អង្គការឃ្លាំមើលការរំលោភសិទ្ធិមនុស្សឈានមុខមួយបានសម្តែងការព្រួយបារម្ភនៅថ្ងៃពុធនេះចំពោះការបញ្ចូលមេបញ្ជាការកងកម្លាំងប្រដាប់អាវុធកាន់តែច្រើនថែមទៀតទៅក្នុងជួរគណៈកម្មការដឹកនាំរបស់គណបក្សប្រជាជនកម្ពុជាដែលកាន់អំណាចយូរ។
អង្គការដែលមានមូលដ្ឋាននៅក្នុងក្រុងញូវយ៉ក សហរដ្ឋអាមេរិកនេះ បានសរសេរនៅក្នុងសេចក្តីថ្លែងការណ៍របស់ខ្លួននៅថ្ងៃនេះថា ការបញ្ចូលមេបញ្ជាការកងកម្លាំងប្រដាប់អាវុធ ដែលទទួលរងការរិះគន់ទាំងនេះ នឹងធ្វើឲ្យប៉ះពាល់ដល់ផលប្រយោជន៍នៃការគោរពសិទ្ធិមនុស្ស និងទំនាស់ផលប្រយោជន៍»នៅក្នុងការបំពេញការងាររបស់ពួកគេ។
យ៉ាងហោចណាស់មានមន្ត្រីជាន់ខ្ពស់កងកម្លាំងប្រដាប់អាវុធចំនួន៨០នាក់ ក្នុងជួរយោធា នគរបាលនិងកងរាជអាវុធហត្ថ ត្រូវបានបញ្ចូលជាសមាជិកថ្មីក្នុងគណៈកម្មាធិការកណ្តាលនៃគណបក្សប្រជាជនកម្ពុជាក្នុងឱកាសសមាជវិសាមញ្ញនៃគណបក្សនេះកាលពីថ្ងៃទី១ខែកុម្ភៈ។
គណៈកម្មាធិការកណ្តាលនេះគឺជាអង្គការនយោបាយកំពូលរបស់គណបក្សដែលមានសិទ្ធិសម្រេច និងដាក់ផែនការយុទ្ធសាស្ដ្រសម្រាប់ការអនុវត្ត។
ក្នុងចំណោមមន្ត្រីជាន់ខ្ពស់នៃកងកម្លាំងប្រដាប់អាវុធនេះរួមមានលោក ម៉ក់ ជីតូ អគ្គស្នងការរងនគរបាលជាតិ លោក ស្រ៊ុន សារឿន អគ្គមេបញ្ជាការរងកងទ័ព លោក ហ៊ីង ប៊ុនហៀង មេបញ្ជាការកងអង្គរក្សលោកនាយករដ្ឋមន្ត្រី ហ៊ុន សែន លោក ឈិន ចន្ទ័ពណ៌ មេបញ្ជាការរងកងរាជអាវុធហត្ថលើផ្ទៃប្រទេស លោក រ័ត្ន ស៊្រាង បញ្ជាការកងរាជអាវុធហត្ថរាជធានីភ្នំពេញ លោក ជួន សុវណ្ណ ស្នងការនគរបាលរាជធានីភ្នំពេញ និងលោក ប៉ា សុជាតិវង្ស អភិបាលក្រុងភ្នំពេញ។
អង្គការ Human Rights Watch សរសេរក្នុងសេចក្តីថ្លែងការណ៍របស់ខ្លួនថា មន្ត្រីទាំងនេះបានចូលរួមក្នុង«ការរំលោភសិទ្ធិមនុស្សធ្ងន់ធ្ងរ និងពួកគេទទួលខុសត្រូវចំពោះប្រវត្តិសាស្រ្តនៃការរំលោភសិទ្ធិមនុស្ស រួមទាំងការប្រើប្រាស់កម្លាំងហួសហេតុក្នុងការសម្លាប់បាតុករ ឬបណ្តេញប្រជាពលរដ្ឋដោយបង្ខំចេញពីលំនៅដ្ឋាន ការធ្វើឃាតបែបនយោបាយនិងការសម្លាប់ និងការធ្វើទារុណកម្ម ការបង្ខាំងមនុស្ស ការរំលោភនិងការជួញដូរមនុស្ស»។
អង្គការដដែលលើកឡើងថា ច្បាប់ស្តីពីកងកម្លាំងប្រដាប់អាវុធរបស់ប្រទេសកម្ពុជា និងច្បាប់ស្តីពីគណបក្សនយោបាយតម្រូវឲ្យកងកម្លាំងប្រដាប់អាវុធស្ថិតនៅអព្យាក្រិត្យចំពោះនយោបាយ។
