លោក Steven Mnuchin រដ្ឋមន្រ្តីក្រសួងរតនាគារសហរដ្ឋអាមេរិកជឿជាក់ថា ប្រទេសកាន់លទ្ធិប្រជាធិបតេយ្យដែលមានឧស្សាហកម្មជឿនលឿនរបស់ពិភពលោកមាន ភាពងាយស្រួលកាន់តែខ្លាំងឡើងជាមួយវិធីសាស្រ្តសេដ្ឋកិច្ចសាកលរបស់លោកប្រធានាធិបតី ត្រាំ បន្ទាប់ពីជំនួបជាមួយមេដឹកនាំហិរញ្ញវត្ថុសាកលលោក។
លោករដ្ឋមន្រ្តី Mnuchin បានមានប្រសាសន៍កាលពីថ្ងៃសៅរ៍បន្ទាប់ពីជំនួបរយៈពេល២ថ្ងៃជាមួយសមាជិកក្រុមប្រទេសមានឧស្សាហកម្មជឿនលឿនជាងគេទាំង៧នៅលើពិភពលោកហៅកាត់ថា G7 នៅក្នុងទីក្រុង Bari នៃប្រទេសអ៊ីតាលី។ លោកបាននិយាយថា៖ «ពួកមេដឹកនាំមានភាពងាយស្រួលជាងមុននៅពេលសព្វថ្ងៃនេះដែលពួកគេមានឱកាសចំណាយពេលវេលាជាមួយខ្ញុំហើយស្តាប់លោកប្រធានាធិបតី និងឮសារស្តីពីសេដ្ឋកិច្ចរបស់យើង»។
មន្រ្តីមកពីប្រទេស G7 សង្ឃឹមនឹងបានដឹងកាន់តែច្រើនឡើងអំពីផែនការរបស់ប្រធានាធិបតីសហរដ្ឋអាមេរិកដែលពួកគេព្រួយបារម្ភថានឹងធ្វើឲ្យមានឡើងវិញនូវគោលនយោបាយការពារទំនិញនៅក្នុងស្រុក និងបណ្តាលឲ្យមានការដើរថយក្រោយលើបញ្ហានានាដូចជាការធ្វើកំណែទម្រង់ធនាគារនិងការផ្លាស់ប្តូរអាកាសធាតុ។
បន្ទាប់ពីជំនួបនោះ ក្រុមមន្រ្តីមកពីប្រទេសជប៉ុននិងប្រទេសនានាជាសមាជិកសហភាពអឺរ៉ុបនៅតែមានព្រួយកង្វល់អំពីការផ្លាស់ប្តូរសេដ្ឋកិច្ចនៅក្នុងរដ្ឋធានីវ៉ាស៊ីនតោន ជាពិសេសបន្ទាប់ពីលោក Mnuchin បាននិយាយថា សហរដ្ឋអាមេរិករក្សាសិទ្ធិជាអ្នកការពារទំនិញនៅក្នុងស្រុក ប្រសិនបើខ្លួនជឿជាក់ថា ពាណិជ្ជកម្មនោះមិនមានលក្ខណៈសេរីឬត្រឹមត្រូវទេនោះ៕
