លោកប្រធានាធិបតីសហរដ្ឋអាមេរិក បារ៉ាក់ អូបាម៉ា បានអំពាវនាវឲ្យមានវិធានការ ជាក់ស្តែងដើម្បីបន្ធូរបន្ថយភាពតានតឹងពីជម្លោះទឹកដីដែលកំពុងបន្តមានឡើងនៅក្នុងសមុទ្រចិនខាងត្បូង។
នៅថ្ងៃបញ្ចប់នៃការចរចាជាមួយមេដឹកនាំអាស៊ីអាគ្នេយ៍នៅឯសន្និសីទកំពូលសន្តិសុខនិងសេដ្ឋកិច្ចនៅក្នុងរដ្ឋ California លោកប្រធានាធិបតី អូបាម៉ា បានមានប្រសាសន៍ថា ពួកមេដឹកនាំបានបញ្ជាក់ថា ជម្លោះនោះត្រូវតែដោះស្រាយដោយសន្តិវិធីហើយតាមរយៈមធ្យោបាយផ្លូវច្បាប់។
លោកប្រធានាធិបតី អូបាម៉ា បានមានប្រសាសន៍ថា៖ «សហរដ្ឋអាមេរិកនិងសមាគមអាស៊ាន កំពុងបញ្ជាក់ឡើងវិញពីការតាំងចិត្តដ៏ខ្លាំងរបស់យើងដល់សណ្តាប់ធ្នាប់ក្នុងតំបន់ដែលនៅទីនោះច្បាប់អន្តរជាតិហើយនិងសិទ្ធិរបស់ប្រទេសទាំងអស់ ទាំងតូចទាំងធំ ត្រូវបានធ្វើតាម»។
លោកប្រធានាធិបតីក៏បានអំពាវនាវឲ្យបញ្ឈប់ការវាទទីទឹកដីបន្តទៀត ដែលនិយាយសំដៅដល់ការខំប្រឹងប្រែងដ៏ខ្លាំងក្លារបស់រដ្ឋាភិបាលទីក្រុងប៉េកាំងដែលការពារការទាមទារទឹកដីមានជម្លោះតាមរយៈការស្ថាបនាកោះថ្មី។
ជំនួបនៅ Sunnylands មានគោលបំណងជំរុញភាពជាសហគ្រិនហើយនិងការបញ្ចូលរបៀបថ្មីដើម្បីទាក់ទាញពាណិជ្ជកម្មនិងការវិនិយោគទុន។ លោកប្រធានាធិបតីបានមានប្រសាសន៍ទៀតថា មានការគាំទ្រយ៉ាងខ្លាំងក្លាក្នុងចំណោមប្រទេសនានានៅក្នុងសមាគមអាស៊ានដើម្បីធ្វើឲ្យប្រសើរឡើងនូវនីតិរដ្ឋ ការការពារទ្រព្យសម្បត្តិកម្មសិទ្ធិបញ្ញាហើយនិងការវិនិយោគទុនក្នុងវិស័យអប់រំ។ ទោះជាយ៉ាងណាក៏ដោយ លោកប្រធានាធិបតី ក៏បានអំពាវនាវឲ្យមានការគ្រប់គ្រងតាមបែបស៊ីវិលវិញនៅក្នុងប្រទេសថៃ ហើយថាសហរដ្ឋអាមេរិកនឹងបន្តគាំទ្រប្រជាពលរដ្ឋនៅទូទាំងតំបន់អាស៊ីអាគ្នេយ៍ដែលធ្វើការដើម្បីលើកស្ទួយនីតិរដ្ឋហើយនិងធ្វើឲ្យប្រសើរឡើងនូវសិទ្ធិមនុស្ស។
លោកប្រធានាធិបតី អូបាម៉ា កំពុងស្វះស្វែងអភិវឌ្ឍតួនាទីដឹកនាំជាមួយសមាគមអាស៊ាន ដែលសេតវិមាន មើលឃើញថាជាគន្លឹះមួយធ្វើឲ្យសហរដ្ឋអាមេរិកមានតុល្យភាពឡើងវិញនៅតំបន់អាស៊ីនិងមហាសមុទ្រប៉ាស៊ីហ្វិក៕
