ការបាញ់គ្រាប់មីស៊ីលរបស់កូរ៉េខាងជើងនៅថ្ងៃអង្គារនេះទំនងជាបានបរាជ័យ នេះបើយោងតាមក្រុមមន្ត្រីកូរ៉េខាងត្បូង។
អ្នកនាំពាក្យម្នាក់របស់ក្រសួងការពារជាតិកូរ៉េខាងត្បូងបានថ្លែងយ៉ាងដូច្នេះថា « គេជឿថា ការព្យាយាមបាញ់គ្រាប់មីស៊ីលបានបរាជ័យ។ យើងកំពុងតែវិភាគនិងត្រួតពិនិត្យយ៉ាងហ្មត់ចត់ទៅលើស្ថានភាពនេះ និងរក្សាជំហរការពារដែនទឹករបស់យើងដដែល»។
ក្រុមមេបញ្ជាការកូរ៉េខាងត្បូងបានចេញសេចក្តីថ្លែងការណ៍មួយថា គ្រាប់មីស៊ីលនោះបានបាញ់កាលពីថ្ងៃច័ន្ទវេលាម៉ោងប្រហែល៥:២០នាទីព្រឹកនៅទីក្រុងកំពង់ផែ Wonsan ដែលស្ថិតនៅប៉ែកខាងកើតនៃប្រទេសកូរ៉េខាងជើង។
កាលពីព្រឹកថ្ងៃដដែលនោះ ប្រព័ន្ធផ្សព្វផ្សាយ NHK របស់ជប៉ុនបានផ្សាយថា រដ្ឋាភិបាលរបស់ខ្លួនបានត្រៀមកងកម្លាំងយោធាក្នុងករណីមានការបាញ់គ្រាប់មីស៊ីល។ ប្រទេសជប៉ុនក៏បានបញ្ជាឲ្យនាវាពិឃាដរបស់ខ្លួនបាញ់កម្ទេចរាល់គ្រាប់ផ្លោងទាំងឡាយណាដែលគំរាមកំហែងដែនដីរបស់ខ្លួនផងដែរ។ មន្ត្រីការពារជាតិកូរ៉េខាងត្បូងម្នាក់បាននិយាយថា រដ្ឋាភិបាលក្រុងសេអ៊ូលបានត្រៀមខ្លួនរួចរាល់សម្រាប់ការប្រយុទ្ធគ្នា។
ក្រុមមន្ត្រីទាំងនោះមិនបានបញ្ជាក់ឲ្យច្បាស់អំពីប្រភេទគ្រាប់មីស៊ីលនោះទេ ប៉ុន្តែសេចក្តីរាយការណ៍នានាបានឲ្យដឹងថា គ្រាប់មីស៊ីលនោះទំនងជាគ្រាប់មីស៊ីលចម្ងាយមធ្យម Musudan ដែលស្រដៀងគ្នាទៅនឹងប្រភេទគ្រាប់មីស៊ីលដែលកូរ៉េខាងជើងបានព្យាយាមបាញ់ចំនួន៣លើកកាលពីខែមេសា ប៉ុន្តែមិនបានសម្រេចនោះ។
គ្រាប់មីស៊ីលនោះត្រូវបានគេរាយការណ៍ថា មានចម្ងាយប្រមាណពី ៣ពាន់ ទៅ ៤ពាន់គីឡូម៉ែត្រ ហើយប្រសិនបើគេអាចបាញ់គ្រាប់មីស៊ីលនេះដោយជោគជ័យ នោះវានឹងអាចហោះទៅដល់ប្រទេសជប៉ុន ចិន និងតំបន់ Guam។
គ្រាប់មីស៊ីល Musudan នេះគឺត្រូវបានផលិតឡើងដោយយកលំនាំតាមគ្រាប់មីស៊ីលបាញ់ឆ្លងទ្វីបដែលបាញ់ពីនាវាច្រមុជទឹករបស់សូវៀត ហើយកូរ៉េខាងជើងបានកែច្នៃវាឲ្យទៅជាគ្រាប់មីស៊ីលបាញ់ពីដីដោយប្រើប្រាស់ឧបករណ៍ចល័តវិញ៕
