នៅថ្ងៃអង្គារ ទី២៤ ខែមករានេះ ភរិយា និងកូនរបស់មន្រ្តីអាដហុក និងមន្រ្តី គ.ជ.ប ដែលកំពុងត្រូវបានឃុំខ្លួនក្រោមបទសូកប៉ាន់សាក្សី និងសមគំនិតសូកប៉ាន់សាក្សី ទាក់ទងនឹងសំណុំរឿងអាស្រូវស្នេហារបស់លោក កឹម សុខា ប្រធានស្ដីទីគណបក្សសង្គ្រោះជាតិ ជាមួយនារីកាត់សក់វ័យក្មេងម្នាក់ឈ្មោះនាង ខុម ចាន់តារ៉ាទី ហៅស្រីមុំ បានស្វែងរកអន្តរាគមន៍ពីព្រះមហាក្សត្រ និងលោកនាយករដ្ឋមន្រ្តី ហ៊ុន សែន។
មន្ត្រីសមាគមអាដហុកបួនរូប រួមមានលោក នី សុខា លោក ណៃ វ៉ង់ដា លោក យី សុខសាន្ត លោកស្រី លឹម មុនី និងអគ្គលេខាធិការរង គ.ជ.ប មួយរូប គឺលោក នី ចរិយា ត្រូវបានអង្គភាពប្រឆាំងអំពើពុករលួយឃាត់ខ្លួន និងនាំទៅសាកសួរកាលពីចុងខែមេសា ឆ្នាំ២០១៦ ហើយត្រូវបានតុលាការសម្រេចឃុំខ្លួនបណ្តោះអាសន្នក្នុងពន្ធនាគារ។ រហូតមកដល់ពេលនេះមន្រ្តីទាំង៥រូបកំពុងជាប់ឃុំបណ្តោះអាសន្នក្នុងពន្ធនាគារ អស់រយៈពេលជិត៩ខែមកហើយ។
កូនៗ និងភរិយារបស់អ្នកជាប់ឃុំទាំង៥រូបបានរៀបរាប់នៅក្នុងញត្តិនោះ ពីផលលំបាកក្រោយពេលមន្រ្តីទាំង៥រូបដែលជាជំហរក្នុងការផ្គត់ផ្គង់គ្រួសារត្រូវជាប់ឃុំថា ពួកគេត្រូវប្រឈមនឹងបញ្ហាជីវភាពយ៉ាងធ្ងន់ធ្ងរ ជាពិសេសបាត់បង់ភាពកក់ក្តៅក្នុងគ្រួសារ ដែលពួកគេធ្លាប់មានក្នុងពេលរស់នៅជុំគ្នា។ ពួកគេរំពឹងថា ខុទ្ទកាល័យនាយករដ្ឋមន្រ្តី និងព្រះបរមរាជវាំង នឹងជួយអន្តរាគមន៍ឲ្យតុលាការទម្លាក់បទចោទលើឪពុកម្តាយ និងស្វាមីរបស់ពួកគេដែលតែងបម្រើការងារជួយដល់សង្គម ឲ្យបានរស់នៅជួបជុំគ្នាដូចដើម។
អ្នកស្រី ថន បូនីតា ភរិយារបស់លោក យី សុខសាន្ត ប្រាប់អ្នកសារព័ត៌មានក្រោយចេញពីដាក់ញត្តិនៅព្រះបរមរាជវាំងថា អ្នកស្រី និងក្រុមគ្រួសាររបស់មន្រ្តីអាដហុក និងមន្រ្តី គ.ជ.ប ដែលកំពុងជាប់ឃុំផ្សេងទៀតចង់ឲ្យតុលាការពន្លឿនដំណើរការរឿងក្តីរបស់ស្វាមីអ្នកស្រីឲ្យបានឆាប់។ អ្នកស្រីបន្ថែមថា ដោយសារចំណាត់ការរបស់តុលាការមានភាពយឺតយ៉ាវ ជាហេតុធ្វើឲ្យស្វាមីរបស់អ្នកស្រី និងមន្រ្តីជាប់ឃុំផ្សេងទៀតត្រូវរងទុក្ខក្នុងពន្ធនាគារទាំងមិនបានប្រព្រឹត្តខុស ទើបអ្នកស្រីស្វែងរកអន្តរាគមន៍ ដោយសង្ឃឹមថា ស្ថាប័នទាំងពីរនឹងជួយឲ្យអ្នកទាំង៥នាក់នោះ រួចផុតពីការចោទប្រកាន់។
