រដ្ឋមន្ត្រីការពារជាតិអាមេរិកលោកAsh Carter បានទៅដល់ប្រទេសអ៊ីរ៉ាក់ហើយនៅថ្ងៃច័ន្ទនេះ ដើម្បីពិភាក្សាជាមួយមេបញ្ជាការយោធារបស់លោក និងមេដឹកនាំអ៊ីរ៉ាក់ អំពីរបៀបដែលសហរដ្ឋអាមេរិក អាចបង្កើនការវាយប្រយុទ្ធប្រឆាំងក្រុមសកម្មប្រយុទ្ធរដ្ឋឥស្លាមនៅក្នុងប្រទេសអ៊ីរ៉ាក់និងស៊ីរី ដែលគេតែងហៅកាត់ថា ក្រុមអាយស៊ីស (ISIS) នោះ។
មន្ត្រីជាន់ខ្ពស់ម្នាក់នៃក្រសួងការពារជាតិអាមេរិក ថ្លែងថា«ពលរដ្ឋអ៊ីរ៉ាក់ មិនអៀនប្រៀនក្នុងការស្នើសុំអ្វីដែលពួកគេត្រូវការនោះទេ ហើយឧត្តមសេនីយ៍និងវរសេនីយ៍របស់យើងនៅអង្គុយជាប់ពលរដ្ឋអ៊ីរ៉ាក់តែម្តង»។
ថ្លែងទៅកាន់ក្រុមអ្នកយកព័ត៌មានក្នុងប្រទេសអារ៉ាប់រួម កាលពីថ្ងៃសៅរ៍ លោកAsh Carter បានសម្ដែងជំនឿចិត្តថា សេតវិមាននឹងអនុម័តអនុសាសន៍នានាដែលបានដាក់ជូន។
រដ្ឋមន្ត្រីការពារជាតិអាមេរិករូបនេះបានថ្លែងនៅឯមូលដ្ឋានទ័ពអាកាសAl Dhafra ក្បែររដ្ឋធានីអាប៊ុយដាប៊ី (Abu Dhabi) ថា «យើងកំពុងរកវិធីធ្វើឲ្យបានច្រើនថែមទៀត។ នេះរាប់ចាប់ពីផ្នែកអាកាសដល់ផ្នែកថ្មើរជើង។ លោកអ្នកគួរតែរំពឹងទុកថា នឹងឃើញពួកយើងធ្វើការច្រើនជាងនេះទៀត» ។
ក្រុមយោធាចម្រុះដឹកនាំដោយសហរដ្ឋអាមេរិកបានប្រើប្រាស់មូលដ្ឋានទ័ពអាកាសនេះ ដើម្បីវាយប្រហារតាមអាកាសទៅលើក្រុមរដ្ឋឥស្លាម ព្រមទាំងដើម្បីស៊ើបការណ៍សម្ងាត់ និងប្រតិបត្តិការឃ្លាំមើល និងឈ្លបយកការណ៍ផងដែរ។
ដំណើរទស្សនកិច្ចរបស់រដ្ឋមន្ត្រីការពារជាតិអាមេរិកទៅកាន់តំបន់នេះ ត្រូវបានធ្វើឡើងខណៈដែលសហរដ្ឋអាមេរិកកំពុងពិចារណាបង្កើនចំនួនទ័ពអាមេរិកាំងនៅក្នុងប្រទេសអ៊ីរ៉ាក់ថែមទៀត៕
