ចាប់ពីថ្ងៃទី១៤ខែកញ្ញានេះរហូតដល់ថ្ងៃទី២ខែវិច្ឆិកា ក្រុមសម្តែងសិល្បៈសៀកកាយសម្ព័ន្ធដ៏ល្បីល្បាញរបស់កម្ពុជានឹងបង្ហាញទេពកោសល្យរបស់ខ្លួនដល់ទស្សនិកជននៅសហរដ្ឋអាមេរិកជាលើកដំបូងបង្អស់។
អស់រយៈពេលជាង១០ឆ្នាំកន្លងទៅនេះ ក្រុមសម្តែងសិល្បៈសៀកកាយសម្ព័ន្ធរបស់អង្គការហ្វាពន្លឺសិល្បះបានសម្តែងទេពកោសល្យខាងសៀកកាយសម្ព័ន្ធរបស់ខ្លួននៅតាមប្រទេសជាច្រើននៅក្នុងតំបន់អាស៊ី និងអឺរ៉ុប ហើយត្រូវបានទទួលស្គាល់ និងកោតសរសើរនៅទូទាំងពិភពលោក។ ក៏ប៉ុន្តែនេះគឺជាលើកទីមួយហើយដែលក្រុមសម្តែងសៀកកាយសម្ព័ន្ធរបស់អង្គការហ្វាពន្លឺសិល្បៈមកសម្តែងជូនទស្សនិកជននៅសហរដ្ឋអាមេរិក។
លោក ហ៊ួត តារា ដែលជាប្រធានផលិតកម្មនៃអង្គការហ្វាពន្លឺសិល្បៈ បានឲ្យដឹងថា ក្រុមសៀករបស់លោកអាចមកសម្តែងសៀកកាយសម្ព័ន្ធលើកទីមួយនៅសហរដ្ឋអាមេរិកនេះ ដោយសារតែសារមន្ទីរ Ringling ដ៏ចំណាស់មួយរបស់សហរដ្ឋអាមេរិកបានរៀបចំកម្មវិធីពិសេសមួយសម្រាប់សារមន្ទីរស្តីពីសិល្បៈអាស៊ី ហើយក៏បានអញ្ជើញក្រុមសម្តែងសៀកកាយសម្ព័ន្ធរបស់លោកឲ្យចូលរួមសម្តែងទេពកោសល្យជាមួយនឹងអ្នកសម្តែងសិល្បៈផ្សេងៗដែលមកពីប្រទេសនានា ដូចជាប្រទេសចិន ប្រទេសកូរ៉េ និងប្រទេសជប៉ុនជាដើម។
«ពួកយើងចង់ពាំនាំនូវអ្វីដែលជាភាពអស្ចារ្យរបស់ទេពកោសល្យយុវជន យុវនារីកម្ពុជា ដែលជាសិល្បៈករជំនាន់ក្រោយ មកបង្ហាញ និងឲ្យទស្សនិកជននៅសហរដ្ឋអាមេរិកនេះបានទទួលស្គាល់ និងស្ងើចសរសើរ»។
លោកតារាក៏បានបន្ថែមថា នេះគឺជាឱកាសមួយដ៏កម្រដែលក្រុមសៀកកាយសម្ព័ន្ធរបស់លោកធ្លាប់ទទួលបាន។ ហេតុដូច្នេះ លោកក៏បានទាក់ទងទៅដៃគូសហការរបស់លោកនៅសហរដ្ឋអាមេរិក ដើម្បីរៀបចំកម្មវិធីសម្តែងសៀកកាយសម្ព័ន្ធជូនទស្សនិកជននៅអាមេរិកក្នុងរូបភាពធំជាងនេះ។
«យើងឆ្លៀតក្នុងឱកាសនេះ ដើម្បីធ្វើការជាមួយនឹងដៃគូ និង Sponsors (អ្នកធានា)ផ្សេងទៀត ដើម្បីពាំនាំនូវទស្សនីយភាព «Khmer Metal» ទៅកាន់រដ្ឋផ្សេងៗទៀតនៅសហរដ្ឋអាមេរិកផងដែរ»។
