ក្រុមវេជ្ជបណ្ឌិតនៅក្នុងប្រទេសកេនយ៉ាកាលពីថ្ងៃច័ន្ទទី២១ ខែធ្នូ បានចូលរួមជាមួយក្រុមមន្ត្រីគ្លីនិកនិងគិលានុប្បដ្ឋាកធ្វើកូដកម្មនៅទូទាំងប្រទេស ដែលការណ៍នេះទំនងជានឹងបង្កការលំបាកកាន់តែខ្លាំងសម្រាប់អ្នកជំងឺក្នុងការទទួលបានការព្យាបាល។ ក្រុមវេជ្ជបណ្ឌិតបានធ្វើកូដកម្មបន្ទាប់ពីបានចរចាជាមួយរដ្ឋាភិបាលពាក់ព័ន្ធនឹងការតំឡើងប្រាក់ខែនិងឧបករណ៍ការពារវ៉ីរុសកូរ៉ូណាត្រូវបរាជ័យ។
មណ្ឌលសុខភាពនានាក្នុងប្រទេសកេនយ៉ាកំពុងប្រឈមនឹងវិបត្តិបន្ទាប់ពីក្រុមវេជ្ជបណ្ឌិតនិងមន្ត្រីបម្រើការខាងសុខាភិបាលផ្សេងៗទៀតទាមទារតំឡើងប្រាក់ខែធានារ៉ាប់រងសុខភាពនិងឧបករណ៍ការពារដើម្បីជួយពួកគេប្រយុទ្ធប្រឆាំងនឹងការរាតត្បាតវីរុសកូរ៉ូណា។
លោក Chibanzi Mwachonda គឺជាអគ្គលេខាធិការនៃសហជីពក្រុមអ្នកវេជ្ជសាស្រ្តឱសថសាស្រ្តនិងទន្តសាស្រ្តនៃប្រទេសកេនយ៉ា។ កាលពីថ្ងៃទី២១ ខែធ្នូ កន្លងទៅ លោកបានចូលរួមពិធីបុណ្យសពវេជ្ជបណ្ឌិតម្នាក់ដែលបានស្លាប់ដោយជំងឺកូវីដ១៩ ដោយពេលនោះលោកបាននិយាយទៅកាន់អ្នកសារព័ត៌មាននៅក្នុងស្រុកថារដ្ឋាភិបាលមិនទាន់យល់ព្រមតាមការទាមទាររបស់ពួកគេនៅឡើយទេ។
លោក Mwachonda បានថ្លែងថា៖ «ក្រុមវេជ្ជបណ្ឌិតនៅទូទាំងប្រទេសមិនអាចរង់ចាំតទៅទៀតបានទេ។ យើងនឹងមិនត្រឡប់ទៅធ្វើការក្នុងស្ថានភាពដ៏គ្រោះថ្នាក់នេះទេ។ យើងនឹងមិនធ្វើការទេបើគ្មានធានារ៉ាប់រងសម្រាប់ព្យាបាលពួកយើងធានារ៉ាប់រងសងជំងឺចិត្តដល់គ្រួសារដែលវេជ្ជបណ្ឌិតភាគច្រើនមាន និងធានារ៉ាប់រងការងារនោះ។ វាគ្មានប្រយោជន៍ទេដែលបណ្តុះបណ្តាលវេជ្ជបណ្ឌិតហើយមិនយកពួកគេមកបម្រើការងារនោះ។ ដូច្នេះសហជីពចាប់ផ្តើមធ្វើកូដកម្មនៅថ្ងៃនេះហើយយើងនឹងនៅតែធ្វើកូដកម្មមិនត្រឡប់ចូលធ្វើការវិញ។ បន្ទាប់ពីនេះយើងសង្ឃឹមថានៅថ្ងៃស្អែកយើងនឹងស្វែងរកដំណោះស្រាយចំពោះបញ្ហាទាំងនេះ»។
យោងតាមក្រុមមន្រ្តីវេជ្ជបណ្ឌិតដែលបានស្លាប់នោះគឺជាសមាជិកទី១៣នៃសហជីពដែលបានស្លាប់ដោយកូវីដ១៩។
