ស្នងការប៉ូលិសម៉ាឡាវីកំពុងធ្វើការស៊ើបអង្កេតលើមន្ត្រីរបស់ខ្លួនទាក់ទងនឹងការចោទប្រកាន់បៀតបៀនផ្លូវភេទលើបាតុករជាស្ត្រី នៅក្នុងបាតុកម្មក្រោយការបោះឆ្នោតនាពេលថ្មីៗនេះនៅក្នុងរដ្ឋធានីលីឡុងវ៉េ (Lilongwe)។ ការស៊ើបអង្កេតនេះធ្វើឡើង បន្ទាប់ពីអ្នកធ្វើយុទ្ធនាការសិទ្ធិមនុស្សនិយាយថា ពួកគេមានភស្តុតាងនៃការចាប់រំលោភ បៀតបៀនផ្លូវភេទ និងការធ្វើទារុណកម្មលើស្ត្រីនៅក្នុងពេលធ្វើកុបកម្ម។
កុបកម្មមួយបានកើតឡើងនៅក្នុងរដ្ឋធានីលីឡុងវ៉េ ប្រទេសម៉ាឡាវី នៅពេលដែលបាតុករនៅមជ្ឈមណ្ឌល Msundwe Trading Centre រារាំងមិនឲ្យអ្នកគាំទ្រគណបក្សកាន់អំណាចទៅចូលរួមក្នុងការប្រមូលផ្តុំ ដែលលោកប្រធានាធិបតី Peter Mutharika ថ្លែងសុន្ទរកថា។
បាតុករជាស្ត្រីនិយាយថា ប៉ូលិសបានធ្វើឲ្យពួកគេអាម៉ាស់មុខនៅចំពោះមុខកូនៗរបស់ពួកគេ ជនរងគ្រោះម្នាក់និយាយថា៖ «ប៉ូលិសបានវាយយើងយ៉ាងដំណំ រហូតដល់ថ្នាក់យើងមិនអាចដើរបាន។ ប៉ុន្តែនៅពេលយើងមានកម្លាំង និងដើរចេញ ពួកគេបានដើរតាមទៅក្នុងផ្ទះរបស់យើង ហើយបានហែកសំលៀកបំពាក់ និងខោអាវក្នុងរបស់យើង ហើយចាប់ផ្ដើមប៉ះរាងកាយយើងគ្រប់កន្លែង»។
អង្គការ NGO-Gender Coordinating Network ដែលការពារសិទ្ធិស្ត្រីបានសរសេរនៅក្នុងសេចក្ដីថ្លែងការណ៍របស់ខ្លួនថា ខ្លួនបានកត់ត្រាភស្តុតាងដែលទទួលបានពីជនរងគ្រោះមួយចំនួន រួមទាំងក្មេងស្រីបីនាក់ដែលបាននិយាយថា ប៉ូលិសបានរំលោភពួកគេនៅក្នុងផ្ទះពួកគេផងដែរ។
អ្នកធ្វើយុទ្ធនាការសិទ្ធិស្ត្រី រួមមានទាំងសមាគមមេធាវីស្ត្រីម៉ាឡាវី និងមជ្ឈមណ្ឌលធនធានច្បាប់សម្រាប់ស្ត្រី បានធ្វើការតវ៉ានៅតាមផ្លូវនៅក្នុងរដ្ឋធានីលីឡុងវ៉េ ដោយទាមទារឲ្យមានការស៊ើបអង្កេតឲ្យបានដិតដល់ចំពោះបញ្ហានេះ និងមានការចាប់ខ្លួនមន្ត្រីប៉ូលិសពាក់ព័ន្ធជាបន្ទាន់។
ប៉ុន្តែប៉ូលិសនិយាយថា ខ្លួនមិនទាន់អាចចាប់ខ្លួនអ្នកណាម្នាក់បាននោះទេនៅពេលនេះ។
លោក James Kadadzera ជាអ្នកនាំពាក្យរបស់ស្នងការប៉ូលិសម៉ាឡាវីបាននិយាយថា៖ «មានក្រុមស៊ើបអង្កេតដើម្បីពិនិត្យមើលថាតើការចោទប្រកាន់ប្រឆាំងនឹងប៉ូលិសជាការពិតដែរឬទេ។ ប្រសិនបើមានរបាយការណ៍ថា ការចោទប្រកាន់នោះជាការពិត នឹងមានការកំណត់អត្តសញ្ញាណជនសង្ស័យ ហើយឥឡូវនេះជនសង្ស័យទាំងនោះនឹងស្ថិតនៅក្រោមស៊ើបអង្កេត»។
