សេដ្ឋកិច្ចចិនបានរីកលូតលាស់ក្នុងជំហានដ៏យឺតបំផុតនៅក្នុងរយៈពេល២៤ឆ្នាំ ហើយនិន្នាការនេះត្រូវគេរំពឹងថានឹងបន្តចូលក្នុងឆ្នាំ២០១៥ នេះបើយោងតាមតួលេខថ្មីដែលបានចេញផ្សាយដោយរដ្ឋាភិបាលទីក្រុងប៉េកាំង។
រដ្ឋាភិបាលចិនបាននិយាយនៅថ្ងៃអង្គារនេះថា សេដ្ឋកិច្ចរបស់ខ្លួនបានរីកលូតលាស់ត្រឹមតែ ៧,៤ ភាគរយនៅក្នុងឆ្នាំ២០១៤ ដោយមិនបានបំពេញទៅតាមអត្រានៃការរីកលូតលាស់ដែលបានព្យាករណ៍ទុករបស់ខ្លួនចំនួន ៧,៥ ភាគរយ។
ក្រុមអ្នកវិភាគនិយាយថា អត្រានេះមិនអាក្រក់ប៉ុន្មានទេ ដោយអស់រយៈពេលមួយឆ្នាំដែលមានប្រាក់កម្ចីគេមិនសងច្រើន ឥណទានដួលរលំ ហើយការធ្លាក់តម្លៃអចលនទ្រព្យ។
តម្លៃអចលនទ្រព្យត្រូវបានគេរំពឹងនឹងបន្តធ្វើឲ្យសេដ្ឋកិច្ចធ្លាក់ចុះនៅឆ្នាំ២០១៥ដោយបានធ្វើឲ្យប៉ះពាល់ដល់ផ្នែកផ្សេងៗទៀតរបស់សេដ្ឋកិច្ច។ ក្រុមអ្នកជំនាញព្រួយបារម្មអំពីចាប់ផ្តើមនៃវដ្តអតិផរណា ដែលនឹងធ្វើឲ្យមានការយឺតយ៉ាវដល់តម្រូវការផ្នែកឧស្សាហកម្មជាច្រើនក្នុងប្រទេស។
ធនាគារពិភពលោកបានប្រាប់ឲ្យដឹងថា កាបន្តនៃការរីកចម្រើនយឺតនៃសេដ្ឋកិច្ចរបស់ប្រទេសចិន អាចប៉ះពាល់ដល់ទីផ្សារពិភពលោក ធ្វើឲ្យប៉ះពាល់ភាពវិជ្ជមាននៃកំនើនសកម្មភាពសេដ្ឋកិច្ចក្នុងទីផ្សារពលកម្មរបស់សហរដ្ឋអាមេរិកនិងអង់គ្លេស៕
