នៅខណៈពេលដែលតម្លៃប្រេងធ្លាក់ចុះ ចិនដែលជាប្រទេសនាំចូលប្រេងធំជាងគេនៃពិភពកលោកកំពុងតែទទួលផលចំណេញដោយមធ្យោបាយផ្សេងៗ។ ក៏ប៉ុន្តែក្រុមអ្នកវិភាគនិយាយថា ដរាបណាតម្លៃប្រេងនៅតែធ្លាក់ចុះ គ្រោះថ្នាក់និងបញ្ហាប្រឈមដែលរដ្ឋាភិបាលក្រុងប៉េកាំងជួបប្រទះអាចមានច្រើនជាងមុន។
យោងតាមស្ថិតិរបស់រដ្ឋាភិបាល ការនាំចូលប្រេងរបស់ចិនបានកើនឡើងជិត១០ភាគរយកាលពីឆ្នាំមុន គឺជិតស្មើ២,៣ពាន់លានបារ៉ែល (៣០៨លានតោន)។ ខណៈពេលដែលតម្លៃប្រេងបានធ្លាក់ចុះពីតម្លៃប្រហែល១១៥ដុល្លារក្នុងមួយបារ៉ែលមកនៅត្រឹមតែ៥០ដុល្លារក្នុងសប្តាហ៍នេះ ក្រុមអ្នកនាំចូលកំពុងតែសន្សំបានប្រាក់រាប់សិបពាន់លានដុល្លារ។
ក្រុមមន្រ្តីនិយាយថា ការធ្លាក់ដ៏គំហុកនេះ កំពុងតែផ្តល់ឱកាសល្អសម្រាប់ទីក្រុងប៉េកាំងក្នុងការបង្កើនឃ្លាំងស្តុកប្រេង។ ប្រព័ន្ធផ្សព្វផ្សាយរដ្ឋបានលើកឡើងថា រដ្ឋាភិបាលក៏កំពុងគ្រប់គ្រងតាមដានអត្រាអតិផរណា និងជំរុញឲ្យមានកំណើនសេដ្ឋកិច្ច។
ក៏ប៉ុន្តែ នៅពេលដែលតម្លៃប្រេងនៅតែមានតម្លៃទាប អ្នកខ្លះបានបង្ហាញក្តីបារម្ភអំពីគ្រោះថ្នាក់ដែលអាចកើតមានចំពោះប្រទេសនេះ។
សាស្រ្តាចារ្យជាន់ខ្ពស់នៅសាកលវិទ្យាល័យ University of Newcastle នៃប្រទេសអូស្រ្តាលី លោក Tan Hao មានប្រសាសន៍ថា ហានិភ័យរួមមានការពឹងផ្អែកខ្លាំងជាងមុនទៅលើផលិតផលប្រេង ដែលអាចគំរាមកំហែងបរិស្ថាននៅប្រទេសចិនកាន់តែខ្លាំង ក៏ដូចជាការពឹងផ្អែកជ្រុលលើការនាំចូលប្រេងនិងទ្រព្យសម្បត្តិហិរញ្ញវត្ថុផ្សេងៗដែលពាក់ព័ន្ធនឹងប្រេង។
លោកមានប្រសាសន៍ថា ការធ្លាក់ចុះដ៏គំហុកនេះ ក៏គំរាមរឹតត្បិតការអភិវឌ្ឍបច្ចេកវិទ្យាថាមពលថ្មីៗនៅប្រទេសចិនផងដែរ។
«តាមន័យសេដ្ឋកិច្ច ចិនទទួលផលចំណេញពីការធ្លាក់ចុះខ្លាំងនៃតម្លៃប្រេងនាពេលថ្មីៗនេះ។ ក៏ប៉ុន្តែយើងគួរតែចាំទុកក្នុងចិត្តថា វាក៏មានចំណុចអវិជ្ជមាននៃការធ្លាក់ចុះតម្លៃប្រេងផងដែរ ជាពិសេសផលប៉ះពាល់លើការផ្លាស់ប្តូរថាមពលដែលកំពុងតែកើតមានឡើងក្នុងប្រទេសចិន។»
លោក Tan និងអ្នកវិភាគឯទៀតបានយល់ឃើញថា មធ្យោបាយមួយដែលអាជ្ញាធរអាចជួយបញ្ជៀសបញ្ហានោះ គឺការតម្លើងពន្ធប្រើប្រាស់ប្រេងក្នុងប្រទេសនេះ ទោះបីជាវាពុំមានប្រជាប្រិយភាពក៏ដោយ។ ប្រទេសចិនបានតម្លើងតម្លៃពន្ធប្រេងបីដងចាប់តាំងពីខែវិច្ឆិកា។
