នៅខណៈដែលអ្នកនយោបាយអឺរ៉ុបបន្តជជែកដេញដោលគ្នាពីអនាគតប្រទេសក្រិកនៅក្នុងតំបន់ប្រើប្រាស់ប្រាក់អឺរ៉ូ គេសង្កេតឃើញថា ការតតាំងគ្នាដោយផ្តោតលើបញ្ហាសេដ្ឋកិច្ចនេះ ហាក់ដូចជានៅឆ្ងាយពីប្រជាជនក្រិកដ៏ច្រើនដែលកំពុងរស់នៅក្នុងភាពក្រីក្រ។ ការកាត់បន្ថយការចំណាយរយៈពេលប្រាំឆ្នាំរបស់រដ្ឋាភិបាល បានធ្វើឲ្យប៉ះពាល់យ៉ាងខ្លាំងដល់សេវាសាធារណៈ ហើយមេដឹកនាំអឺរ៉ុបក៏ទំនងជានឹងទាមទារឲ្យមានការត្បិតត្បៀតការចំណាយបន្ថែមទៀតនៅក្នុងប្រទេសនេះ ជាថ្នូរនឹងការទទួលបានកិច្ចព្រមព្រៀងសង្គ្រោះបំណុលក្រិក។
កន្លែងរង់ចាំនៅគ្លីនិកសុខភាពមិនគិតថ្លៃមួយដំណើរការដោយអង្គការ វេជ្ជបណ្ឌិតពិភពលោក (Doctors of the World) នៅក្នុងទីក្រុងអាថែន បានក្លាយជាទីតាំងប្រមូលផ្តុំប្រជាជនក្រិកក្រីក្រយ៉ាងច្រើន ដែលមានទាំងអ្នកគ្មានផ្ទះសម្បែង មនុស្សចាស់ជរា អ្នកគ្មានការងារធ្វើ រួមទាំងក្រុមជនអន្តោប្រវេសន៍ ដែលបានផ្សងព្រេងមករស់នៅលើទឹកដីក្រិកផង។
នៅក្នុងគ្លីនិកសុខភាពធ្មេញនេះ ក្រុមវេជ្ជបណ្ឌិត និងពេទ្យធ្មេញស្ម័គ្រចិត្តនាំគ្នាព្យាបាលរាល់អ្នកជំងឺទាំងអស់ដោយគ្មានសួរនាំអ្វីឡើយ។ ក៏ប៉ុន្តែ ធនធានរបស់ពួកគេនៅមានកម្រិត ហើយពួកគេកំពុងប្រឹងប្រែងធ្វើយ៉ាងណាដោះស្រាយបញ្ហានេះ។
លោកវេជ្ជបណ្ឌិត Bettina Krumbholz បានឲ្យដឹងថា ប្រព័ន្ធសុខាភិបាលចាប់ផ្តើមមានបញ្ហានៅពេលដែលវិបត្តិសេដ្ឋកិច្ចពិភពលោកកើតមានឡើងក្នុងឆ្នាំ២០០៨។
«យើងធ្លាប់មានប្រព័ន្ធសុខាភិបាលដ៏ល្អប្រសើរមួយ ហើយវាពិតជាមានប្រសិទ្ធភាពណាស់។ ប៉ុន្តែក្រោយពេលដែលមានការកាត់បន្ថយចំនួនវេជ្ជបណ្ឌិតជាច្រើននាក់មក ប្រព័ន្ធសុខាភិបាលចាប់ផ្តើមចុះអន់ខ្សោយតែម្តង។ នេះក៏ដោយសារតែកង្វះខាតក្រុមគិលានុបដ្ឋាយិកា និងក្រុមវេជ្ជបណ្ឌិត។ ដូច្នេះហើយ ទើបបានជាប្រជាជនមកមើលជំងឺ ត្រូវតម្រង់ជួររង់ចាំពី១០ទៅ១២ម៉ោងដើម្បីចាំទទួលសេវាសុខាភិបាល»។
លោកវេជ្ជបណ្ឌិត Krumbholz អះអាងថា ការរឹតត្បិតការដកសាច់ប្រាក់រយៈពេលពីរសប្តាហ៍កន្លងមកនេះ បានធ្វើឲ្យស្ថានភាពកាន់តែអាក្រក់ឡើងៗ។
