គណបក្សសង្គ្រោះជាតិនឹងរៀបចំពិធីបុណ្យបែបពុទ្ធសាសនានៅព្រឹកថ្ងៃអង្គារស្អែកនេះ ដើម្បីសុំឲ្យមានសុខសន្តិភាព ផ្សះផ្សា បង្រួបបង្រួមជាតិពិតប្រាកដ និងសុំកុំឲ្យមានការរំលោភបំពានលើអភ័យឯកសិទ្ធិអ្នកតំណាងរាស្ត្ររបស់គណបក្សប្រឆាំង។ នេះបើយោងទៅតាមសេចក្តីប្រកាសព័ត៌មានរបស់គណបក្សប្រឆាំងដែលបានចេញផ្សាយជាសាធារណៈនៅថ្ងៃច័ន្ទនេះ។
ការត្រៀមធ្វើពិធីបុណ្យសាសនានេះ កើតមានឡើងបន្ទាប់ពីលោក កឹម សុខា ប្រធានស្តីទីគណបក្សប្រឆាំង បានប្រឈមមុខនឹងការចោទប្រកាន់ជាបន្តបន្ទាប់ពីតុលាការកម្ពុជា។
ជាក់ស្តែង កាលថ្ងៃព្រហស្បតិ៍សប្តាហ៍មុននេះ លោក ថាន់ ឡេង ចៅក្រមស៊ើបសួរសាលាដំបូងរាជធានីភ្នំពេញ បានចេញដីកាបង្គាប់ឲ្យចូលខ្លួនដល់លោក កឹម សុខា ពីបទចោទប្រកាន់មួយផ្សេងទៀត គឺបទ «បដិសេធក្នុងការចូលខ្លួន» ប្រព្រឹត្តនៅរាជធានីភ្នំពេញ កាលពីថ្ងៃទី២៦ ខែឧសភា ឆ្នាំ២០១៦ តាមបញ្ញត្តិមាត្រា៥៣៨នៃក្រមព្រហ្មទណ្ឌ។ ក៏ប៉ុន្តែលោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិ បានថ្លែងប្រាប់អ្នកសារព័ត៌មានភ្លាមៗថាលោក កឹម សុខា នឹងមិនចូលខ្លួនតាមការកោះហៅនោះទេ ព្រោះលោក កឹម សុខា អនុប្រធានគណបក្សសង្គ្រោះជាតិ អះអាងថា លោកនៅមានអភ័យឯកសិទ្ធិជាអ្នកតំណាងរាស្ត្រ។
ក្រុមមន្ត្រីនៃគណបក្សធំៗទាំងពីរ ដែលមានអាសនៈនៅក្នុងសភា មានការខ្វែងគំនិតគ្នាអំពីអភ័យឯកសិទ្ធិនៃអ្នកតំណាងរាស្ត្រ ចាប់តាំងពីតុលាការធ្វើការចោទប្រកាន់ និងសម្រេចឃុំខ្លួនមន្ត្រីរបស់គណបក្សប្រឆាំងជាបន្តបន្ទាប់មកនេះ។
លោក ឈាង វុន អ្នកនាំពាក្យក្រុមសមាជិកសភាគណបក្សប្រជាជនកម្ពុជា បានប្រាប់អ្នកសារព័ត៌មាន នៅសភាជាតិ នាថ្ងៃច័ន្ទនេះថា អ្នកតំណាងរាស្ត្រដែលបានប្រព្រឹត្តកំហុស មិនអាចយកអភ័យឯកសិទ្ធិខ្លួនមកការពារកំហុសខ្លួនបានទេ ហើយក៏មិនអាចរំលោភទៅលើការសម្រេចចោទប្រកាន់ពីតុលាការបានដែរ។ លោកបានបន្ថែមថា អ្នកតំណាងរាស្ត្រផ្សេងទៀតក្នុងសភាជាតិ មិនអាចការពារតំណាងរាស្ត្ររូបណាដែលបានធ្វើសកម្មភាពផ្ទុយពីច្បាប់នោះទេ ហើយថារឿងក្តីដែលបានកើតឡើងទៅលើអ្នកតំណាងរាស្ត្រមួយចំនួន គឺជារឿងបុគ្គល។
នៅក្នុងការរៀបចំពិធីបុណ្យតាមបែបព្រះពុទ្ធសាសនាដែលគ្រោងនឹងធ្វើឡើងនៅថ្ងៃអង្គារស្អែកនេះ គណបក្សប្រឆាំងនឹងរៀបចំពិធីសូត្រមន្ត និងប្រគេនចង្ហាន់ដល់ព្រះសង្ឃចំនួន១២៣អង្គ ដើម្បីឧទ្ទិសបួងសួងដល់វត្ថុស័ក្ដិសិទ្ធិក្នុងលោក។
គណបក្សសង្គ្រោះជាតិក៏គ្រោងរៀបចំការជួបជុំមហាជនដោយសន្តិវិធីនៅទីស្នាក់ការកណ្តាលគណបក្សសង្គ្រោះជាតិ ដើម្បីឃ្លាំមើលស្ថានការណ៍នយោបាយនៅថ្ងៃទី១៤ ខែមិថុនា។ នៅមុនថ្ងៃ ទី១៤ ខែមិថុនា គណបក្សប្រឆាំង បានគ្រោងរៀបចំកម្មវិធីចាប់ផ្តើមទទួលញត្តិ និងការសម្តែងមតិរបស់ប្រជាពលរដ្ឋ នៅទីស្នាក់កណ្តាលគណបក្ស សិ្ថតក្នុងសង្កាត់ ចាក់អង្រែលើ ខណ្ឌមានជ័យ រាជធានីភ្នំពេញផងដែរ៕
