ក្រសួងការពារជាតិនៃប្រទេសកម្ពុជា កំពុងធ្វើទំនាក់ទំនាក់ជាមួយភាគីចិនដើម្បីស្នើសុំការឧបត្ថម្ភនាវាចម្បាំងពីរគ្រឿងពីប្រទេសចិន ដើម្បីទុកការពារដែនសមុទ្ររបស់ខ្លួន។
លោក ទៀ វិញ មេបញ្ជាការនៃបញ្ជាការដ្ឋានកងទ័ពជើងទឹកកម្ពុជា បានថ្លែងយ៉ាងដូច្នេះបន្ទាប់ពីកងទ័ពជើងទឹកកម្ពុជា និងកងទ័ពជើងទឹកចិនបានធ្វើការហ្វឹកហាត់នៅសមុទ្រកំពង់សោមជាមួយគ្នាលើកិច្ចការសង្គ្រោះនៅក្នុងដែនសមុទ្រ។
នៅក្នុងជំនួបរបស់លោកជាមួយនឹងលោក ឧត្តមនាវីទោ យូ ម៉ានជៀន (Yu Manjian) ដែលធ្វើឡើងនៅឯបញ្ជាការដ្ឋានកងទ័ពជើងទឹកនៅរាជធានីភ្នំពេញនៅព្រឹកថ្ងៃពុធនេះ លោកនាយឧត្តមនាវីឯក ទៀ វិញ បានឲ្យដឹងថា កងទ័ពជើងទឹកប្រទេសកម្ពុជាមានតែនាវាតូចៗនៅពេលបច្ចុប្បន្ននេះ។ លោក ថា ក្រសួងការពារជាតិចិននឹងពិចារណាលើការប្រាថ្នាចង់បាននាវាចម្បាំងពីរគ្រឿងពីប្រទេសចិន ដែលអាចប្រើសម្រាប់ការពារលំហរសមុទ្រកម្ពុជា។ នៅមុនការបញ្ជាក់ពីសំណូមពររបស់លោក សុំនាវាចម្បាំងចិនពីរគ្រឿងនេះ លោក ទៀ វិញ បានមានប្រសាសន៍កោតសរសើរនាវាចម្បាំងរបស់ចិនថា៖
«ខ្ញុំបានចុះទៅមើលនាវាហ្នឹងគឺល្អណាស់ ដែលរបស់គាត់គឺ គឺមានការទំនើបៗ មែនដែលបានមកកម្ពុជា»។
នាវាចម្បាំងបីគ្រឿងរបស់ប្រទេសចិនបានមកដល់កំពង់ផែព្រះសីហនុ នៅក្នុងខេត្តព្រះសីហនុ កាលពីថ្ងៃច័ន្ទ។ នៅក្នុងចំណោមនាវាទាំងបីគ្រឿងនោះ មាននាវាពីរគ្រឿងបំពាក់ដោយប្រព័ន្ធនាំផ្លូវកាំជ្រួចមីស៊ីល និងមួយគ្រឿងទៀតជានាវាគាំទ្រ។
នាវាទាំងបីនេះ គឺជានាវាដែលធ្វើដំណើរចេញពីសមុទ្រចិនខាងត្បូង។ មុននឹងមកដល់ប្រទេសកម្ពុជា នាវាចម្បាំងទាំងនោះបានធ្វើដំណើរកាត់តាមប្រទេសមួយចំនួន រួមមានប្រទេសប៉ាគីស្ថាន ស្រីលង្ការ និងប្រទេសថៃ មុននឹងការមកដល់កំពង់ផែក្រុងព្រះសីហនុ។ នេះបើយោងតាមការបញ្ជាក់ពីលោក ឧត្តមនាវីទោ Yu Manjian ដែលជាមេបញ្ជាការរងនៃកងនាវាចម្បាំងចិននេះ។
នៅក្នុងជំនួបជាមួយ លោក Yu Manjian នោះ លោក ទៀ វិញ ថ្លែងថា លោកពុំដែលបានមានប្រសាសន៍ ទាក់ទិននឹងជម្លោះនៅសមុទ្រចិនខាងត្បូងនោះទេ នៅរាល់ពេលដែលលោកបានជួបប្រជុំជាមួយប្រមុខកងទ័ពជើងទឹកក្នុងប្រទេសនៃសមាគមអាស៊ាន។ លោកបញ្ជាក់ថា៖
«ទៅប្រជុំអាស៊ានរបស់កងទ័ពជើងទឹកម្តងៗ នៅម្តុំអាស៊ាននេះ គឺៗ គឺចង់ឲ្យខ្ញុំនិយាយ ខ្ញុំអត់និយាយទេ។ ខ្ញុំថា ទុកឲ្យដោះស្រាយ ជាមួយសន្តិវិធីគ្នាល្អជាង»។
លោកនាយឧត្តមនាវី ទៀ វិញ បានបញ្ជាក់ពីជំហរកងទ័ពជើងទឹករបស់កម្ពុជានៅចំពោះ លោកឧត្តមនាវីទោ Yu Manjianថា កងទ័ពជើងទឹកកម្ពុជាទទួលស្គាល់ថា មានប្រទេសចិនតែមួយ មិនមានពីរឡើយ។