«ប្រជាជនក្រីក្រទាំងនោះគ្មានលុយសូម្បីតែដើម្បីទិញថ្នាំ។ ដូច្នេះ មានប្រជាជនក្រិកដែលមានជំងឺជាច្រើននាក់មកទីនេះដើម្បីចាំទទួលថ្នាំព្យាបាលដោយឥតគិតថ្លៃ។ យើងមិនអាចទុកពួកគេឲ្យស្លាប់បាត់បង់ជីវិតតាមចិញ្ចើមផ្លូវដោយការអត់ឃ្លាន គ្មានថ្នាំសង្កូវ និងដោយកង្វះវេជ្ជបណ្ឌិតព្យាបាលជំងឺឡើយ»។
«សាមគ្គីភាព» គឺជាសម្រែកតស៊ូប្រជាជនក្រិក ដែលប្រឹងប្រយុទ្ធប្រឆាំងនឹងវិបត្តិដែលកំពុងកើតមានឡើង តាមរយៈការផ្តល់សេវាដោយឥតគិតថ្លៃ រួមមានការផ្តល់តំហែទាំសុខាភិបាល ការប្រឹក្សាផ្នែកច្បាប់ និងចំណីអាហារជាដើម។
នៅចំកណ្តាលទីលាន Monastiraki នាទីក្រុងអាថែន ដែលនៅមិនឆ្ងាយប៉ុន្មានពីបន្ទាយបុរាណ Acropolis លោក Konstantinos Polychronopoulos វ័យ៥១ឆ្នាំ កំពុងកូរសម្លរសាច់មាន់ក្នុងឆ្នាំងដ៏ធំមួយ ខណៈពេលដែលក្រុមអ្នកស្ម័គ្រចិត្តត្រៀមចាន ស្លាបព្រា និងសមរួចជាស្រេចនៅក្នុងផ្ទះបាយដែលគេដាក់ឈ្មោះថា «ផ្ទះបាយសង្គម»។
លោក Polychronopoulosបានបាត់បង់ការងារជានាយកប្រតិបត្តិផ្នែកទីផ្សារកាលពី៤ឆ្នាំមុន ហើយលោកត្រូវគេប្រាប់ដដែលៗក្នុងពេលសម្ភាសន៍ថា លោកចាស់ពេក ឬមានសមត្ថភាពលើសពីតម្រូវការការងារ។ បច្ចុប្បន្ននេះ លោកចែកចាយអាហារដោយឥតគិតថ្លៃដល់មនុស្សរាល់គ្នាទាំងអ្នកមាន និងអ្នកក្រ។
«ខ្ញុំចាប់ផ្តើមបម្រើការនៅផ្ទះបាយសង្គម ចាប់ពីពេលដែលខ្ញុំបានឃើញក្មេងប្រុសតូចៗពីរនាក់វាយប្រតាយប្រតប់គ្នាដណ្តើមយកអាហារបន្តិចបន្តួចនៅពីមុខគំនរសំរាម។ សកម្មភាពក្មេងទាំងពីរនេះមិនបានរំខានអារម្មណ៍ខ្ញុំខ្លាំងប៉ុន្មានទេ តែអ្វីដែលធ្វើឲ្យខ្ញុំមិនសប្បាយចិត្តកាន់តែខ្លាំងនោះគឺ មនុស្សម្នាដើរឆ្លងកាត់ទីនោះទៅមក ដោយគ្មានចាប់អារម្មណ៍អើពើអ្វីចំពោះក្មេងទាំងពីរនោះបន្តិចសោះ។ ពួកគេធ្វើដូចជាមិនបានឃើញរឿងអ្វីទាល់តែសោះ»។
បើទោះជានឹងមានកិច្ចព្រមព្រៀងលើការសង្គ្រោះបំណុលសម្រាប់ប្រទេសក្រិកក៏ដោយ បញ្ហាប្រឈមផ្នែកសេដ្ឋកិច្ចនឹងនៅតែបន្តកើតមានសម្រាប់ប្រជាជនក្រិកជាច្រើន ដែលជាជនរងគ្រោះនៃវិបត្តិបំណុលដែលបង្កមហន្តរាយធំធេងដល់ប្រជាជនក្រីក្រក្នុងប្រទេសនេះ៕
ប្រែប្រមួលដោយ សៅ ផលនិស្ស័យ