អ្នកស្រីមានប្រសាសន៍ថា៖
«ខ្ញុំជឿជាក់បើសិនជាគាត់មានចំណាត់ការនឹងអាច ខ្ញុំជឿជាក់ តែខ្លាចគាត់អត់មានចំណាត់ការមិនដឹងយ៉ាងម៉េច? ៩ខែការរងចាំរបស់គឺយើងរងចាំលែងចង់បានហើយ ការរងចាំរបស់យើងហ្នឹងយូរពេកហើយ ធ្វើអ្វីឲ្យមានចលនាខ្លះទៅ ព្រោះថាស្ងាត់ទៅៗ ការរង់ចាំរបស់ខ្ញុំប្រពន្ធកូនហ្នឹង រង់ចាំម្តាយ ប្រពន្ធរងចាំប្តី វាដូចកាន់តែយូរទៅៗហើយ»។
ក្រុមគ្រួសារដែលបានដាក់ញត្តិទៅស្ថាប័នទាំងពីរនោះប្រាប់ថា តំណាងខុទ្ទកាល័យលោកនាយករដ្ឋមន្រ្តី និងខុទ្ទកាល័យព្រះបរមរាជវាំង បានទទួលយកញត្តិរបស់ពួកគេ តែមិនបានកំណត់ពីពេលវេលាក្នុងការឆ្លើយតបនោះទេ។
VOA មិនអាចទាក់ទងសុំការអធិប្បាយពី លោក ហ៊ូ សិទ្ធី នាយកខុទ្ទកាល័យនាយករដ្ឋមន្រ្តី និងលោក អ៊ុំ ដារ៉ាវុធ អ្នកនាំពាក្យព្រះបរមរាជវាំងបានទេ។
ការចាប់ខ្លួនមន្រ្តីសិទ្ធិមនុស្ស និងអគ្គលេខាធិការរងគ.ជ.ប.នេះ ត្រូវបានមជ្ឈដ្ឋានជាតិ និងអន្តរជាតិរិះគន់រដ្ឋាភិបាលថា បានលូកដៃចូលក្នុងប្រព័ន្ធយុត្តិធម៌ ដែលធ្វើឲ្យប៉ះពាល់ដល់ឯករាជ្យភាពរបស់តុលាការ និងដំណើរការប្រជាធិបតេយ្យនៅកម្ពុជា។
កាលពីថ្ងៃទី២១ ខែមករានេះ អង្គការសង្គមស៊ីវិល សមាគម និងសហគមន៍ដីធ្លីចំនួន២៥ បានចេញសេចក្ដីថ្លែងការណ៍រួមជាលើកទី២ ដោយអំពាវនាវឲ្យអាជ្ញាធរដោះលែងមន្រ្តីសមាគមអាដហុក (ADHOC) ៤រូប និងមន្រ្តី គ.ជ.ប ១រូប ជាបន្ទាន់។ អង្គការ និងសមាគមទាំង២៥នោះចាត់ទុកការឃុំខ្លួនអ្នកទាំងនេះ ថាជាការរើសអើង និងថា រដ្ឋាភិបាលកំពុងប្រើប្រាស់តុលាការដើម្បីធ្វើទុក្ខបុកម្នេញ និងបំបិទសំឡេងអ្នកហ៊ានរិះគន់រដ្ឋាភិបាលនៅមុនការបោះឆ្នោតក្រុមប្រឹក្សាឃុំ-សង្កាត់ និងការបោះឆ្នោតជាតិ៕