រឿង«Khmer Metal» ឬ «លោហធាតុខ្មែរ» របស់ក្រុមសម្តែងសៀកកាយសម្ព័ន្ធហ្វាពន្លឺសិល្បៈនេះឆ្លុះបញ្ចាំងទិដ្ឋភាពសង្គមបច្ចុប្បន្នរបស់យុវជនកម្ពុជាដែលភ្លើតភ្លឺននឹងការសប្បាយនៅក្នុងក្លិបកម្សាន្តមួយ។ ការសម្តែងនេះមានចម្រុះទៅដោយសៀកកាយសម្ព័ន្ធដ៏ប៉ិនប្រសព្វ និងឈុតឆាកកម្លែងផ្សេងៗ។
ក្នុងការសម្តែងរឿង«Khmer Metal»កន្លងមកនៅកម្ពុជា អ្នកទស្សនាដែលមានវ័យកណ្តាលពេញចិត្ត និងការកោតសរសើរការសម្តែងនេះ។ ក៏ប៉ុន្តែអ្នកចាត់ចែងក៏មានក្តីបារម្ភផងដែរអំពីអារម្មណ៍របស់កុមារតូចៗទាក់ទងនឹងខ្លឹមសារនៃសាច់រឿងនេះ។ នេះបើយោងតាមការបញ្ជាក់របស់លោកហ៊ួត តារា។
«គាត់បារម្ភក្មេងតូចៗ ដោយសារតែប្រធានបទរបស់វាសំខាន់សម្រាប់មនុស្សធំ។ ដូច្នេះ នៅទីតាំងសម្តែងមួយចំនួន ដូចជាសាលមហោស្រពសហគមន៍ Thomas Jefferson នៅរដ្ឋ Virginia គាត់បារម្ភពីចំណុចនេះ។ យើងនឹងសម្តែងដែលមិនមែន Khmer Metal គឺសម្តែងជារបៀបមានសាច់រឿងខ្លះពាក់ព័ន្ធនឹងកម្ពុជា ដែលយើងដាក់ឈ្មោះថា បារ៉េ»។
ការបកស្រាយរបស់នាងពិន ភូណាំ សិល្បៈការិនីសម្តែងសៀកកាយសម្ព័ន្ធដ៏ឆ្នើមម្នាក់ បានឲ្យដឹងថា ការសម្តែង«បារ៉េ»នេះគឺជាការសម្តែងមួយ ដែលឆ្លុះបញ្ចាំងពីជីវភាពរស់នៅប្រចាំថ្ងៃរបស់ប្រជាពលរដ្ឋខ្មែរសាមញ្ញធម្មតានៅតាមភូមិ។
«ការសម្តែង«បារ៉េ»នេះគឺជាការសម្តែងដែលនិយាយអំពី នៅក្នុងភូមិមួយនៅស្រុកខ្មែរ ប្រជាជនភ្ញាក់ពីគេង ទៅដាក់បាតលោក មានលោកសង្ឃ មានស្វា មាននាងមច្ឆាជាដើម។ និយាយទៅគឺមានលក្ខណៈបែបខ្មែរតែម្តង។ អត់មានអីត្រូវបារម្ភពី ដូចថា ខ្លឹមសារវាថា ក្មេង ឬក៏មនុស្សមើលបាន ឬអត់ទេ»។
ក្រៅពីការសម្តែងនៅក្នុងកម្មវិធីសិល្បៈអន្តរជាតិនៃសារមន្ទីរ Ringling ក្រុមសម្តែងសៀកកាយសម្ព័ន្ធរបស់អង្គការហ្វាពន្លឺសិល្បៈនឹងធ្វើសិក្ខាសាលាតាមសាលារៀន និងសាកលវិទ្យាល័យផ្សេងៗនៅសហរដ្ឋអាមេរិក ដើម្បីផ្ញើជូនសារនៃក្តីសង្ឃឹមរបស់យុវជនកម្ពុជា ដែលជួបនឹងវាសនាអកុសល ដូចជាសមាជិកអ្នកសម្តែងរបស់ហ្វាពន្លឺសិល្បៈមួយចំនួនកាលពីមុនដែរ ជូនដល់ទស្សនិកជនជាតិអាមេរិក និងជាពិសេសគឺសហគមន៍ខ្មែរអាមេរិកតែម្តង។
