ផែនការមួយដើម្បីកាប់ដើមឈើរាប់ពាន់ដើមនៅក្នុងទីក្រុងហាណូយ បានបណ្តាលឲ្យមានការខឹងសម្បារនៅទូទាំងក្នុងទីក្រុង ដោយមនុស្សជាច្រើននាក់ បានបញ្ចេញមតិនៅលើបណ្តាញសង្គម ឬចូលរួមក្នុងពិធីដែលរៀបចំឡើងនៅទូទាំងរដ្ឋធានីដើម្បីតវ៉ាប្រឆាំងនឹងការធ្វើដូចនោះ។
មនុស្សប្រហែល៥រយនាក់ ដែលពាក់អាវយឺតពិសេស និងកាន់បដាដែលសរសេរថា «ការឱបរឹតដើមឈើទីក្រុងហាណូយ» ឬ «Tree Hugs Hanoi»បានកាន់ដៃគ្នានៅខាងក្រៅឧទ្យានមួយកាលពីព្រឹកថ្ងៃអាទិត្យដើម្បីតវ៉ាប្រឆាំងផែនការរបស់រដ្ឋាភិបាលក្នុងការកាប់រំលំដើមឈើជាងមួយភាគបួននៃដើមឈើរបស់ទីក្រុង។
ការតវ៉ាប្រឆាំងក្នុងទម្រង់ផ្សេងៗ បានបន្តធ្វើឡើងអស់រយៈពេល២ថ្ងៃ ថ្វីបើមានព័ត៌មានកាលពីថ្ងៃសុក្រថា ប្រធានគណៈកម្មាធិការប្រជាជនទីក្រុងហាណូយ បានសុំឲ្យផ្អាកផែនការនោះក៏ដោយ។ ដើមឈើប្រហែលប្រាំរយដើម បានត្រូវផ្តួលរំលំរួចហើយ ហើយក្រុមអ្នកចូលរួមនៅឯពិធី«ការឱបរឹតដើមឈើទីក្រុងហា ណូយ»បាននិយាយថា ពួកគេមានការព្រួយបារម្ភថា ការកាប់ផ្តួលរំលំដើមឈើនោះមិនត្រូវបានបញ្ឈប់។
ដោយមានស្លាកបិទនៅត្រង់ថ្ពាល់ បាតុករ Duc Anh និយាយថា មនុស្សជាច្រើន បានបារម្ភអំពីផែនការនេះ។
លោកនិយាយថា ប្រជាជនទីក្រុងហាណូយនិងអ្នកទេសចរ ស្រឡាញ់ដើមឈើដោយមូលហេតុជាច្រើន។ដើមឈើទាំងអស់នោះល្អសម្រាប់បរិស្ថាន ហើយដើមឈើទាំងនោះមានតម្លៃខាងមនោសញ្ចេតនាផងដែរ ពីព្រោះតែដើមឈើជាច្រើនមានចំណាស់ដូចជីដូនជីតារបស់ពួកគាត់ដែរ។ដើមឈើដែលមានសុខភាពល្អ ក៏ត្រូវបានគេកាប់រំលំដែរ ហើយលោកបានបន្តថា ការណ៍នេះជាការគួឲ្យសោកស្តាយបំផុត។
កាសែតយុវជន (Thanh Nien) បានប្រាប់ឲ្យដឹងថា នៅក្រោមផែនការរៀបចំសោភណ្ឌភាពទីក្រុងដែលមានប្រាក់៣លាន៤សែនដុល្លារ ដើមឈើចំនួនប្រាំមួយពាន់ប្រាំពីររយដើមដែលត្រូវគេចាត់ទុកថា មានគ្រោះថ្នាក់និងមិនមានសោភណ្ឌភាព ត្រូវកាប់រំលំចោល។ ទោះបីជាយ៉ាងណាក៏ដោយ កាសែតនោះ បានចោទសួរពីអ្វីដែលគេនឹងយកឈើដែលអាចមានតម្លៃថ្លៃនេះទៅធ្វើបន្ទាប់ពីកាប់ហើយ។
