បទសម្ភាសន៍ VOA ជាមួយលោកស្រី Elizabeth Becker៖ ការរាយការណ៍អំពីអំពើប្រល័យពូជសាសន៍ក្រោមរបបខ្មែរក្រហម
កំណត់និពន្ធ៖ ការស៊ើបអង្កេត និងរាយការណ៍អំពីអំពើប្រល័យពូជសាសន៍ដែលអាចកើតមានឡើង គឺជាកិច្ចការដ៏មានមហិច្ចតាមួយសម្រាប់អ្នកយកព័ត៌មាន ដែលត្រូវការការជឿទុកចិត្តលើខ្លួនឯងខ្ពស់។ នេះបើយោងតាមការយល់ឃើញរបស់លោកស្រី Elizabeth Becker អ្នកនិពន្ធដែលទទួលបានពានរង្វាន់ និងជាអ្នកយកព័ត៌មានអាមេរិកដ៏ល្បីមួយរូប។ ថ្មីៗនេះ លោកស្រីបានសរសេរអត្ថបទមួយសម្រាប់ Columbia Journalism Review ដោយលាតត្រដាងពីភាពខុសគ្នារវាងសេចក្តីរាយការណ៍អំពីរបបខ្មែរក្រហមចំនួនពីរ ដែលរៀបរៀងឡើងដោយលោកស្រី និងដោយលោក Richard Dudman ដែលជាអ្នកឆ្លងឆ្លើយព័ត៌មានអំពីកិច្ចការបរទេសរបស់រដ្ឋាភិបាលអាមេរិក ក្រោយពេលដែលអ្នកទាំងពីរត្រូវបានអញ្ជើញឲ្យទៅយកព័ត៌មាននៅក្នុងប្រទេសកម្ពុជាកាលពីឆ្នាំ១៩៧៨ ដោយបានសម្ភាសន៍ ប៉ុល ពត។ នៅក្នុងបទសម្ភាសន៍ជាមួយនាង ទែន សុខស្រីនិត នៃ VOA លោកស្រី Elizabeth Becker បានបញ្ជាក់ថា ប្រវត្តិសាស្ត្របានបញ្ជាក់ថា សេចក្តីរាយការណ៍របស់លោកស្រីគឺត្រឹមត្រូវ ដែលថា មេដឹកនាំខ្មែរក្រហមបានប្រព្រឹត្តអំពើសាហាវព្រៃផ្សៃ។ បន្ថែមលើនេះ លោកស្រីក៏បានផ្ញើសារដ៏សំខាន់មួយដល់អ្នកយកព័ត៌មានសព្វថ្ងៃនេះ ឲ្យបន្តស្វែងរកការពិតជុំវិញឧក្រិដ្ឋកម្មបែបឃោរឃៅ ដែលអាចកើតមានឡើង បើទោះបីជាពិភពលោកមិនចង់ជឿលើអ្វីដែលអ្នកយកព័ត៌មានបានរាយការណ៍ក៏ដោយ។ សូមលោកអ្នកស្តាប់បទសម្ភាសន៍នេះទាំងស្រុងដូចតទៅ៕
