណ៍ពិត ខ្ញុំក៏មានកំហុសមិនមែនអត់ទេ។ ប៉ុន្តែ(ត្រូវ)ថ្លឹងថ្លែងរវាងអាត្រូវនិងអាខុស»។
ប្រតិកម្មបែបនេះធ្វើឡើងក្នុងឱកាសសម្ពោធការភ្ជាប់មុខតំណចុងក្រោយនៃការសង់ស្ពានអ្នកលឿងដែលនឹងត្រូវដាក់ឈ្មោះថា ស្ពានស៊ូបាសា។
លោកហ៊ុន សែនបញ្ជាក់ថា ចន្លោះពីឆ្នាំ១៩៧៩ដល់ខែមករាឆ្នាំ១៩៨៥រហូតដល់ពេលមុនលោកកាន់តំណែងជានាយករដ្ឋមន្ត្រី លោកមិនមែនជាមេដឹកនាំប្រទេសនោះទេគឺគ្រាន់តែជា«អ្នកចូលរួមដឹកនាំប្រទេស»។
ការកាន់តំណែងយូរបានធ្វើឲ្យលោកហ៊ុន សែនក្លាយជាមេដឹកនាំទី៦ដែលកាន់តំណែងយូរជាងគេបំផុតនៅក្នុងពិភពលោកគឺឈរបន្ទាប់ពីលោក Robert Mugabe នៃប្រទេសហ្ស៊ីមបាវ៉េ និងនៅពីលើលោក Yoweri Museveni នៃប្រទេសអ៊ូហ្គាន់ដា។ ដោយឡែកនៅក្នុងពិភពលោក អ្នកដែលកាន់តំណែងយូរជាងគេគឺប្រធានាធិបតីប្រទេសកាម៉ារូនគឺលោកប៉ូល ប៊ីយ៉ា ដែលឈរក្នុងតំណែងរយៈពេលជាង៣៩ឆ្នាំមកហើយ។
នៅក្នុងរបាយការណ៍កម្រាស់៧៥ទំព័រ Human Rights Watch បានរៀបរាប់ការរំលោភសិទ្ធិមនុស្សក្រោមរបបគ្រប់គ្រងរបស់លោកនាយករដ្ឋមន្ត្រីហ៊ុន សែន ការបណ្តាលឲ្យមនុស្សរាប់ម៉ឺននាក់ស្លាប់ដោយជំងឺ និងរាប់ពាន់នាក់ស្លាប់ និងពិការដោយសារគ្រប់មីនក្នុងយុទ្ធនាការកាប់ព្រៃឈើតាមព្រំដែន ឬហៅថា ក-៥។ មនុស្សប្រមាណ៥០០០នាក់ត្រូវចាប់ខ្លួនជាអ្នកទោសនយោបាយ។
ក្រៅពីនោះមានការវាយប្រហារដោយគ្រាប់បែកនៅថ្ងៃទី៣០ខែមិនា ឆ្នាំ១៩៩៧លើហ្វូងបាតុករដឹកនាំដោយលោកសម រង្ស៊ី ដែលតាមអង្គការHuman Rights Watch គឺក្នុងគោលដៅផ្តាច់ផ្តិលគូប្រជែងនយោបាយគឺលោកសម រង្ស៊ី។ ក្នុងព្រឹត្តិការណ៍នោះ មនុស្សស្លាប់១៦នាក់ និងមនុស្សច្រើនជាង១៥០នាក់រងរបួស។ ប៉ុន្មានខែក្រោយ មានរដ្ឋប្រហារខែកក្កដាឆ្នាំ១៩៩៧ដើម្បីទម្លាក់ព្រះអង្គម្ចាស់នរោត្តម រណឫទ្ធិពីសហនាយករដ្ឋមន្ត្រីទី១។ មនុស្សជាច្រើនទទួលរងការធ្វើទារុណកម្ម ជម្រិតយកចម្លើយ ការសម្លាប់ឥស្សរជនមេទ័ពជាន់ខ្ពស់របស់គណបក្សហ៊្វុនស៊ីនប៉ិច និងចាប់ឃុំខ្លួន។ នេះបើយោងតាមរបាយការណ៍ Human Rights Watch។
បន្ថែមពីនោះទៀត ការវាយប្រហារលើគណបក្សជំទាស់ និងបញ្ហាដីធ្លី ករណីបាញ់សម្លាប់សកម្មជនព្រៃឈើដ៏ល្បីល្បាញគឺលោកឈុត វុទ្ធី ការបង្រ្កាប និងការសម្លាប់បាតុករដោយហិង្សាក្រោយការបោះឆ្នោតក៏ត្រូវបានលើកឡើងក្នុងរបាយការណ៍ផងដែរ។
