សំឡេងចម្រៀងជាតិអាមេរិកាំងនិងសំឡេងចម្រៀងភ្លេងជាតិខ្មែរបានបន្លឺឡើងជាបន្តបន្ទាប់គ្នានៅក្នុងសាលមួយចំកណ្តាលទីក្រុងឡុងប៊ិច រដ្ឋកាលីហ្វញ៉ា សហរដ្ឋអាមេរិក ក្នុងពិធីបុណ្យឯករាជ្យជាតិកម្ពុជាកាលពីថ្ងៃទី៩ខែវិច្ឆិកា។
នេះគឺជាការប្រារព្ធបុណ្យឯករាជ្យជាតិកម្ពុជាជាលើកទីមួយនៅលើទឹកដីដែលមានពលរដ្ឋខ្មែររស់នៅក្រៅប្រទេសច្រើនជាងគេបំផុតមួយនេះ។
ពិធីនេះរៀបចំឡើងដោយស្ថានអគ្គកុងស៊ុលកិត្តិយសរបស់ប្រទេសកម្ពុជាប្រចាំនៅ ទីក្រុងឡុងប៊ិច។
លោកគីមឆា ហួត អគ្គកុងស៊ុលកិត្តិយស បានបញ្ជាក់ថានេះជាឱកាសដែលនឹងជួយឱ្យមជ្ឈដ្ឋានខាងក្រៅបានដឹងឮពីពលរដ្ឋខ្មែរនៅទីក្រុងឡុងប៊ិចនិងភាពសម្បូរបែបនៃវប្បធម៌របស់ប្រទេសកម្ពុជា។
កម្រងរូបភាពVOA៖ មន្ត្រីកម្ពុជានៅក្រុងឡុងប៊ិច ប្រារព្ធបុណ្យឯករាជ្យជាតិខ្មែរជាលើកដំបូង
«យើងមានសេចក្តី សោមនស្សរីករាយព្រោះនេះជាឱកាសដែលយើងអាចបង្ហាញទីក្រុងឡុងប៊ិចថាយើងមានចំនួនប្រជាជនរស់នៅច្រើនហើយនៅទីក្រុងឡូសអង់ជឺឡេសនេះក៏មានកុងស៊ុលបរទេសចំនួន១០២ប្រទេសដែលយើងជាសមាជិកជាមួយនឹងគេហើយយើងអញ្ជើញគេមកដើម្បីឱ្យគេស្គាល់ទំនៀមទម្លាប់ប្រពៃណីរបស់យើងដើម្បីឱ្យគេបានទៅ ទស្សនាប្រទេសខ្មែរ ឱ្យគេស្គាល់ពីវប្បធម៌ ទេសចរណ៍ហើយផ្នែកដទៃដូចជាផ្នែកវិនិយោគទុនដើម្បីឱ្យប្រទេសយើងជឿនលឿនទៅថ្ងៃអនាគត»។
ពិធីនេះមានការលេងភ្លេងខ្មែរកំដរបរិយាកាស ការតាំងពិពរណ៍បង្ហាញពីតំបន់ទេសចរណ៍ដ៏ធំនៅក្នុងប្រទេសកម្ពុជាគឺ ប្រាសាទអង្គរវត្ត និងការបង្ហាញពីរបាំនិងសម្លៀកបំពាក់ខ្មែរ។
លោកសន សាំង នាយកក្រុមហ៊ុន Asia Now Tours ដែលបានដាក់តាំងពិពរណ៍បង្ហាញពីតំបន់ទេសចរណ៍ក្នុងប្រទេសកម្ពុជាបានបញ្ជាក់ពីគោលដៅនៃការជំរុញវិស័យទេសចរណ៍៖
«ពួកខ្ញុំចង់សំដៅលើអ្នកដែលអត់ដែលទៅលេងស្រុកខ្មែរជាពិសេសកូនក្មេងដែលកើតនៅស្រុកអាមេរិកជាដើមហើយនឹងជនជាតិគេផ្សេងៗទៀតដែលអត់ដែលធ្លាប់បានទៅលេងស្រុកខ្មែរហើយគេចេះតែងតែថាខ្លាចអត់ហ៊ានទៅលេងម៉្លោះហើយថ្ងៃខ្ញុំតាំងពិពរណ៍ដើម្បីបង្ហាញគេថាស្រុកខ្មែរមានសុវត្ថិភាពទៅលេងទៅពីព្រោះនៅ ស្រុកខ្មែរមិនមែនតែមកពី ស្រុកអាមេរិកទេគឺមកពីជុំវិញពិភពលោកដែលទៅលេងស្រុកខ្មែរ។ ស្រុកខ្មែរជាកន្លែងសប្បាយមួយដែលគួរឱ្យចាប់អារម្មណ៍គួរតែយើងទៅលេងជាពិសេសកូនខ្មែរដែលកើតនៅ ទីនេះដែលខ្លាចអត់ហ៊ានទៅលេងកុំភ័យគឺស្រុកខ្មែរឥឡូវមានសន្តិភាពណាស់»។
