សហភាពអឺរ៉ុបបានស្នើសុំឱ្យគណៈកម្មាធិការជាតិរៀបចំការបោះឆ្នោត (គ.ជ.ប) ធានាថា ច្បាប់បោះឆ្នោតថ្មីនឹងមិនត្រូវបានគេប្រើប្រាស់ ដើម្បីដាក់ទោសទណ្ឌគណបក្សនយោបាយ និងរឹតត្បិតប្រតិបត្តិការរបស់អង្គការសង្គមស៊ីវិលទេ។
លោក Silvio Gonzato ប្រធានក្រុមបេសកកម្មការងាររបស់សហភាពអឺរ៉ុបបានបញ្ជាក់ក្នុងសន្និសីទកាសែតពេលបញ្ចប់បេសកកម្មនៅថ្ងៃសុក្រនេះថា នៅក្នុងជំនួបជាមួយ គ.ជ.ប នាពេលកន្លងមក លោកបានសុំឱ្យស្ថាប័នបោះឆ្នោតនេះធានាថា ច្បាប់នេះនឹងមិនប្រើប្រាស់នាំឱ្យមានការរឹតត្បិតលើប្រតិបត្តិការរបស់អង្គការសង្គមស៊ីវិលក្នុងការទទួលបានព័ត៌មានអ្នកបោះឆ្នោត និងការសង្កេតមើលដំណើរការបោះឆ្នោតទេ។
លោក Silvio Gonzato ក៏សុំឱ្យគ.ជ.ប ធានាថា គេមិនត្រូវប្រើច្បាប់នេះ ដើម្បីដាក់ទោសទណ្ឌលើគណបក្សទាំងមូល ដោយសារតែទង្វើមិនល្អរបស់បុគ្គលម្នាក់នោះទេ។
«យើងសុំឱ្យមានការធានាថា បើសិនជាកំហុសអាកប្បកិរិយារបស់សមាជិកម្នាក់នៃគណបក្សមួយមិនគួរត្រូវបានគេយកទៅប្រើប្រាស់ដាក់ទោសគណបក្សមួយទាំងមូលទេ។ គណបក្សមួយមិនអាចទៅទទួលខុសត្រូវទាំងស្រុងលើទង្វើរបស់បុគ្គលមួយ ដែលស្ថិតនៅក្នុងគណបក្សនោះឡើយ»។
គ.ជ.បបានធានាថា អ្វីដែលជាការព្រួយបារម្ភរបស់សហគមន៍អឺរ៉ុបនឹងមិនកើតមានឡើងទេ។ នេះបើតាមការបញ្ជាក់របស់លោក Silvio Gonzato ប៉ុន្តែលោកថា៖
«ប៉ុន្តែបញ្ហាពិស្តានោះគឺអាស្រ័យទៅលើការសរសេរអត្ថបទជាក់ស្តែងនៅក្នុងបទបញ្ជារបស់ គ.ជ.ប ក៏ដូចជាការអនុវត្តបទបញ្ជារបស់ គ.ជ.ប ដែលនឹងអនុម័តក្នុងពេលខាងមុខ»។
ក្នុងពេលកន្លងមកអ្នកឃ្លាំមើលការបោះឆ្នោតបានទាមទារឱ្យ លុបចោលមាត្រាមួយចំនួនក្នុងច្បាប់បោះឆ្នោតជ្រើសតាំងតំណាងរាស្ត្រ ដោយអះអាងថា ប៉ះពាល់ដល់សិទ្ធិជាមូលដ្ឋានដែលមានចែងក្នុងរដ្ឋធម្មនុញ្ញ៕
