ក្រុមមន្រ្តីក្រសួងការពារប្រទេសកូរ៉េខាងត្បូងនិយាយថា សមយុទ្ធខាងយោធាប្រចាំឆ្នាំនៅពេលខាងមុខជាមួយសហរដ្ឋអាមេរិកនឹងធំជាងពេលណាទាំងអស់ ដែលជាសញ្ញាមួយនៃការកើនឡើងនៃការតានតឹងជាមួយប្រទេសកូរ៉េខាងជើងលើការសាកល្បងកម្មវិធីអាវុធនុយក្លេអ៊ែរ និងកាំជ្រួចមីស៊ីលកាលពីពេលថ្មីៗនេះរបស់ខ្លួន។
លោក Han Min-koo រដ្ឋមន្រ្តីការពារប្រទេសកូរ៉េខាងត្បូង បាននិយាយនៅថ្ងៃព្រហស្បត៍នេះថា កងទ័ពសហរដ្ឋអាមេរិកប្រហែល១ម៉ឺន៥ពាន់នាក់ នឹងចូលរួមនៅក្នុងសមយុទ្ធប្រចាំឆ្នាំហៅថា Key Resolve and Foal Eagle នៅពេលដែលសមយុទ្ធនោះ ចាប់ផ្តើមនៅខែក្រោយ ដែលមានចំនួន២ដងលើសកាលពីឆ្នាំទៅ។ ទីភ្នាក់ងារព័ត៌មាន Yonhap បានរាយការណ៍កាលពីថ្ងៃពុធថា នាវាផ្ទុកយន្តហោះប្រើដោយថាមពលនុយក្លេអ៊ែររបស់សហរដ្ឋអាមេរិកឈ្មោះ John C. Stennis នឹងចូលរួមនៅក្នុងសមយុទ្ធប្រចាំឆ្នាំនេះដែលរដ្ឋាភិបាលទីក្រុងព្យុងយ៉ាង ជានិច្ចកាលអះអាងថា ជាការប្រុងប្រៀបសម្រាប់ការឈ្លានពាន។
ក្រុមមន្រ្តីស៊ើបការណ៍សម្ងាត់កូរ៉េខាងត្បូងបានផ្តល់ព័ត៌មានដល់សមាជិកសភាថា មេដឹកនាំកូរ៉េខាងជើង Kim Jong-un បានបញ្ជាឲ្យប្រុងប្រៀបវាយប្រហារភេរវកម្មលើកូរ៉េខាងត្បូង។
សមាជិកម្នាក់របស់គណបក្សកាន់អំណាចរបស់កូរ៉េខាងត្បូងបានប្រាប់អ្នកយកព័ត៌មាននៅថ្ងៃព្រហស្បត៍នេះថា ទីភ្នាក់ងារស៊ើបការណ៍សម្ងាត់ជាតិជឿជាក់ថា ការវាយប្រហារ អាចដៅលើក្រុមសកម្មជនប្រឆាំងកូរ៉េខាងជើង អ្នករត់ចោលស្រុកហើយនិងមន្រ្តីរដ្ឋាភិបាលកូរ៉េខាងត្បូង។
រថភ្លើងរត់ក្រោមដី ហាងលក់ដូរទំនិញធំៗ ហើយនិងស្ថានីយថាមពល ក៏ជាទិសដៅនៃការវាយប្រហារនេះដែរ។
ក្រុមមន្រ្តីកូរ៉េខាងត្បូង ក៏និយាយដែរថា ការចរចាជាមួយរដ្ឋាភិបាលទីក្រុងវ៉ាស៊ីនតោន បានចាប់ផ្តើមធ្វើឡើងស្តីពីការដាក់ពង្រាយប្រព័ន្ធកាំជ្រួចជឿនលឿនរបស់សហរដ្ឋអាមេរិកហៅថា THAAD ថ្វីបើមានការជំទាស់ប្រឆាំងយ៉ាងខ្លាំងពីប្រទេសចិនក៏ដោយ៕
