អ្នកកាសែតអន្តរជាតិមួយក្រុម ដែលកំពុងធ្វើការស្រាវជ្រាវឯកសារបែកធ្លាយពីក្រុមហ៊ុនច្បាប់មួយនៅប្រទេសប៉ាណាម៉ាបានចេញផ្សាយការរកឃើញមួយចំនួនរបស់ពួកគេដែលបង្ហាញពីទំនាក់ទំនងលុយកាក់នៅក្រៅប្រទេសរបស់អ្នកមាន ជនល្បីឈ្មោះ និងអ្នកជាប់ពាក់ពន្ធ័នយោបាយជាច្រើននាក់។
ប្រភពអនាមិកមួយបានផ្តល់ឯកសារចំនួន១១លាន៥សែនឯកសារដែលយកចេញពីក្រុមហ៊ុនច្បាប់ Mossack Fonseca របស់ប្រទេសប៉ាណាម៉ា ទៅឲ្យក្រុមអ្នកកាសែតស៊ើបអង្កេតអន្តរជាតិមួយក្រុមឈ្មោះ International Consortium of Investigative Journalists ហៅកាត់ថា ICIJ មានមូលដ្ឋាននៅក្នុងរដ្ឋធានីវ៉ាស៊ីនតោន។
Ramon Fonseca ស្ថាបនិកម្នាក់នៃក្រុមហ៊ុនរបស់ប៉ាណាម៉ានោះ បានថ្លែងប្រាប់ទីភ្នាក់ងារព័ត៌មានបារាំងថា ការបែកធ្លាយព័ត៌មានដល់អ្នកកាសែតនេះគឺជា «បទឧក្រិដ្ឋដ៏ធ្ងន់ធ្ងរ»
លោកថ្លែងថា «ឯកជនភាព គឺជាសិទ្ធិមនុស្សមូលដ្ឋាន ដែលកំពុងតែសឹករិចរិលកាន់តែខ្លាំងឡើងៗ ក្នុងពិភពលោកសម័យទំនើបនេះ។» លោកបន្តថា «មនុស្សគ្រប់រូប មានសិទ្ធិឯកជនភាពរបស់ខ្លួនមិនថាពួកគេជាស្តេចឬជាអ្នកសុំទាននោះទេ»។
ការដាក់ប្រាក់នៅក្នុងគណនេយ្យក្រៅប្រទេសមិនមែនជាអំពើខុសច្បាប់ទេ ហើយគេអាចធ្វើបែបនេះ ដើម្បីបង្កលក្ខណៈងាយស្រួលដល់ការបង់ពន្ធនិងការរកស៊ីជួញដូរជាលក្ខណៈអន្តរជាតិ។ ប៉ុន្តែ របាយការណ៍របស់ក្រុមអ្នកកាសែតអន្តរជាតិនេះ និយាយថា «ឯកសារទាំងនេះបង្ហាញថាធនាគារ ក្រុមហ៊ុនច្បាប់និងតួអង្គនៅក្រៅប្រទេសផ្សេងទៀតជារឿយៗ បានខកខានមិនបានធ្វើតាមផ្លូវច្បាប់ ក្នុងការធ្វើឲ្យប្រាកដថា អតិថិជនរបស់ខ្លួន មិនជាប់ពាក់ព័ន្ធនឹងសហគ្រាសឧក្រិដ្ឋកម្ម ការគេចពន្ធ និងអំពើពុករលួយនយោបាយ» នោះទេ។
អង្គការសារព័ត៌មានអន្តរជាតិនេះ បានចងសម្ព័ន្ធជាមួយកាសែតអាល្លឺម៉ង់ Sueddeutsche Zeitung និងអង្គការសារព័ត៌មានជាង១០០ទៀតនោះ បានឲ្យដឹងថាខ្លួនបានសន្និដ្ឋានពីឯកសារបែកធ្លាយទាំងអស់នេះថា ក្នុងចំណោមអ្នកពាក់ព័ន្ធជាច្រើននោះ ក៏មានមនុស្សនៅក្រោមប្រធានាធិបតីរុស្សី លោក Vladimir Putin ដែលបានវេរលុយរហូតដល់ ២ពាន់លានដុល្លារអាមេរិក តាមរយៈគណនេយ្យធនាគារនៅក្រៅប្រទេស ក្នុងអំឡុងពេលជិត៤០ឆ្នាំដោយការវេរទឹកប្រាក់ទាំងនេះ មានជាប់ពាក់ព័ន្ធនឹងមនុស្សឬក្រុមហ៊ុន ដែលមានចំណងទាក់ទងនឹងលោកពូទីន ពីឆ្នាំ១៩៧៧ រហូតដល់ចុងឆ្នាំ២០១៥។
កាសែតអាល្លឺម៉ង់ Sueddeutsche Zeitung ដែលមានមូលដ្ឋាននៅក្រុងMunich បាននិយាយកាលពីថ្ងៃអាទិត្យនេះថា ខ្លួនបានទទួលទិន្នន័យទាំងនេះកាលពីជាងមួយឆ្នាំមុន។ កាសែតនេះនិយាយថា ទិន្នន័យដែលខ្លួនទទួលបាននេះ គឺច្រើនជាងច្រើនជាងពីរឬបីដងនៃទិន្នន័យការទូតសម្ងាត់ ដែលចេញផ្សាយដោយWikiLeaks កាលពីឆ្នាំ២០១០ និងឯកសារសម្ងាត់ ដែលលោក Edward Snowden បានផ្តល់ឲ្យអ្នកកាសែតកាលពីឆ្នាំ២០១៣ទៅទៀត។
ការិយាល័យពន្ធដាររបស់ប្រទេសអូស្ត្រាលី បានថ្លែងប្រាប់សារព័ត៌មានReuters របស់អង់គ្លេសនៅថ្ងៃច័ន្ទនេះថាខ្លួនកំពុងស៊ើបអង្កេតអតិថិជនដែលមានទ្រព្យសម្បត្តិមហាសាលជាង៨០០នាក់ របស់ក្រុមហ៊ុនច្បាប់ប៉ាណាម៉ានោះដើម្បីរកមើលថាបានប្រព្រឹត្តការគេចមិនបង់ពន្ធដែរឬអត់៕