លោក Kadadzera បានបដិសេធមិនបង្ហាញពីការវិវត្តនៃការស៊ើបអង្កេតនោះទេ។
លោកបាននិយាយថា៖ «ខ្ញុំមិនអាចប្រាប់ថាតើការស៊ើបអង្កេតដើរដល់ណាហើយនោះទេ។ យើងនឹងរង់ចាំរហូតទាល់តែក្រុមស៊ើបអង្កេតបញ្ចប់ការងាររបស់ខ្លួន និងចេញរបាយការណ៍ពីការស៊ើបអង្កេតនេះសិន។ របាយការណ៍នឹងបង្ហាញជូនសាធារណជន»។
ប្រទេសម៉ាឡាវីបានប្រឈមមុខនឹងចលនាបាតុកម្មហិង្សា ចាប់តាំងពីពេលដែលលោកប្រធានាធិបតី Peter Mutharika ចូលកាន់តំណែងក្នុងអាណត្តិទី២របស់លោកនៅក្នុងខែឧសភា។ ឥឡូវនេះមេដឹកនាំក្រុមប្រឆាំងកំពុងតតាំងនៅក្នុងតុលាការដើម្បីមោឃភាពការបោះឆ្នោតប្រធានាធិបតីនោះ។
អ្នកវិភាគមានមន្ទិលសង្ស័យទៅលើឯករាជ្យភាពនៃការស៊ើបអង្កេតរបស់ប៉ូលិស។
លោក Vincent Kondowe អ្នកវិភាគនយោបាយម្នាក់បាននិយាយថា ការអនុញ្ញាតឲ្យប៉ូលិសធ្វើការស៊ើបអង្កេតមន្ត្រីរបស់ខ្លួនគឺការខុសឆ្គង។
លោកបាននិយាយថា «ជនដែលត្រូវបានគេសង្ស័យថា ពាក់ព័ន្ធនៅក្នុងបទល្មើសមួយមិនអាចស៊ើបអង្កេតខ្លួនឯងនោះទេ។ ដូច្នេះ ស្ថាប័នរដ្ឋមួយទៀតដែលគ្រប់គ្រងស្ថាប័ននេះគួរតែត្រូវបានគេអំពាវនាវឲ្យធ្វើការស៊ើបអង្កេតលើការចោទប្រកាន់នេះ។ នៅក្នុងករណីនេះ យើងអាចនិយាយបានថាជា គណៈកម្មការសិទ្ធិមនុស្សម៉ាឡាវី ឬគណៈកម្មការបណ្ដឹងរដ្ឋបាល។
លោក Kadadzera ព្យាយាមច្រានចោលការព្រួយបារម្ភខាងលើ។
លោកបាននិយាយថា «ក្រុមស៊ើបអង្កេតនេះនឹងធ្វើការងាររបស់ខ្លួនដោយមិនលម្អៀង។ ប្រសិនបើអ្នកណាម្នាក់មានការសង្ស័យ ហេតុអ្វីបានជាអ្នកណាមិនចូលរួមក្នុងការស៊ើបអង្កេត? គេមិនអាចនិយាយថា ប៉ូលិសមិនបានធ្វើការ ដោយមិនបានមកមើល ឬចូលរួមនោះទេ»។
ទោះជាយ៉ាងណាក្តី អ្នកធ្វើយុទ្ធនាការសិទ្ធិមនុស្សនិយាយថា ពួកគេនឹងធ្វើការស៊ើបអង្កេតដោយផ្ទាល់ ប្រសិនបើការស៊ើបអង្កេតរបស់ប៉ូលិសមិនមានរបាយការណ៍ដែលមានតុល្យភាពមួយ។
ក្នុងពេលនេះ សមាគមមេធាវីស្ត្រីនៅក្នុងប្រទេសម៉ាឡាវីបានផ្តល់ជំនួយផ្នែកច្បាប់ដោយឥតគិតថ្លៃដល់ជនរងគ្រោះ៕