លោក Tan មានប្រសាសន៍ថា៖ «បើតាមទ្រឹស្តី វាជារឿងល្អ ពីព្រោះថា បើសិនជាពន្ធដែលតម្លើងក្នុងពេលតម្លៃប្រេងធ្លាក់ចុះនោះ ត្រូវបានប្រើដើម្បីប្រយោជន៍បរិស្ថាន ឬចំណាយលើថាមពលដែលអាចផលិតឡើងវិញ នោះជារឿងល្អ។»
លោកបានបន្ថែមថា ទោះជាយ៉ាងណា នៅមានបញ្ហាមួយ នោះគឺតម្លាភាព។ ពលរដ្ឋក្នុងប្រទេសចិនជាទូទៅបានដឹងតិចតួចណាស់អំពីថាតើរដ្ឋាភិបាលកំណត់អត្រាពន្ធរបៀបណា ហើយតើមូលនិធិត្រូវបានប្រើប្រាស់ដោយរបៀបណាក្រោយពេលប្រមូលបាន។
រដ្ឋាភិបាលចិនបានផ្តល់ឱកាសដ៏តិចតួចសម្រាប់ការពិភាក្សាផ្សេងៗផងដែរ។ យោងតាមសារព័ត៌មាន China Digital Times ដែលចងក្រងឯកសារទាក់ទិននឹងការដាក់បម្រាមលើការបញ្ចេញផ្នែកសារព័ត៌មានរបស់រដ្ឋាភិបាលចិន វេបសាយនៅក្នុងប្រទេសចិនត្រូវបានប្រាប់មិនឲ្យមានការបញ្ចេញយោបល់រឿងការតម្លើងពន្ធដែលត្រូវបានប្រកាសក្នុងសប្តាហ៍នេះ។
អ្នកវិភាគខាងថាមពល លោក Matt Ferchen មានប្រសាសន៍ថា ចិនមានឱកាសគិតអំពីថាតើប្រេងអាចបន្ស៊ីគ្នាយ៉ាងដូចម្តេច រវាងល្បាយថាមពលនិងតម្លៃ។
លោកនិយាយថា៖ «ប៉ុន្តែនាពេលបច្ចុប្បន្ននេះ ខ្ញុំមិនបានឮអំពីគំនិតផ្តួចផ្តើមដ៏មុតមាំណាមួយទេទាក់ទិននឹងបញ្ហានេះ។ អ្វីដែលខ្ញុំឮគឺការស្តុកទុកប្រេងកាន់តែច្រើន។»
លោកបន្ថែមថា តម្លៃប្រេងថោកអាចប្រឈមជាមួយការយល់ឃើញដែលមានជាយូរមកហើយអំពីទំនាក់ទំនងចិនជាមួយប្រទេសដែលសម្បូរទៅដោយវត្ថុធាតុដើម។ ប្រទេសមួយចំនួនដូចជា វេណេស៊ុយអេឡា (Venezuela) ដែលពឹងពាក់លើការនាំចេញប្រេងទៅកាន់សម្ព័ន្ធមិត្តអស់រយៈពេលជាយូរមកហើយដើម្បីផ្គត់ផ្គត់សេដ្ឋកិច្ចរបស់ខ្លួននោះ ឥឡូវនេះ កំពុងសម្លឹងរកជំនួយពីសំណាក់រដ្ឋាភិបាលក្រុងប៉េកាំង។
លោក Matt Ferchen បានបន្ថែមថា៖ «បើសិនពីមុនវាមិនច្បាស់ទេ ឥឡូវវាគួរតែច្បាស់ណាស់ហើយ ដែលថា មានអ្វីម្យ៉ាងកំពុងតែដើរខុស ឬនឹងដើរខុស ជាមួយនឹងការវាយតម្លៃលើទំនាក់ទំនងឈ្នះឈ្នះបន្ថែមប្រភេទនេះ។ ឥឡូវនេះចិនយល់ឃើញថាខ្លួនកំពុងស្ថិតក្នុងចំណុចមួយដ៏លំបាក។»