លោក Brad Adams នាយកអង្គការ Human Rights Watch ប្រចាំតំបន់អាស៊ី មានប្រសាសន៍នៅក្នុងសេចក្តីថ្លែងការណ៍នោះថា «កាន់តំណែងជាន់ខ្ពស់ក្នុងគណបក្សកាន់អំណាចរបស់ប្រទេសកម្ពុជាគឺជាវិធីងាយស្រួលគេចវ៉េសពីយុត្តិធម៌ ក្រោយពីបានប្រព្រឹត្តការរំលោភសិទ្ធិមនុស្ស»។
លោកឈាង វុន តំណាងរាស្ដ្រ និងជាសមាជិកថ្មីនៃគណៈកម្មាធិការកណ្តាលគណបក្សប្រជាជនកម្ពុជា បានឆ្លើយតបទៅវិញថា គណបក្សរបស់លោកមិនប្រព្រឹត្តខុសច្បាប់ទេនៅក្នុងការបញ្ចូលបញ្ជាការកងប្រដាប់អាវុធនៅក្នុងគណបក្សនោះ។ ហើយមន្ត្រីកងកម្លាំងប្រដាប់អាវុធទាំងនោះមានសិទ្ធិចូលរួមចំណែកក្នុងនយោបាយ។
«ចាត់តាំងអ្នកណាក៏ដោយនៅក្នុងគណៈកម្មាធិការកណ្តាលគឺមិនខុសច្បាប់ទេ។ យើងមានការសោកស្តាយត្រង់ថា Human Rights Watch អួតខ្លួនថា ជាអ្នកការពារសិទ្ធិមនុស្ស ឥឡូវគាត់ចង់បំបិទសិទ្ធិធម្មនុញ្ញរបស់កងទ័ព របស់ប៉ូលិស។ ទី២នៅពេលដែលគាត់និយាយថា អាចលើកទឹកចិត្តឲ្យមានអំពើហិង្សានោះ សូមប្រាប់គាត់វិញថា នៅពេលដែលគេថែរក្សាសណ្តាប់ធ្នាប់សង្គម ថែរក្សាស្ថានភាពល្អសម្រាប់ការរស់នៅល្អរបស់ប្រជាពលរដ្ឋ នៅផ្លូវវ៉េងស្រេងមានដុតរហូតដល់ពេទ្យឯណោះ ហើយបើគាត់យល់ថា នេះជាការបិទសិទ្ធិប្រជាពលរដ្ឋ រឿងនៅស្រុកគាត់មានច្រើនណាស់»។
ទោះជាបែបនេះក្តី លោក អ៊ូ វីរៈ នាយកវេទិកាអនាគតដែលជាមជ្ឈមណ្ឌលស្រាវជ្រាវគោលនយោបាយមួយ បានលើកឡើងថា ការក្តោបយកមន្ត្រីដឹកនាំរដ្ឋអំណាច និងមន្ត្រីប្រដាប់អាវុធគឺជាយុទ្ធសាស្ដ្រមួយរបស់គណបក្សកាន់អំណាចសម្រាប់ក្តោបក្តាប់ និងត្រួតត្រា។ លោកបានផ្តល់ឧទាហរណ៍ករណីលោកឌិត មន្ទីរ ដែលជាប្រធានតុលាការកំពូលផង ជាសមាជិកនៃឧត្តមក្រុមប្រឹក្សានៃអង្គចៅក្រមផង ដែលជាស្ថាប័នធានានូវឯករាជ្យភាពរបស់តុលាការផង ហើយគាត់ក៏ជាសមាជិកលេខ១៩នៃគណៈកម្មការអចិន្ត្រៃយ៍ផង។
«ដូច្នេះគាត់មានអំណាចខ្ពស់នៅក្នុងគណបក្ស។ មែនទែន ការពង្រឹងយោធា ប៉ូលិស និងតុលាការក្រោមអំណាចរបស់ខ្លួនគឺ(ពួកគេ)ធ្វើអីក៏មិនអាចប៉ះបានដែរ។ ពីដើមមកឲ្យតែអ្នកណាមានតួនាទីធំនៅក្នុងគណបក្សគឺមាននិទណ្ឌភាព ហើយចង់ធ្វើអីក៏បានដែរ។ នេះជាមូលដ្ឋានដែលបណ្តាលឲ្យមាននិទណ្ឌភាពច្រើន»។
ទោះជាយ៉ាងណា អង្គការ Human Rights Watch ទទូចឲ្យប្រទេសម្ចាស់ជំនួយដល់ប្រទេសកម្ពុជាជំរុញឲ្យប្រទេសនេះបញ្ឈប់ទម្លាប់ធ្វើការតែងតាំងប្រព័ន្ធប្រដាប់អាវុធខាងលើ៕