កូដកម្មដំបូងឡើងគ្រោងចាប់ផ្តើមតាំងពីពីរសប្តាហ៍មុនប៉ុន្តែសហជីពបានពន្យារពេល បន្ទាប់ពីមានអន្តរាគមន៍ពីគណៈកម្មាធិការសភាទទួលបន្ទុកផ្នែកសុខាភិបាល ដែលបានជំរុញឲ្យមានពេលវេលាបន្ថែមទៀតដើម្បីចរចា។
សហជីពវេជ្ជបណ្ឌិតនិងទន្តពេទ្យបានចូលរួមជាមួយមន្រ្តីគ្លីនិកនិងក្រុមគិលានុប្បដ្ឋាកដែលបានចាប់ផ្តើមធ្វើកូដកម្មកាលពីពីរសប្តាហ៍មុន។
ក្រសួងសុខាភិបាលបានគំរាមបណ្តេញបុគ្គលិកសុខាភិបាលចេញពីការងារ ប្រសិនបើនៅបន្តធ្វើកូដកម្ម។
លោក Wycliffe Oparanya គឺជាអភិបាលស្រុក Kakamega និងជាប្រធានក្រុមប្រឹក្សាភិបាលស្រុក។ លោកបាននិយាយថាវាមិនយុត្តិធម៌ទេដែលក្រុមវេជ្ជបណ្ឌិតធ្វើកូដកម្មនៅអំឡុងពេលការរាតត្បាតដូច្នេះហើយថានឹងមានវិធានការសមរម្យដើម្បីប្រឆាំងនឹងគ្រូពេទ្យដែលធ្វើកូដកម្មទាំងនេះ។
លោក Oparanya បានថ្លែងថា៖ «ប្រសិនបើពួកគេនៅបន្តធ្វើកូដកម្មយើងនឹងចាត់វិធានការខ្លាំងប្រឆាំងនឹងពួកគេ។ យើងនឹងបណ្តេញពួកគេចេញពីការងារ។ ខ្ញុំបានបញ្ជាឲ្យជ្រើសរើសគិលានុប្បដ្ឋាកផ្សេងទៀតហើយ»។
លោក Mwachonda ថាដំណោះស្រាយតែមួយគត់ដែលធ្វើឲ្យពួកគេត្រឡប់ទៅធ្វើការវិញគឺលុះត្រាតែរដ្ឋាភិបាលទទួលយកសំណើរបស់ពួកគេ។
លោក Mwachonda និយាយថា៖ «មិនថាមានការគំរាមកំហែងខ្លាំងប៉ុណ្ណាយើងនឹងមិនត្រឡប់ទៅធ្វើការវិញជាដាច់ខាត។ ខ្ញុំនឹងនៅតែនិយាយដដែលៗ។ បញ្ជាតុលាការនឹងមិនបញ្ឈប់ការទាមទារទាំងនេះទេ បញ្ជាតុលាការនឹងមិនបញ្ឈប់ការស្លាប់របស់គ្រូពេទ្យទេ បញ្ជាតុលាការនឹងមិនបញ្ឈប់ការឆ្លងឬបន្ថយការឆ្លងក្នុងចំណោមក្រុមវេជ្ជបណ្ឌិតទេ។ វាជាជីវិតរបស់យើងហើយយើងត្រូវបានគេរុញដល់ចំណុចទាល់ច្រកហើយ។ យើងបានឲ្យពេលពួកគេ២១ថ្ងៃនិងបានពន្យារពេល១៤ថ្ងៃទៀតសរុប៣៥ថ្ងៃដើម្បីឲ្យពួកគេធ្វើការសម្រេចចិត្តលើសំណើទាំងនេះ»។
សហជីពមន្រ្តីគ្លីនិកបានចរចាជាមួយមន្រ្តីរដ្ឋាភិបាលដើម្បីស្វែងរកដំណោះស្រាយបញ្ចប់កូដកម្មនេះ។
ប្រធានសហជីព លោក Peterson Wachira និយាយថាវាគ្មានសុវត្ថិភាពសម្រាប់ពួកគេត្រឡប់ទៅធ្វើការវិញទេ។
កាលពីឆ្នាំ២០១៧ កូដកម្មមួយរបស់ក្រុមវេជ្ជបណ្ឌិតបានធ្វើឡើងអស់១០០ថ្ងៃមុននឹងឈានដល់ការព្រមព្រៀងគ្នា៕
ប្រែសម្រួលដោយ ស៊ូ ពេជ្រចិន្តា
