កងកម្លាំងរាប់រយនាក់យាមល្បាតក្បែរស្នាក់ការគណបក្សប្រឆាំងនៅព្រឹកថ្ងៃអង្គារ ទី១៤ ខែមិថុនានេះ ចំថ្ងៃដែលលោក កឹម សុខា មិនទៅបង្ហាញខ្លួនតាមដីកាកោះហៅរបស់តុលាការរាជធានីភ្នំពេញ។
លោក កឹម សុខា នៅតែបន្តបដិសេធមិនចូលបង្ហាញខ្លួននៅតុលាការរាជធានីភ្នំពេញជាលើកទី៤ ដោយលោកបានប្រគល់សិទ្ធិឲ្យមេធាវីចំនួនបួនរូប ចូលឆ្លើយសំណួររបស់ចៅក្រម ថាច់ ឡេង ដែលសាកសួរលោកទាក់ទងនឹង«ការបដិសេធមិនព្រមចូលខ្លួន»តាមដីកាសាកសួររបស់តុលាការរាជធានីភ្នំពេញ ដែលបានចេញផ្សាយកាលពីថ្ងៃទី២៦ ខែឧសភាកន្លងទៅនេះ។
ខណៈពេលដែលមានការចោទសួរនៅតុលាការរាជធានីភ្នំពេញ គេសង្កេតឃើញមានកងកម្លាំងសមត្ថកិច្ចប្រមាណជាង១០០០នាក់ ប្រមូលផ្ដុំគ្នានៅផ្លូវ៦០ម៉ែត្រ សង្កាត់ចាក់អង្រែក្រោម ខណ្ឌមានជ័យ នៅចម្ងាយប្រមាណជាង៦០០ម៉ែត្រពីទីស្នាក់ការកណ្ដាលគណបក្សប្រឆាំង កន្លែងដែលលោក កឹម សុខា ស្នាក់នៅតាំងពីថ្ងៃទី២៦ ខែឧសភាមកនោះ។
លោក ខៀវ សុភ័គ អ្នកនាំពាក្យក្រសួងមហាផ្ទៃ បានប្រាប់ VOA ថា ក្រុមកងកម្លាំងដែលឈរជើងនៅផ្លូវ៦០ម៉ែត្រសង្កាត់ចាក់អង្រែក្រោម ខណ្ឌមានជ័យ ក្បែរទីស្នាក់ការកណ្ដាលគណបក្សសង្រ្គោះជាតិនោះ ធ្វើឡើងដើម្បីត្រៀមការពារសណ្ដាប់ធ្នាប់ប្រជាពលរដ្ឋទូទៅ បន្ទាប់ពីក្រសួងទទួលបានដំណឹងថា មានគម្រោងធ្វើបាតុកម្មទ្រង់ទ្រាយធំរបស់អ្នកគាំទ្រគណបក្សសង្រ្គោះជាតិនៅថ្ងៃអង្គារនេះ។
លោកបន្ថែមថា បើទោះបីជាគណបក្សមិនបានការជូនដំណឹងដល់ក្រសួងអំពីគម្រោងហែញ្ញតិ្ត ឬប្រមូលផ្ដុំអ្នកគាំទ្រនៅស្នាក់ការគណបក្សប្រឆាំងយ៉ាងណាក៏ដោយ ក្រសួងបានត្រៀមកងកម្លាំងដើម្បីរក្សាសុវត្ថិភាពប្រជាពលរដ្ឋ។
ប៉ុន្តែលោក អេង ឆៃអ៊ាង អ្នកតំណាងរាស្រ្ត និងជាមន្ត្រីជាន់ខ្ពស់នៃគណបក្សសង្រ្គោះជាតិ បានប្រាប់អ្នកសារព័ត៌មាននៅក្នុងសន្និសីទកាសែតនៅព្រឹកថ្ងៃអង្គារនេះថា គណបក្សរបស់លោកមិនមានគម្រោងធ្វើបាតុកម្មអ្វីទេ តែលោកសង្ឃឹមថា នឹងមានការចរចា ឬ«វប្បធម៌សន្ទនា»ជាមួយនឹងគណបក្សកាន់អំណាចអំពីករណីរបស់លោក កឹម សុខា ដើម្បីបញ្ឈប់បញ្ហាដ៏តានតឹងនេះ។
លោកបន្ថែមថា វាគ្រាន់តែជាការជួបជុំរបស់អ្នកគាំទ្រគណបក្សប្រឆាំងមកពី២៥ខេត្តក្រុងតាមធម្មតា ដើម្បីបន្តផ្តិតមេដៃរបស់ប្រជាពលរដ្ឋ។
លោក សំ សុគង់ មេធាវីម្នាក់ក្នុងចំណោមមេធាវីចំនួនបួនរូប ដែលការពារក្ដីលោក កឹម សុខា បានឲ្យដឹងថា តុលាការត្រូវបញ្ឈប់ការស៊ើបសួរលោក កឹម សុខា ដោយលោកសំអាងលើអភ័យឯកសិទ្ធិសភារបស់លោកប្រធានស្តីទីគណបក្សសង្គ្រោះជាតិនេះ។ លោកមេធាវីបានប្រាប់អ្នកយកព័ត៌មានថា ការមិនបង្ហាញខ្លួនតាមដីកាសាកសួររបស់តុលាការនោះ មិនមែនជាករណីព្រហ្មទណ្ឌនោះទេ។ លោកមេធាវី សំ សុគង់ បានឲ្យដឹងដែរថា តុលាការក្រុងភ្នំពេញនឹងបន្តនីតិវិធីសាកសួរលើករណីលោក កឹម សុខា បន្តទៀត។
កាលពីថ្ងៃច័ន្ទ នៅក្នុងពិធីប្រគល់សញ្ញាប័ត្រជូនដល់និស្សិតសកលវិទ្យាល័យនៅកោះពេជ្រ លោកនាយករដ្ឋមន្រ្តី ហ៊ុន សែន បានថ្លែងថា លោកនឹងមិនបន្ធូរដៃទេ បើសិនមានបាតុកម្មទ្រង់ទ្រាយធំពីគណបក្សសង្រ្គោះជាតិនាពេលខាងមុខ៕
