គណៈកម្មការរៀបចំការបោះឆ្នោតរបស់ប្រទេសថៃនឹងស្នើឱ្យក្រុមប្រឹក្សាធម្មនុញ្ញថៃរំលាយគណបក្ស Move Forward ដែលជាគណបក្សប្រឆាំងចម្បងនៅក្នុងប្រទេស ដោយយោងលើការសន្យារបស់គណបក្សនេះនៅក្នុងយុទ្ធនាការឃោសនាបោះឆ្នោតកាលពីឆ្នាំមុនដែលថានឹងធ្វើវិសោធនកម្មច្បាប់ប្រមាថព្រះមហាក្សត្រ។
របបរាជាធិបតេយ្យរបស់ថៃគឺជាស្នូលរបស់សង្គមនិងត្រូវបានចារទុកនៅក្នុងរដ្ឋធម្មនុញ្ញរបស់ប្រទេស ដោយព្រះមហាក្សត្រឡើងគ្រោងរាជ្យ «ក្នុងតំណែងជាទីគោរពបូជាដ៏ខ្ពង់ខ្ពស់បំផុត»។
គណបក្ស Move Forward របស់ថៃបានឈ្នះអាសនៈភាគច្រើនបំផុតនៅក្នុងការបោះឆ្នោតកាលពីឆ្នាំមុន ដោយមួយផ្នែកគឺបណ្ដាលមកពីការសន្យារបស់គណបក្សនេះនៅក្នុងការធ្វើវិសោធនកម្មច្បាប់ប្រមាថព្រះមហាក្សត្ររបស់ប្រទេស។ ការសន្យាធ្វើដូច្នេះរបស់គណបក្សនេះត្រូវបានគណៈកម្មការរៀបចំការបោះឆ្នោតអះអាងថាជាការប៉ុនប៉ងដើម្បីផ្ដួលរំលំរបបរាជាធិបតេយ្យរបស់ថៃ។
លោក Parit Wacharasindhu អ្នកនាំពាក្យគណបក្ស Move Forward បាននិយាយថា ពួកគេគឺជាជនស្លូតត្រង់ដែលគ្មានបំណងណាមួយនៅក្នុងការផ្ដួលរំលំប្រព័ន្ធប្រជាធិបតេយ្យដែលមានព្រះមហាក្សត្រជាព្រះប្រមុខរដ្ឋនោះទេ៕
វេទិកាបញ្ចេញមតិ