ទីក្រុងឡុងប៊ិច ដែលគេហៅថាប្រទេសកម្ពុជាតូច បានក្លាយជាទីកន្លែងប្រមូលផ្តុំពលរដ្ឋខ្មែរជាង៦ម៉ឺននាក់ដែលបានមករស់នៅជាបន្តបន្ទាប់ចាប់តាំងពីក្រោយការដួលរលំនៃរបបខ្មែរក្រហមហើយនៅតែបន្តទាក់ទាញពលរដ្ឋខ្មែរថ្មីៗទៀត។
លោក អ៊ឹង ហ្គារី បានមករស់នៅទីក្រុងឡុងប៊ិចជាង៣៥ឆ្នាំហើយ។ បច្ចុប្បន្នលោកជាអនុប្រធានក្រុងខ្មែរ។ លោកបានបញ្ជាក់ពីក្តីសប្បាយរីករាយដែលបានមកចូលរួមក្នុងពិធីបុណ្យនេះហើយលោកចង់ឱ្យមានជាបន្តទៀត៖
«ខ្ញុំគិតថាការរៀបចំបុណ្យឯករាជ្យជាតិខ្មែរនៅសហរដ្ឋអាមេរិកគួរតែ មានជារៀងរាល់ឆ្នាំព្រោះ ធ្វើឱ្យប្រជាជនយើងចងចាំប្រទេសជាតិរបស់ខ្លួនកុំឱ្យភ្លេចហើយអរគុណរាជរដ្ឋាភិបាលដែលនាំ មកនូវបុណ្យហ្នឹងមកដល់ទីក្រុងខ្មែរ»។
ការប្រារព្ធពិធីនេះមានការចូលរួមពីប្រតិភូយុវជនជាន់ខ្ពស់ដែលមកពីប្រទេសកម្ពុជាផងដែរ។
លោក ម៉ឹង ពន្លក ប្រធានចលនា យុវជនកម្ពុជា ឬហៅកាត់ថា ក្រុម១៥៧ ផ្តល់បទសម្ភាសដល់ VOA ក្នុងពេលដឹកនាំប្រតិភូយុវជនមកចូលរួមពិធីបុណ្យឯករាជ្យជាតិនោះថា៖
«ក្នុងនាមខ្ញុំជាកូនខ្មែរយុវជនជំនាន់ក្រោយនេះពិតជាមានភ័ព្វសំណាងដែលកើតក្នុងប្រទេសកម្ពុជាហើយមានសុខសន្តិភាព។ អីចឹងក្នុងនាមជាកូនខ្មែរយុវជនជំនាន់ក្រោយសូមប្តេជ្ញាថានឹងការពារទឹកដីជាពិសេសគឺការពារមរតកសុខសន្តិភាពជូនប្រទេសជាតិហើយរួមគ្នាសហការរវាងយុវជននៅកម្ពុជានិងយុវជននៅសហរដ្ឋអាមេរិកនេះដើម្បីការពារសុខសន្តិភាពនេះឱ្យមាននិរន្តរភាពជារៀងរហូត»។
សម្រាប់លោកម៉ឹង ពន្លក ការរីកចម្រើនសេដ្ឋកិច្ចដែលមានចំនួន៧ភាគរយថេរគឺជាកត្តាដែលលោកមានជំនឿថាអាចនឹងទាក់ទាញអ្នកវិនិយោគទុនជាច្រើនឱ្យទៅធ្វើវិនិយោគបន្ថែមនៅ កម្ពុជាហើយការប្រារព្ធពិធីបុណ្យឯករាជ្យជាតិដោយមានការផ្តោតលើសក្តានុពលរបស់ប្រទេសកម្ពុជានេះគឺជាបង្អួចដ៏ល្អមួយ។
ប្រទេសកម្ពុជាបានប្រកាសឯករាជ្យចេញពីអាណានិគមនិយមបារាំងនៅថ្ងៃទី៩ ខែវិច្ឆិកា ឆ្នាំ១៩៥៣បន្ទាប់ពីស្ថិតក្រោមការត្រួតត្រារបស់ប្រទេសបារាំងជិតមួយសតវត្សរ៍៕
