បន្ទាប់ពីអំពាវនាវសុំថវិកាពីអង្គការស្ថាប័ន សប្បុរសជននានាមួយរយៈមក នៅថ្ងៃពុធនេះគណៈកម្មាធិការជាតិអូឡាំពិកពិសេស (Special Olympics) បញ្ជាក់ថារាជរដ្ឋាភិបាលនឹងផ្តល់ការគាំទ្រថ្លៃចំណាយចំនួន២៣.០០០ដុល្លារសហរដ្ឋអាមេរិកសម្រាប់សំបុត្រយន្តហោះដល់ក្រុមអត្តពលិក Special Olympics ទៅចូលរួមប្រកួតនៅទីក្រុង Los Angeles សហរដ្ឋអាមេរិកពីថ្ងៃទី២៥ ខែកក្កដា ដល់ថ្ងៃទី២ ខែសីហាឆ្នាំ២០១៥ខាងមុខនេះ។
ទោះជាយ៉ាងនេះក្តី លោក ឃ្លាំង ចន្ធូ អគ្គលេខាធិការនៃគណៈកម្មាធិការជាតិអូឡាំពិកពិសេសកម្ពុជា ឱ្យដឹងថាគណៈកម្មាធិការនេះពុំទាន់ទទួលបានសាច់ប្រាក់មកដល់ដៃនៅឡើយទេ៖
«ជាក់ស្តែង យើងអត់ទាន់បានទឹកប្រាក់នៅឡើយទេ តែមានតួលេខ យើងកំពុងតែដំណើរការសុំថវិកាពីក្រសួងសេដ្ឋកិច្ច ។ រឿងទិញសំបុត្រយន្តហោះ យើងប្រហែលត្រូវខ្ចីលុយគេសិន»។
លោកឃ្លាំង ចន្ធូ យល់ថាសកម្មភាពកីឡា វាពឹងផ្អែកច្រើនលើវិស័យឯកជន៖
«នៅឆ្នាំ២០១៦នេះ យើងនឹងលើកសំណើគម្រោងផ្សេងៗ ជាចំណែករបស់រដ្ឋាភិបាល តាមរយៈក្រសួងសេដ្ឋកិច្ចដែរ ក៏ប៉ុន្តែចំណាយធំៗ យើងនឹងខំព្យាយាមរក Sponsor [អ្នកឧបត្ថម្ភ] ព្រោះវិស័យកីឡាវាពឹងផ្អែកច្រើនលើវិស័យឯកជនច្រើន»។
លោក មាស សារិន ទីប្រឹក្សាក្រសួងអប់រំ យុវជន និងកីឡាលើកឡើងថា ការលើកទឹកចិត្តដល់ជនពិការស្មារតីជាការយកចិត្តទុកដាក់របស់ Special Olympics កម្ពុជា៖
«ក្នុង Special Olympics យើងបានកំណត់ពាក្យស្លោកថាយើងមិនត្រូវទុកឱ្យអ្នកណាម្នាក់នៅពីក្រោយខ្នងយើងទេ។ ចឹង ចង់ឬមិនចង់យើងត្រូវតែមានការជ្រោមជ្រែង ឧបត្ថម្ភគាំទ្រដើម្បីឱ្យបងប្អូនជនពិការ[បញ្ញា]ឱ្យគាត់បានរស់ក្នុងសង្គមទៅតាមលទ្ធភាពដែលអាចធ្វើបាន»។
វិញ្ញាសាប្រកួតសរុបរបស់ អូឡាំពិកពិសេសមានចំនួន២៧ វិញ្ញាសា ក៏ប៉ុន្តែ លោក មាស សារិន អះអាងថា មានតែវិញ្ញាសាតែ២តែប៉ុណ្ណោះដែលកម្ពុជាមានលទ្ធភាពបញ្ជូនអត្តពលិករបស់ខ្លួនទៅប្រកួតគឺ វិញ្ញាសាអត្តពលកម្មរត់ប្រណាំង និងវិញ្ញាសាប៊ូលឈើហើយមានអត្តពលិកចំនួន៨រូប។
«ការប្រកួតកីឡាវាទាក់ទងនឹងការអភិវឌ្ឍសេដ្ឋកិច្ច យើងមិនអាចលោភហួសពីការអភិវឌ្ឍសេដ្ឋកិច្ចបានទេ ពីព្រោះសេដ្ឋកិច្ចមិនអាចទ្រទ្រង់កីឡាបានច្រើនទេ។ កីឡាគ្រប់ទិសទីទាំងអស់តែងទទួលការគាំទ្រពីវិស័យឯកជន។ នៅប្រទេសយើង ប្រទេសក្រីក្រ បើរដ្ឋាភិបាលមិនជួយ មិនអាចដើរទៅមុខបាន»។
នេះជាលើកទី៣ហើយ ដែលប្រទេសកម្ពុជានឹងចូលរួមប្រកួតអូឡាំពិកពិសេសរដូវក្តៅពិភពលោក បន្ទាប់ពីការប្រកួតនៅទីក្រុងសៀងហៃក្នុងឆ្នាំ២០០៧ និងការប្រកួតនៅទីក្រុងអាថែនប្រទេសក្រិកក្នុងឆ្នាំ២០១១។
អូឡាំពិកពិសេសកម្ពុជាត្រូវបានបង្កើតឡើងក្នុងឆ្នាំ២០០៥ក្នុងគោលដៅលើកកម្ពស់សកម្មភាពកីឡាដល់អ្នកមានបញ្ញាខ្សោយនៅកម្ពុជា៕