ចំណាត់ការនេះ បានបណ្តាលឲ្យមានការផ្ទុះឡើងនូវកំហឹងលើបណ្តាញផ្សាយព័ត៌មានសង្គម។ គេហទំព័សង្គមFacebook មួយដែលមានឈ្មោះថា មនុស្សប្រាំមួយពាន់ប្រាំពីររយនាក់សម្រាប់ដើមឈើប្រាំមួយពាន់ប្រាំពីររយដើម ដែលបានបង្កើតឡើងកាលពីថ្ងៃអង្គារ៍ បានទាក់ទាញមនុស្សជិតប្រាំម៉ឺននាក់ឲ្យគាំទ្រ។
លោក Vu Thanh Phong និស្សិតឆ្នាំបញ្ចប់ការសិក្សា បាននិយាយថា ដើមឈើ ជាទ្រព្យសម្បតិ្តដ៏មានតម្លៃមួយនៃទ្រព្យសម្បត្តិនានារបស់ទីក្រុងហាណូយ។
លោកបាននិយាយថា ដើមឈើ និងរបស់របរប្រពៃណីនានាដូចជាក្រុមអ្នកលក់នៅក្រោមដើមឈើ ជាអ្វីដែលធ្វើឲ្យទីក្រុងហាណូយ ពិសេសប្លែកគេហើយបើគ្មានដើមឈើ និងក្រុមអ្នកលក់នៅក្រោមដើមឈើនោះទេ ទីក្រុងនោះនឹងលេងមានលក្ខណៈពិសេសតទៅទៀតហើយ។
ប្រហែល១ភាគ៤នៃប្រជាពលរដ្ឋវៀតណាម ដែលប្រើ Facebook ហើយបណ្តាញសង្គមនោះបានក្លាយជាឧបករណ៍ដ៏ខ្លាំងមួយដើម្បីផ្លាស់ប្តូរសង្គម។
ក្រុមអ្នកចូលរួមជាច្រើននៅឯពិធី«ការឱបរឹតដើមឈើទីក្រុងហាណូយ» ដែលបានពាក់អាវយឺតដែលទាក់ទិនទៅនឹងយុទ្ធនាការផ្សេងៗទៀត ក៏បានត្រូវជំរុញដោយបណ្តាញសង្គម ដែលអំពាវនាវដល់ក្រុមអាជ្ញាធរនៅក្នុងតំបន់កណ្តាលនៃប្រទេសវៀតណាមឲ្យបញ្ឈប់ផែនការស្ថាបនាកន្ត្រកខ្សែកាបឡើងភ្នំ និងប្រើខ្សែកាបនៅគូហាសុនដុង (Son Doong) ដែលអាចជាគូហាដ៏ធំជាងគេបង្អស់នៅក្នុងពិភពលោក។
លោក Thanh Thuជាផ្នែកមួយនៃយុទ្ធនាការណ៍នោះ។ លោកនិយាយថា ការយកចិត្តទុកដាក់នៅលើ Facebook និងញត្តិបានបង្ខំឲ្យរដ្ឋាភិបាលគិតម្តងទៀត។
«នៅពេលដែលពួកគេពិចារណាកត្តាបរិស្ថាននិងសេដ្ឋកិច្ច ហើយពួកគេនឹងបាន ឃើញថា គូហាសុនដុង (Son Doong) គួរត្រូវការពារ។ ពួកគេនឹងមិនស្ថាបនាអ្វីៗទេរហូតដល់ឆ្នាំ២០៣០»។
លោកនិយាយទៀតថា លោកសង្ឃឹមថា យុទ្ធនាការបណ្តាញសង្គមដូចនេះនឹងជួយលើកទឹកចិត្តមនុស្សឲ្យគិតកាន់តែច្រើនឡើងអំពីមនុស្សផ្សេងទៀត និងមានភាពសកម្មនៅក្នុងការការពារបរិស្ថាន ក៏ដូចជារួមវិភាគទានកាន់តែប្រសើរឡើងដល់សង្គម៕
ប្រែសម្រួលដោយ ជឹង ប៉ូជីន