លោក Ferchen បានបន្តថា ចិនត្រូវតែធ្វើការសម្រេចចិត្តយ៉ាងពិបាកក្នុងការបន្ថែមថវិកាទៅក្នុងប្រទេស វេណេស៊ុយអេឡា ដើម្បីធានាបានថា ខ្លួនអាចបានមកវិញនូវការវិនិយោគរបស់ខ្លួន ឬក៏ត្រូវដើរចេញឲ្យឆ្ងាយពីមិត្តភាពដ៏អនុគ្រោះមួយនេះ។
អ្នកខ្លះជឿជាក់ថា អំណាចក្នុងការចរចារនៃប្រទេសដែលសម្បូរធនធានអាចចុះខ្សោយ ក៏ប៉ុន្តែ ទំនាក់ទំនងរវាងប្រទេសទាំងនេះ ដូចជាចិនជាមួយវេណេស៊ុយអេឡា នឹងនៅតែខ្លាំងដូចមុនពីព្រោះថាប្រទេសទាំងពីរនេះត្រូវការគ្នាទៅវិញទៅមក។
កាលពីដើមខែនេះ ចិនបានធ្វើជាម្ចាស់ផ្ទះនៃកិច្ចប្រជុំមួយជាមួយក្រុមមេដឹកនាំលម្អៀងឆ្វេងនិយមនៃប្រទេសក្នុងទ្វីបអាមេរិកឡាទីន ហើយបានសន្យាផ្តល់ឲ្យពួកគេនូវគម្រោងថ្នាក់តំបន់ដែលមានទឹកប្រាក់ជាច្រើនពាន់លានដុល្លារ។ នៅក្រោយកិច្ចប្រជុំមួយថ្ងៃ ប្រធានាធិបតីនៃប្រទេស វេណេស៊ុយអេឡា លោក Nicolas Maduro បានមានប្រសាសន៍ថា លោកបានទទួលការសន្យាផ្តល់ទឹកប្រាក់២០លានពាន់លានដុល្លារដើម្បីស្រោចស្រង់ប្រទេសរបស់លោកដែលកំពុងជួបបញ្ហា។
មនុស្សមួយចំនួននិយាយថា ការខិតខំប្រឹងប្រែងរបស់ចិនដែលកំពុងតែមានសន្ទុះនៅក្នុងទ្វីបអាមេរិកឡាទីននេះ គឺជាការប៉ុនប៉ងក្នុងការទប់ទល់នឹងឥទ្ធិពលរបស់អាមេរិកនៅក្នុងទ្វីបនោះ។
លោក Yan Xuetong ប្រធានផ្នែកទំនាក់ទំនងការបរទេសនៃសាកលវិទ្យាល័យ Tsingha University នៅទីក្រុងប៉េកាំង មានប្រសាសន៍ថា វាជារឿងពាក់ព័ន្ធជាមួយនឹងការបង្កើនការប្រឡូករបស់ប្រទេសចិន។
លោក Yan មានប្រសាសន៍ថា ហេតុផលដែលចិនកំពុងតែពង្រីកការប្រឡូករបស់ខ្លួនជាមួយទ្វីបអាមេរិកឡាទីន ដែលរួមមានកិច្ចសហប្រតិបត្តិការសេដ្ឋកិច្ចនិងនយោបាយនោះ គឺប្រើប្រាស់ការការប្រឡូកនយោបាយនោះ ដើម្បីពង្រឹងនិងធ្វើឲ្យមានស្ថេរភាពកិច្ចប្រតិបត្តិការសេដ្ឋកិច្ចនៅទីនោះ។
លោក Yan បានបន្ថែមថា ខណៈពេលដែលតម្លៃប្រេងនឹងនៅតែបន្តធ្លាក់ចុះក្នុងឆ្នាំនេះ បណ្តាប្រទេសក្នុងទ្វីបអាមេរិកឡាទីននឹងជួបប្រទះបញ្ហាសេដ្ឋកិច្ចមួយចំនួន។ លោកបាននិយាយថា បើសិនជាគ្មានកម្លាំងជំរុញក្នុងការប្រឡូកផ្នែកនយោបាយនោះទេ សកម្មភាពសេដ្ឋកិច្ចរបស់ចិននៅក្នុងតំបន់នោះនឹងថយចុះ៕
ប្រែសម្រួលដោយ នៀម ឆេង
