ក្រុមមន្ត្រីគណបក្សធំៗទាំងពីរអះអាងថា បក្សទាំងពីរនៅមិនទាន់កំណត់បាននូវជំនួបដើម្បីពិភាក្សារកដំណោះស្រាយនយោបាយសម្រាប់បើកផ្លូវឲ្យមានការលើកលែងទោសមន្ត្រីសិទ្ធិមនុស្សនិងអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត (គ.ជ.ប) ដែលកំពុងជាប់ក្នុងពន្ធនាគារនៅឡើយទេ ដោយពួកគេលើកឡើងពីហេតុផលផ្សេងៗពីគ្នា។
អ្នកការពារសិទ្ធិមនុស្ស៤នាក់នៃសមាគមការពារសិទ្ធិមនុស្សអាដហុក ដែលរួមមានលោក នី សុខា លោក យី សុខសាន លោក ណៃ វ៉ង់ដា និង អ្នកស្រី លឹម មុនី ព្រមទាំង លោក នី ចរិយា អគ្គលេខាធិការរងនៃគ.ជ.ប ដែលជាអតីតអ្នកការពារសិទ្ធិមនុស្សដ៏លេចធ្លោម្នាក់នៃសមាគមអាដហុកនេះដែរ ត្រូវបានឃុំខ្លួន ក្រោយពីសាលាដំបូងរាជធានីភ្នំពេញ ចោទប្រកាន់ពួកគេពីបទសូកប៉ាន់សាក្សីចាប់តាំងពីខែមេសាឆ្នាំ២០១៦មក ពាក់ព័ន្ធនឹងរឿងអាស្រូវផ្លូវភេទលោកកឹម សុខា។
លោក យឹម សុវណ្ណ អ្នកនាំពាក្យគណបក្សសង្គ្រោះជាតិប្រាប់ VOA ថា ក្រុមមន្ត្រីនៃគណបក្សប្រឆាំងបានព្យាយាមទាក់ទងទៅក្រុមមន្ត្រីនៃគណបក្សកាន់អំណាច ដើម្បីឲ្យមានការជួបជជែកគ្នា ក៏ប៉ុន្តែពុំមានការឆ្លើយតប។
តែទោះជាយ៉ាងណា លោកថា គណបក្សប្រឆាំងនឹងខិតខំស្វែងរកដំណោះស្រាយ ដើម្បីបំបែកសំណុំរឿងនេះ។
«បាទអាហ្នឹងគឺត្រូវតែរកដំណោះស្រាយឲ្យបានមុនការបោះឆ្នោត ដើម្បីធ្វើម៉េចឲ្យការបោះឆ្នោតហ្នឹងសេរី និងយុត្តិធម៌»។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ប្រាប់VOAនៅថ្ងៃចន្ទនេះថា ការជួបសន្ទនាគ្នារវាងគណបក្សកាន់អំណាចនិងគណបក្សប្រឆាំង មិនទាន់អាចត្រូវបានធ្វើឡើងនោះឡើយ ដោយសារតុលាការមិនទាន់បានបញ្ចប់នីតិវិធីកាត់ទោសអ្នកជាប់ឃុំទាំងប្រាំរូបនេះ។
លោកសុខ ឥសាន បន្តថា លោកនាយករដ្ឋមន្ត្រី ហ៊ុន សែន អាចនឹងធ្វើការពិចារណាអំពីការស្នើសុំព្រះរាជទានលើកលែងទោសពីព្រះមហាក្សត្រ ដូចករណីលោក កឹម សុខា ដែលត្រូវបានប្រោសព្រះរាជទានលើកលែងទោសពីមហាក្សត្រ បន្ទាប់ពីតុលាការបានបញ្ចប់នីតិវិធីក្នុងសំណុំរឿងរបស់លោក។
