យោងតាមអ្នកវិទ្យាសាស្រ្តនៃសាកលវិទ្យាល័យ London School of Hygiene and Tropical Medicine ការកាប់បំផ្លាញព្រៃឈើក្នុងប្រទេសម៉ាឡេស៊ីកំពុងតែបង្កឲ្យមានការកើនឡើងនូវជំងឺគ្រុនចាញ់ប្រភេទម៉្យាងកើតលើមនុស្ស ដែលជាធម្មតាកើតតែលើសត្វតែប៉ុណ្ណោះ។
អ្នកស្រាវជ្រាវបានផ្តោតលើរដ្ឋ Sabah ដែលមានផ្ទៃដី៣០០០គីឡូម៉ែត្រការេក្នុងប្រទេសម៉ាឡេស៊ី ជាមួយនឹងចំនួនប្រជាជន ១២០.០០០នាក់។ ព្រៃឈើជាច្រើនត្រូវបានកាប់បំផ្លាញដើម្បីផលិតប្រេងត្នោតនិងផលិតផលផ្សេងទៀត។
តាមរយៈការប្រើប្រាស់ទិន្នន័យនៅតាមមន្ទីរពេទ្យនិងរូបថតពីលើអាកាស ក្រុមអ្នកវិទ្យាសាស្រ្តបានរកឃើញថា ការប្រែប្រួលទៅលើការប្រើប្រាស់ដីមានទំនាក់ទំនងយ៉ាងជិតស្និទ្ធជាមួយនឹងការកើនឡើងនូវជំងឺគ្រុនចាញ់ប្រភេទម្យ៉ាងកើតលើមនុស្ស ដែលទូទៅកើតតែលើសត្វតែប៉ុណ្ណោះ។ ជំងឺគ្រុនចាញ់នោះមានឈ្មោះថា Plasmodium knowlesi ។
ក្រុមអ្នកស្រាវជ្រាវនិយាយថា ការឆ្លងជំងឺនេះអាចពន្យល់បានថា វាបណ្តាលមកពីការចូលទៅក្នុងព្រៃដែលជាជម្រករបស់សត្វស្វាប្រភេទម៉្យាង និងសត្វមូសដែលចម្លងជំងឺគ្រុនចាញ់នេះ។ អ្នកភូមិជាច្រើនត្រូវបានគេជួលឲ្យកាប់ព្រៃនិងពង្រីកផ្ទៃដីធ្វើកសិកម្ម។
បច្ចុប្បន្ននេះ ជំងឺគ្រុនចាញ់ប្រភេទ Plasmodium knowlesi នេះកើតលើមនុស្សក្នុងតំបន់ជាច្រើនក្នុងប្រទេសម៉ាឡេស៊ីនិងត្រូវបានគេផ្សព្វផ្សាយទូទាំងតំបន់អាស៊ីអាគ្នេយ៍៕
