សហរដ្ឋអាមេរិកនិងកូរ៉េខាងត្បូងបានប្រកាសអំពីផែនការក្នុងការដាក់ពង្រាយប្រព័ន្ធកម្ទេចគ្រាប់មីស៊ីល ដែលហៅកាត់ថា THAAD នៅក្នុងឧបទ្វីបកូរ៉េ ដើម្បីប្រឆាំងទៅនឹងកម្មវិធីផលិតនុយក្លេអ៊ែរនិងគ្រាប់មីស៊ីលបាញ់ឆ្លងទ្វីបដែលនៅតែបន្តរបស់កូរ៉េខាងជើង។
លោកអគ្គមេបញ្ជាការ Thomas Vandal ប្រធានបុគ្គលិកនៃកងកម្លាំងអាមេរិកក្នុងប្រទេសកូរ៉េ និងលោកអនុរដ្ឋមន្ត្រីការពារប្រទេសកូរ៉េខាងត្បូង Ryu Je-seung បានធ្វើការប្រកាសជាផ្លូវការយ៉ាងដូច្នេះ ក្នុងអំឡុងពេលធ្វើសន្និសីទកាសែតរួមមួយក្នុងទីក្រុងសេអ៊ូល នៅថ្ងៃសុក្រនេះ។
លោកអគ្គមេបញ្ជាការ Vandal បានមានប្រសាសន៍យ៉ាងដូច្នេះថា «ការបន្តផលិតគ្រាប់មីស៊ីលបាញ់ឆ្លងទ្វីបនិងអាវុធដែលអាចកម្ទេចបានធ្ងន់ធ្ងររបស់កូរ៉េខាងជើង ដែលផ្ទុយទៅនឹងការប្តេជ្ញារបស់ប្រទេសនេះជាមួយនឹងសហគមន៍អន្តរជាតិ តម្រូវឲ្យក្រុមសម្ព័ន្ធមិត្តរបស់យើងធានាថា យើងអាចរក្សាសមត្ថភាពការពាររបស់យើងនៅចំពោះមុខការគំរាមកំហែងនេះ»។
កាលពីខែកុម្ភៈ បន្ទាប់ពីមានការធ្វើសាកល្បងនុយក្លេអ៊ែរចុងក្រោយបង្អស់របស់កូរ៉េខាងជើងនិងការបាញ់រ៉ុក្កែតចម្ងាយឆ្ងាយដោយប្រើប្រាស់បច្ចេកវិទ្យាគ្រាប់មីស៊ីលបាញ់ឆ្លងទ្វីប រដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងសេអ៊ូល បានចាប់ផ្តើមពិភាក្សាគ្នាអំពីលទ្ធភាពក្នុងការដាក់ពង្រាយប្រព័ន្ធកម្ទេចគ្រាប់មីស៊ីល THAADនេះ។
ប្រព័ន្ធ THAAD នេះត្រូវបានផលិតឡើងដើម្បីចាប់និងកម្ទេចគ្រាប់មីស៊ីលបាញ់ឆ្លងទ្វីប ក្នុងពេលដែលគ្រាប់មីស៊ីលនោះជិតចុះទៅដល់គោលដៅ។ មកទល់នឹងពេលនេះ ប្រព័ន្ធកម្ទេចគ្រាប់មីស៊ីលប្រភេទនេះ ធ្លាប់បង្ហាញប្រសិទ្ធភាពចំពោះការកម្ទេចគ្រាប់មីស៊ីលបាញ់ឆ្លងទ្វីបចម្ងាយខ្លី និងមធ្យមរួចមកហើយ៕
