លោកប្រធានាធិបតីសហរដ្ឋអាមេរិក បារ៉ាក់ អូបាម៉ា និងប្រធានាធិបតីរុស្ស៊ី Vladimir Putin បានប៉ះពាក្យសម្តីគ្នាខ្លាំងៗកាលពីថ្ងៃចន្ទ នៅឯមហាសន្និបាតប្រចាំឆ្នាំរបស់អង្គការសហប្រជាជាតិ អំពីវិធីបញ្ចប់ការប្រយុទ្ធអស់រយៈពេល៤ឆ្នាំនៅក្នុងប្រទេសស៊ីរី។
មុនពេលជំនួបទល់មុខគ្នារវាងមេដឹកនាំសាកលោកទាំងពីរ ដែលគ្រោងនឹងធ្វើឡើងនៅរសៀលនេះ លោក អូបាម៉ា បានប្រាប់សម័យប្រជុំប្រចាំឆ្នាំរបស់មហាសន្និបាតអង្គការសហប្រជាជាតិថា បន្ទាប់ពីមានការបង្ហូរឈាមយ៉ាងខ្លាំង ប្រទេសស៊ីរី មិនអាចវិលត្រឡប់ទៅកាន់ស្ថានភាពមុនសង្គ្រាមបានទេ។ លោកអូបាម៉ា បានអំពាវនាវឲ្យមានអន្តរកាលមួយដើម្បីបណ្តេញប្រធានាធិបតីស៊ីរី Bashar al- Assad ចេញពីដំណែង។
ក៏ប៉ុន្តែ លោក ពូទីន ដែលបានធ្វើសុន្ទរកថាលើកទីមួយនៅអង្គការសហប្រជាជាតិក្នុងរយៈពេលមួយទសវត្សរ៍នោះ បានព្រមានថា វានឹងក្លាយជាកំហុសមួយយ៉ាងធំចំពោះការមិនធ្វើកិច្ចសហប្រតិបត្តិការជាមួយរដ្ឋាភិបាលអាសាដនៅក្នុងការប្រយុទ្ធពួកបះបោររដ្ឋឥស្លាមដែលកំពុងព្យាយាមបណ្តេញមេដឹកនាំស៊ីរីចេញពីដំណែង។ លោក បានអំពាវនាវឲ្យមានក្រុមចម្រុះដ៏ធំមួយដើម្បីប្រយុទ្ធក្រុមរដ្ឋឥស្លាម ដូចគ្នានឹងសម្ព័ន្ធមិត្តប្រឆាំងនឹងអ៊ីត្លែដែលបានប្រយុទ្ធជាមួយគ្នាក្នុងសង្គ្រាមលោកលើកទី២ដែរ។
លោក អូបាម៉ា បានមានប្រសាសន៍ថា គ្មានចម្លើយងាយស្រួលសម្រាប់ការប្រយុទ្ធនៅក្នុងប្រទេសស៊ីរីទេ ក៏បុន្តែ វិស័យការទូតត្រូវតែប្រើប្រាស់ដើម្បីធ្វើឲ្យមានកិច្ចព្រមព្រៀងមួយសម្រាប់ប្រជាពលរដ្ឋស៊ីរី ដើម្បីរស់នៅជាមួយគ្នាដោយសុខសន្តិភាព។លោកប្រធានាធិបតី បានប្រកាសប្រឆាំងលោក អាសាដ ថាជាមេដឹកនាំដែលបានទម្លាក់គ្រាប់បែកលើប្រជាពលរដ្ឋរបស់ខ្លួន វាយប្រហារទៅលើមនុស្សជាតិទាំងអស់របស់យើង៕