លោកប្រេដស៍ អាដាម នាយកអង្គការ Human Rights Watch ប្រចាំតំបន់អាស៊ី បានអំពាវនាវដល់រដ្ឋាភិបាលដែលមានឥទ្ធិពល និងប្រទេសម្ចាស់ជំនួយឲ្យបញ្ចប់ភាពអសកម្មក្នុងការឆ្លើយតបចំពោះភាពអវិជ្ជមានក្នុងរបាយការណ៍ខាងលើនេះ។
លោកហ៊ុន សែនបានឆ្លើយតបទៅនឹងរបាយការណ៍ខាងលើដោយសំឡេងខ្លាំងៗ ហើយលោកទទូចឲ្យមានការទទួលស្គាល់នូវស្នាដៃក្រោមតំណែងជានាយករដ្ឋមន្ត្រីរបស់លោក។
«នៅពេលដែលហ៊ុន សែនចាប់ផ្តើមធ្វើជានាយករដ្ឋមន្ត្រី សង្គ្រាមនៅហែកហួរប្រទេសនេះនៅឡើយ។ បើគ្មានបាតដៃហ៊ុន សែនទេ ក៏គ្មានកិច្ចព្រមព្រៀងទីក្រុងប៉ារីសចេញមកដែរ ព្រោះហ៊ុន សែនជាអ្នកចរចា។ តើនយោបាយឈ្នះឈ្នះដើម្បីបញ្ចប់សង្គ្រាមនេះ អ្នកណាអ្នកធ្វើ? កាលពីឆ្នាំ១៩៨៥ កាលនោះដីទាំងអស់ជារបស់រដ្ឋ។ ខ្ញុំជាអ្នកដឹកនាំកំណែទម្រង់ដីធ្លី ប្រគល់កម្មសិទ្ធិឲ្យប្រជាពលរដ្ឋ។ ស្ពានថ្ងៃនេះពិតមែនតែជប៉ុនជាអ្នកឲ្យប៉ុន្តែអ្នកណាជាអ្នកសុំ? ហេតុអ្វីក៏ឃើញតែអាក្រក់»។
លោកយ៉ែម ប៉ុញ្ញរិទ្ធ តំណាងរាស្ដ្រ និងជាអ្នកនាំពាក្យគណបក្សសង្គ្រោះជាតិមើលឃើញថា ក្រោមការដឹកនាំរបស់លោកនាយករដ្ឋមន្ត្រីហ៊ុន សែន មានទាំងភាពវិជ្ជមាន និងអវិជ្ជមាន។ ហើយអ្វីដែលនៅសេសសល់នោះគឺប្រព័ន្ធយុត្តិធម៌សង្គម។
«ភាពជាវិជ្ជមានយើងទទួលស្គាល់ថា មានសន្ធិសញ្ញាទីក្រុងប៉ារីសពិតប្រាកដអញ្ចឹងមែន ហើយបន្ទាប់មកបាននាំមកនូវការអភិវឌ្ឍមួយចំនួនដោយមានប្រាក់ជំនួយឥតសំណង ប្រាក់កម្ចីជាដើម។ ប៉ុន្តែថ្វីដ្បិតតែមានការអភិវឌ្ឍទាំងនោះ តែមានប្រព័ន្ធដែលត្រូវធ្វើកំណែទម្រង់ ដូចជាអំពើពុករលួយជាប្រព័ន្ធរបស់មន្ត្រីខិលខូច អយុត្តិធម៌សង្គម មានការបំផ្លាញធនធានធម្មជាតិ មានការរំលោភសិទ្ធិមនុស្ស មានការរំលោភដីធ្លី ជាពិសេសប្រព័ន្ធតុលាការដែលមិនទាន់មានភាពយុត្តិធម៌ និងមិនអព្យាក្រិតពិតប្រាកដ»។
យ៉ាងណាក៏ដោយ លោកយ៉ែម ប៉ុញ្ញរិទ្ធបានរិះគន់ការកាន់អំណាចយូររបស់លោកហ៊ុន សែនថា ការដឹកនាំកាន់តែយូរ អំពើពុករលួយកាន់តែរីករាលដាល និងរបបបក្ខពួកនិយមកាន់តែកើតមាន៕
