ឥណ្ឌូនេស៊ីបានឲ្យដឹងថាខ្លួននឹងធ្វើការល្បាតនៅក្នុងដែនទឹកនៅជុំវិញប្រជុំកោះនៅក្នុងសមុទ្រចិនខាងត្បូង ដើម្បីបណ្តេញនាវានេសាទរបស់ចិន ដែលទង្វើនេះបង្កជាហានិភ័យដល់ទំនាក់ទំនងសេដ្ឋកិច្ចរបស់ខ្លួនជាមួយនឹងចិន ប៉ុន្តែឥណ្ឌូនេស៊ីមានប្រៀបជាងនៅក្នុងជម្លោះនេះដោយបង្កផលប៉ះពាល់តិចតួចប៉ុណ្ណោះ នេះបើយោងតាមក្រុមអ្នកវិភាគ។
ប្រធានាធិបតីឥណ្ឌូនេស៊ីលោក Joko Widodo ដែលត្រូវបានគេស្គាល់ថា Jokowi នោះបានថ្លែងកាលពីខែតុលាថា រដ្ឋាភិបាលនឹងមិនចុះញ៉មចំពោះការទាមទារនៅជុំវិញប្រជុំកោះ Natunas កន្លែងដែលនាវានេសាទរបស់ចិនឆ្លងកាត់នៅក្នុងដែនទឹកនោះ។ លោកបានធ្វើដំណើរទៅកាន់ប្រជុំកោះទាំងនោះ ក្នុងអំឡុងពេលធ្វើសមយុទ្ធយោធាកាលពីខែកញ្ញានិងតុលាកន្លងទៅនេះ។
លោក David McRae អ្នកស្រាវជ្រាវជាន់ខ្ពស់មួយរូបនៅឯវិទ្យាស្ថានអាស៊ីនៃសាកលវិទ្យាល័យ Melbourne ក្នុងប្រទេសអូស្ត្រាលីបានថ្លែងថា៖ «ក្រុមមន្ត្រីឥណ្ឌូនេស៊ីជាច្រើនមានការជឿជាក់ថា ខ្លួនអាចទាមទារបានសិទ្ធិក្នុងការដាក់តំបន់ដែលខ្លួនទាមទារឲ្យក្លាយទៅជាតំបន់សេដ្ឋកិច្ចពិសេសនៅជុំវិញប្រជុំកោះ Natunas ហើយបង្កើនទំនាក់ទំនងសេដ្ឋកិច្ចដ៏រ៉ឹងមាំជាមួយនឹងចិនក្នុងពេលតែមួយ»។
លោក Widodo កាលពីឆ្នាំមុន បានអំពាវនាវឲ្យភាគីទាំងពីរបង្កើនការធ្វើពាណិជ្ជកម្មទៅវិញទៅមកដែលមានតម្លៃ ១៥០ពាន់លានដុល្លាគិតត្រឹមឆ្នាំ២០២០។ ចិនគឺជាប្រភពនាំចូលទៅក្នុងប្រទេសឥណ្ឌូនេស៊ីច្រើនជាងបំផុត ហើយជាប្រទេសដែលឥណ្ឌូនេស៊ីនាំចេញធនធានរ៉ែនិងប្រេងដូងច្រើនបំផុតទី២៕
