អគ្គលេខាធិការអង្គការអូតង់លោក Jens Stoltenberg បាននិយាយនៅថ្ងៃអង្គារនេះថា លោកមានជំនឿចិត្តថា សហរដ្ឋអាមេរិកនឹងបន្តផ្តល់ការគាំទ្រដល់ប្រទេសអ៊ុយក្រែនជាបន្តទៀត បើទោះបីជាមានការមិនស្រុះស្រួលគ្នារវាងក្រុមសមាជិកសភាសហរដ្ឋអាមេរិក ពីការអនុម័តយល់ព្រមលើថវិកាបន្ថែមទៀតដល់ការប្រឹងប្រែងធ្វើសង្គ្រាមក្នុងប្រទេសអ៊ុយក្រែនយ៉ាងណាក្តី។
ថ្លែងបា្រប់ក្រុមអ្នកសារព័ត៌មាននៅមុនពេលចាប់ផ្តើមកិច្ចប្រជុំរយៈពេល២ថ្ងៃ ជាមួយក្រុមរដ្ឋមន្តីការបរទេសនៃប្រទេសសមាជិកអង្គការអូតង់ក្នុងទីក្រុងព្រុចសែល ប្រទេសបែលហ្ស៊ិក លោក Stoltenberg បានសរសើរដល់អ្វីដែលលោកហៅថា ជាការគាំទ្រផ្នែកយោធាមិនធ្លាប់មានពីមុនមករបស់សម្ព័ន្ធមិត្តអង្គការអូតង់ ដែលបានធ្វើចំពោះអ៊ុយក្រែន ដើម្បីឆ្លើយតបទៅនឹងការឈ្លានពានរបស់រុស្ស៊ី។
លោកថ្លែងថា៖ «ការប្រឈមនៅពេលនេះគឺថា យើងត្រូវការគាំទ្រដែលមានចីរភាព»។
លោកក៏បានហៅការជួយគាំទ្រដល់អ៊ុយក្រែនថាជាកាតព្វកិច្ចរបស់អង្គការអូតង់ និងបាននិយាយថា ជ័យជម្នះរបស់រុស្ស៊ីក្នុងប្រទេសអ៊ុយក្រែន គឺនឹងនាំមកទាំងសោកនាដកម្មដល់អ៊ុយក្រែន និងគ្រោះថ្នាក់ដល់ប្រទេសសមាជិករបស់អង្គការអូតង់ផងដែរ។
លោក Stoltenberg មានកំណត់នឹងជួបជាមួយរដ្ឋមន្ត្រីការបរទេសអាមេរិក លោក Antony Blinken មុនជំនួបកិច្ចប្រជុំថ្នាក់រដ្ឋមន្ត្រីការបរទេសនេះចាប់ផ្តើម។
មន្រ្តីជាន់ខ្ពស់មួយរូបនៃក្រសួងការបរទេសសហរដ្ឋអាមេរិកបានឱ្យដឹងមុនកិច្ចប្រជុំរបស់អង្គការអូតង់ថា សហរដ្ឋអាមេរិកនឹងចូលរួមជាមួយក្រុមសម្ព័ន្ធមិត្តរបស់អង្គការអូតង់ដទៃទៀត ក្នុងការបន្តការតាំងចិត្តយ៉ាងរឹងមាំ ដើម្បីជួយដល់អ៊ុយក្រែនក្នុងការប្រយុទ្ធប្រឆាំងនឹងការឈ្លានពានរបស់រុស្ស៊ី។
ទន្ទឹមនឹងនេះដែរ នៅថ្ងៃពុធស្អែកនេះ លោក Blinken ក៏នឹងដឹកនាំគណៈប្រតិភូអាមេរិកទៅកាន់ប្រទេសម៉ាសេដ្វាន (Macedonia) ដែលជាសមាជិករបស់អង្គការអូតង់ផងដែរ ដែលនឹងរៀបចំកិច្ចប្រជុំថ្នាក់រដ្ឋមន្ត្រីការបរទេស ពីអង្គការសម្រាប់កិច្ចសហប្រតិបត្តិការនិងសន្តិសុខក្នុងតំបន់អឺរ៉ុបឬ OSCE នៅក្នុងរដ្ឋធានីស្កុបជេរបស់ប្រទេសនេះ ក្នុងសប្តាហ៍នេះដែរ។