លោក ហ៊ួត តារា បានបកស្រាយអំពីគោលបំណងនៃការធ្វើសិក្ខាសាលានេះថា៖ «គោលបំណងគឺដើម្បីភ្ជាប់ទំនាក់ទំនងរវាងយុវជនកម្ពុជា និងយុវជននៅអាមេរិក ឲ្យមានទំនាក់ទំនងគ្នាកាន់តែច្រើនទៅថ្ងៃអនាគត និងនាំមកនូវសារទាំងឡាយ នូវថាមពលដ៏វិជ្ជមានរបស់យុវជនកម្ពុជា របស់ហ្វា និងសារនូវក្តីសង្ឃឹម និងការខិតខំប្រឹងប្រែងរបស់គាត់ ដែលគាត់បានជោគជ័យរហូតមកដល់ថ្ងៃនេះ គឺដើម្បីចែករំលែកទៅដល់យុវជនដទៃទៀតនៅទីនេះ និងនៅជុំវិញពិភពលោកទាំងអស់»។
បច្ចុប្បន្ននេះ ក្រុមសម្តែងសៀកកាយសម្ព័ន្ធរបស់ហ្វាពន្លឺសិល្បៈកំពុងតែស្ថិតនៅទីក្រុង Long Beach រដ្ឋកាលីហ្វ័រញ៉ា ដើម្បីហាត់សម និងត្រៀមខ្លួនសម្រាប់ការសម្តែងនៅថ្ងៃដំបូងគឺនៅថ្ងៃទី២០ ខែកញ្ញាខាងមុខនេះ។ យោងតាមលោកហ៊ួត តារាឲ្យដឹងថា សហគមន៍ខ្មែរនៅរដ្ឋកាលីហ្វ័រញ៉ាបានទទួលស្វាគមន៍ក្រុមសម្តែងរបស់ហ្វាយ៉ាងកក់ក្តៅ។
សម្រាប់នាងពិន ភូណាំវិញ ការទទួលស្វាគមន៍ដ៏កក់ក្តៅនេះគឺជាកត្តាលើកទឹកចិត្តមួយឲ្យនាង និងក្រុមសម្តែងរបស់នាង ខិតខំបញ្ចេញទេពកោសល្យរបស់ខ្លួនកាន់តែល្អជាងមុន។ នាងភូណាំសង្ឃឹមថា នឹងទទួលបានការគាំទ្រ និងការកោតសរសើរពីទស្សនិកជននៅសហរដ្ឋអាមេរិកនេះដូចនៅកម្ពុជាដែរ។
«ប្រជាជនដែលគាត់បានមកមើល គឺគាត់មើលហើយ គឺពេញចិត្តតែម្តង គឺគាត់ស្ងើចសរសើរថា យើងអស្ចារ្យ ហើយគាត់មិននឹងស្មានថា កូនខ្មែរអាចធ្វើបាន។ អញ្ចឹងហើយបានជាខ្ញុំសង្ឃឹមថា នៅស្រុកអាមេរិកក៏មិនសូវជាខុសគ្នាប៉ុន្មានដែរ។ ខ្ញុំសង្ឃឹមថា ក្រោយពេលដែលគាត់បានមើលការសម្តែងហើយ គាត់ប្រាកដជាពេញចិត្ត ហើយយើងនឹងរង់ចាំមើល ថាតើគាត់នឹងឲ្យសារអ្វីត្រឡប់មកយើងវិញនៅក្នុងការកែប្រែ ដើម្បីឲ្យការសម្តែងរបស់យើងបានល្អជាងមុន»។
បន្ទាប់ពីការសម្តែងនៅតាមទីកន្លែងផ្សេងៗនៅរដ្ឋកាលីហ្វ័រញ៉ា និងនៅក្នុងកម្មវិធីសិល្បៈអន្តរជាតិរបស់សារមន្ទីរ Ringling ក្រុមសម្តែងសៀកកាយសម្ព័ន្ធរបស់ហ្វាពន្លឺសិល្បៈនឹងធ្វើដំណើរមកកាន់រដ្ឋ Virginia និងរដ្ឋធានីវ៉ាស៊ីនតោន ដើម្បីបន្តការសម្តែងទេពកោសល្យរបស់ខ្លួនរហូតដល់ថ្ងៃទី២ ខែវិច្ឆិកាខាងមុខនេះ៕