បន្ទាប់ពីការថ្លែងរបស់លោក ទៀ វិញ លោក Yu Manjian មិនទាន់បញ្ជាក់ថា ប្រទេសចិននឹងឧបត្ថម្ភនាវាចម្បាំងទាំងពីរគ្រឿងនោះដល់កម្ពុជានោះទេ។ តែមេបញ្ជាការរងនាវាចម្បាំងចិនរូបនេះ និយាយថា លោកពេញចិត្តនឹងការពន្យល់របស់លោក ទៀ វិញ ដែលបដិសេដមិននិយាយពីជម្លោះនៅសមុទ្រចិនខាងត្បូង នៅក្នុងពេលជួបប្រជុំជាមួយប្រមុខកងទ័ពជើងទឹកក្នុងប្រទេសសមាជិកអាស៊ាន។ នៅចុងបញ្ចាប់នៃការថ្លែងរបស់លោក ទៅកាន់ លោក ទៀ វិញ លោក Yu Manjian បានស្នើឲ្យ លោក ទៀ វិញ ទៅទស្សនានាវាចម្បាំងរបស់ចិន នៅក្នុងសមុទ្រចិនខាងត្បូង។
ការធ្វើលំហាត់សង្គ្រោះរវាងកងទ័ពជើងទឹកកម្ពុជា និងកងទ័ពជើងចិនបានបញ្ចប់នៅថ្ងៃពុធនេះ។ នាវាចម្បាំងទាំងបីនេះ នឹងបើកឲ្យសាធារណជនចូលទស្សនា នៅថ្ងៃព្រហស្បតិ៍ស្អែកនេះ មុនការចាកចេញរបស់នាវាទាំងបីនេះ ទៅកាន់ប្រទេសចិនវិញ។ នេះបើយោងទៅតាមការបញ្ជាក់របស់លោក មាស ថង អ្នកនាំពាក្យនៃកងទ័ពជើងទឹកកម្ពុជា។
លោកមាស ថង បានមានប្រសាសន៍ប្រាប់វីអូអេ អំពីការធ្វើលំហាត់នេះ ដោយផ្អែកលើប្រធានបទចំនួនបី៖
«ទីមួយសង្គ្រោះ គ្រោះមហន្តរាយ អគ្គិភ័យ ឆាបឆេះលើនាវា។ ទីពីរលំហាត់ បានន័យថា យើងធ្វើសញ្ញាទង់លើនាវាឧបទ្ទវហេតុនៅលើសមុទ្រនីមួយៗ ហើយទីបីគឺការងារសេនាធិការរបស់កងទ័ពជើងទឹក។ ហ្នឹងបីមុខសំខាន់ហ្នឹង»។
លោកបានបញ្ជាក់បន្ថែមថា ប្រទេសកម្ពុជា ពិតជាចង់បាននាវាចម្បាំងដែលអាចបំពាក់សពា្វវុធ ដែលមានទំហំតូចល្មមដែលប្រទេសកម្ពុជាអាចផ្គត់ផ្គង់ដល់ប្រតិបត្តិការរបស់នាវាទាំងនោះ។ យ៉ាងក៏ដោយ លោកថា នេះគ្រាន់តែជាការប្រាថ្នាចង់បានរបស់កងទ័ពទឹកកម្ពុជាតែប៉ុណ្ណោះ។
ការមកដល់របស់នាវាចម្បាំងបីគ្រឿងរបស់ប្រទេសចិននេះ គឺកើតមានក្រោយពេលតែប៉ុន្មានថ្ងៃនៃការមកដល់របស់នាវារបស់ប្រទេសជប៉ុនបីគ្រឿង។ នាវាចិនទាំងបីគ្រឿងនោះ បាននាំកងទ័ពជើងទឹកចំនួន៧០០នាក់មកជាមួយផងដែរ។
លើសពីនេះទៀត ការមកដល់នៃនាវារបស់ប្រទេសចិនទាំងបីគ្រឿងនេះ ក៏បានកើតឡើងបន្ទាប់ពីក្រុមអ្នកស្រាវជ្រាវឯករាជ្យមួយនៅស.រ.អាបានឲ្យដឹងថា ប្រទេសចិនកំពុងដំឡើងប្រព័ន្ធរ៉ាដាមួយនៅពាសពេញដែនកោះមានជម្លោះ ដែលខ្លួនត្រួតត្រានៅក្នុងដែនសមុទ្រចិនខាងត្បូង។ របាយការណ៍របស់មជ្ឈមណ្ឌលសិក្សាបញ្ហាយុទ្ធសាស្ត្រនិងអន្តរជាតិ ដែលមានមូលដ្ឋាននៅរដ្ឋធានីវ៉ាស៊ីនតោននេះ បានឲ្យដឹងថាប្រព័ន្ធរ៉ាដានៅលើកោះនោះ «នឹងបង្កើនសមត្ថភាពរបស់ប្រទេសចិនយ៉ាងខ្លាំង ដើម្បីត្រួតពិនិត្យមើលចរាចរណ៍លើផ្ទៃទឹកនិងលើអាកាស នៅប៉ែកខាងជើងនៃដែនសមុទ្រចិនខាងត្បូង»។ ក្រុមស្រាវជ្រាវនេះក៏និយាយដែរថា ចិនហាក់ដូចជាកំពុងដំឡើងប្រព័ន្ធរ៉ាដា នៅលើកោះតូចៗផ្សេងទៀតនៅក្នុងប្រជុំកោះស្ព្រាតលីផងដែរ៕