សហរដ្ឋអាមេរិក នឹងរៀបចំកិច្ចប្រជុំកំពូលរបស់អង្គការអូតង់ ក្នុងរដ្ឋធានីវ៉ាស៊ីនតោន ចាប់ពីថ្ងៃទី៩ដល់១១ខែកក្កដា ឆ្នាំ២០២៤ខាងមុខ។
រីឯប្រទេសអ៊ីរ៉ង់វិញបានថ្លែងថាខ្លួនបានរៀបចំរួចរាល់សម្រាប់ទទួលយកយន្តហោះចម្បាំង Sukhoi SU-35 ដែលផលិតនៅរុស្ស៊ីនិងឧទ្ធម្ភាគចក្រ ស្របពេលដែលអ៊ីរ៉ង់និងរុស្ស៊ីបង្កើតទំនាក់ទំនងយោធាកាន់តែជិតស្និទ្ធជាងមុន។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន Reuters ដែលយោងលើការបញ្ជាក់របស់អនុរដ្ឋមន្ត្រីការពារជាតិអ៊ីរ៉ង់ប្រាប់ទីភ្នាក់ងារសារព័ត៌មាន Tasnim នៅថ្ងៃអង្គារនេះ។
កងទ័ពជើងអាកាសអ៊ីរ៉ង់មានយន្តហោះចម្បាំងតែប៉ុន្មានសិបគ្រឿងប៉ុណ្ណោះ ដែលក្នុងនោះរួមមានទាំងយន្តហោះចម្បាំងដែលផលិតនៅរុស្ស៊ីនិងយន្តហោះចម្បាំងប្រភេទចាស់ផលិតនៅសហរដ្ឋអាមេរិកដែលខ្លួនទទួលបានមុនសម័យបដិវត្តន៍ឥស្លាមឆ្នាំ ១៩៧៩ ផងដែរ។
អនុរដ្ឋមន្ត្រីការពារជាតិអ៊ីរ៉ង់លោក Mehdi Farahi បាននិយាយថា៖ «ផែនការត្រូវបានរៀបចំរួចរាល់សម្រាប់យន្តហោះចម្បាំង Sukhoi Su-35 ឧទ្ធម្ភាគចក្រចម្បាំង Mil Mi-28 និងយន្តហោះហ្វឹកហាត់ Yak-130 នៅក្នុងការបញ្ចូលទៅក្នុងកងកម្លាំងប្រយុទ្ធរបស់កងទ័ពអ៊ីរ៉ង់»។
សេចក្ដីរាយការណ៍របស់ទីភ្នាក់ងារសារព័ត៌មាន Tasnim មិនបានលើកឡើងអំពីការបញ្ជាក់អះអាងណាមួយពីភាគីរុស្ស៊ីរឿងកិច្ចព្រមព្រៀងនេះទេ។
នៅក្នុងស្ថានការណ៍វិវត្តន៍ដាច់ដោយឡែកពីនេះ ប្រធានាធិបតីអ៊ីរ៉ង់លោក Ebrahim Raisi នឹងមិនធ្វើទស្សនកិច្ចទៅកាន់ទីក្រុងអង់ការ៉ានៃប្រទេសតួកគីនៅថ្ងៃអង្គារនេះដូចដែលបានប្រកាសពីមុននោះ ទេ។ នេះបើតាមការបញ្ជាក់របស់ខុទ្ទកាល័យប្រធានាធិបតីតួកគីចំពោះទីភ្នាក់ងារសារព័ត៌មាន AFP ដោយមិនមានផ្ដល់មូលហេតុណាមួយ។
ដំណើរទស្សនកិច្ចនេះត្រូវបានប្រធានាធិបតីតួកគីលោក Recep Tayyip Erdogan ប្រកាសកាលពីដើមខែនេះ ដោយលោកបាននិយាយថា លោកនឹងលោក Raisi នឹងផ្ដោតលើការបង្កើតការឆ្លើយតបរួមគ្នាចំពោះសង្គ្រាមរវាងអ៊ីស្រាអែលនិងក្រុមហាម៉ាស់ (Hamas)៕
ព័ត៌មានខ្លះក្នុងសេចក្តីរាយការណ៍នេះដកស្រង់ពីទីភ្នាក់ងារសារព័ត៌មាន Reuters
