ប្រធានាធិបតីសហរដ្ឋអាមេរិក លោក បារ៉ាក់ អូបាម៉ា (Barack Obama) នឹងស្វះស្វែងធ្វើឲ្យមានលំនឹងនូវតួនាទីដឹកនាំរបស់អាមេរិកនៅក្នុងតំបន់អាស៊ីប៉ាស៊ីហ្វិក នៅក្នុងរយៈពេលជាច្រើនឆ្នាំទៅមុខទៀត នៅពេលដែលលោកធ្វើជាម្ចាស់ផ្ទះទទួលស្វាគមន៍មេដឹកនាំប្រជាជាតិអាស៊ីអាគ្នេយ៍ឬអាស៊ានទាំង១០ប្រទេស នៅឯរមណីយដ្ឋាន Sunnylands ក្នុងរដ្ឋកាលីហ្វ័រញ៉ា។
របៀបវារៈនៃកិច្ចប្រជុំនៅថ្ងៃច័ន្ទនិងថ្ងៃអង្គារ នឹងមិនសូវផ្លូវការដូចកិច្ចប្រជុំកំពូលផ្សេង ទៀតទេ នៅឯទីកន្លែងលំហែកាយដ៏គួរឲ្យចាប់ចិត្តនេះ។
ប៉ុន្តែមេដឹកនាំទាំងនេះនឹងដោះស្រាយបញ្ហាដ៏តឹងតែងនិងស្មុគស្មាញជាច្រើន ដែលសំខាន់សម្រាប់ការធ្វើឲ្យមានលំនឹងឡើងវិញរបស់សហរដ្ឋអាមេរិកនៅតំបន់អាស៊ី ប៉ាស៊ីហ្វិក។
សេតវិមានមើលឃើញការចូលប្រឡូករបស់អាមេរិកទៅក្នុងតំបន់នេះ ថាមានសារៈសំខាន់ចំពោះវឌ្ឍនភាពនិងសន្តិសុខក្នុងពេលអនាគតរបស់សហរដ្ឋអាមេរិក។
តំបន់ដ៏ស្វាហាប់និងមានភាពចម្រុះនេះ កំពុងពើបប្រសព្វនឹងកំណើនសេដ្ឋកិច្ចដ៏លឿនខ្លាំងនិងភាពតានតឹងកាន់តែខ្លាំងឡើងផងដែរ ដោយប្រទេសនីមួយៗមានសក្ដានុពលក្នុងការធ្វើឲ្យមានឥទ្ធិពលដល់បញ្ហាសេដ្ឋកិច្ចនិងសន្តិសុខសកលលោក។
មន្ត្រីរដ្ឋាភិបាលអាមេរិកបានឲ្យដឹងថា តាមរយៈការធ្វើជាម្ចាស់ផ្ទះទទួលរៀបចំកិច្ចប្រជុំកំពូលអាស៊ាននេះ លោក អូបាម៉ា សង្ឃឹមថា នឹងបង្កើតផែនការការងារមួយសម្រាប់ឆ្នាំចុងក្រោយនៃអាណត្តិរបស់លោក ដើម្បីបង្កើនកិច្ចប្រឹងប្រែងបន្ថែមទៀត ក្នុងការធ្វើឲ្យមានលំនឹងឡើងវិញនៅក្នុងតំបន់នេះ ហើយក៏ផ្ញើសារមួយដល់រដ្ឋាភិបាលអាណត្តិក្រោយៗទៀតថា គេចាំបាច់ត្រូវការ ការចូលប្រឡូកក្នុងកម្រិតកំពូលដូចគ្នានេះ ដើម្បីឲ្យអាមេរិកធានានិងរក្សាបាននូវតួនាទីរបស់ខ្លួនជាអ្នកដឹកនាំ។
ផែនការការងារនោះ ត្រូវគេរំពឹងថានឹងរួមបញ្ចូលទំនាក់ទំនងកាន់តែជិតស្និទ្ធរវាងភាគីទាំងពីរ ស្តីពីជំនួញនិងពាណិជ្ជកម្ម ចំណងទាក់ទងគ្នារវាងប្រជាជននឹងប្រជាជនកាន់តែច្រើនឡើង និងសហប្រតិបត្តិការបន្ថែមទៀតលើកិច្ចការប្រឆាំងអំពើជ្រុលនិយមដ៏ហិង្សា ហើយនឹងការបង្កើតលក្ខន្តិកនិងគោលការណ៍នានា ដើម្បីតម្រង់ផ្លូវប្រជាជាតិនានាទាក់ទងនឹងបញ្ហាផ្សេងៗ៕