«កាលណាធ្វើ យើងធ្វើឲ្យត្រឹមត្រូវតាមគោលការណ៍ច្បាប់។ ដូចឯកឧត្តម កឹម សុខា គាត់អត់មានប្ដឹងឧទ្ធរណ៍ទេ។ អញ្ចឹងវាចប់នីតិវិធីរបស់តុលាការហើយ។ អញ្ចឹងបានសម្ដេចតេជោ ហ៊ុន សែន នាយករដ្ឋមន្ត្រី លោកមានសិទ្ធិដើម្បីនឹងស្នើសុំប្រោសព្រះរាជទានទោសពីព្រះករុណាបាន។ ចុះឥឡូវ អស់លោកប៉ុន្មាននាក់ហ្នឹង គាត់ប្ដឹងឧទ្ធរណ៍ទៅដល់សាលាកំពូលទៀតទៅហើយ។ អញ្ចឹងទេ វាទុកឲ្យតុលាការគេបញ្ចប់ឲ្យស្រួលបួលសិន អាហ្នឹងវាអាចនឹងមានការពិនិត្យបាទ»។
ការចាប់ខ្លួនក្រុមមន្ត្រីនៃសមាគមការពារសិទ្ធិមនុស្សអាដហុកនិងមន្ត្រី គ.ជ.ប កើតមានឡើង ក្រោយពីពួកគេបានផ្ដល់ការប្រឹក្សាផ្លូវច្បាប់ដល់នារីកាត់សក់ម្នាក់ ដែលត្រូវគេចោទថា មានទំនាក់ទំនងស្នេហាលួចលាក់ជាមួយលោក កឹម សុខា អនុប្រធានគណបក្សសង្គ្រោះជាតិ។
ពាក់ព័ន្ធនឹងរឿងនេះដែរ កាលពីដើមខែវិច្ឆិកា ឆ្នាំ២០១៦ សាលាដំបូងរាជធានីភ្នំពេញបានផ្ដន្ទាទោសលោក កឹម សុខា ឲ្យជាប់ពន្ធនាគាររយៈពេល៥ខែ និងពិន័យជាប្រាក់៨០ម៉ឺនរៀល ពីបទបដិសេធក្នុងការចូលខ្លួនបំភ្លឺក្នុងនាមជាសាក្សីតាមការកោះហៅរបស់តុលាការ ពាក់ព័ន្ធនឹងបទសញ្ចរកម្ម ក្នុងសំណុំរឿងអាស្រូវស្នេហារបស់លោកដែលគេចោទប្រកាន់ ជាមួយនារីកាត់សក់វ័យក្មេងម្នាក់ដែលត្រូវបានគេស្គាល់ថាឈ្មោះនាង ខុម ចាន់តារ៉ាទី ហៅស្រីមុំ។
ក្រោយពីការផ្ដន្ទាទោសនេះ ក្រុមមេធាវីការពារក្ដីឲ្យលោក កឹម សុខា អ្នកតំណាងរាស្ត្រមណ្ឌលខេត្តកំពង់ចាម បានសម្រេចមិនប្ដឹងទៅសាលាឧទ្ធរណ៍។
លោក កឹម សុខា ក៏បានសរសេរលិខិតមួយស្នើឲ្យលោក នាយករដ្ឋមន្ត្រី ហ៊ុន សែន ជួយស្នើព្រះមហាក្សត្រ ឲ្យប្រោសព្រះរាជទានលើកលែងទោសរូបលោក។
លោក កឹម សុខា ទទួលបានព្រះរាជទានលើកលែងទោសពីព្រះមហាក្សត្រខ្មែរព្រះបាទសម្ដេច នរោត្តម សីហមុនី កាលពីថ្ងៃទី២ ខែធ្នូ ឆ្នាំ២០១៦។
បន្ទាប់ពីប្រធានស្តីទីគណបក្សប្រឆាំងរូបនេះ បានរួចផុតពីការផ្ដន្ទាទោសនោះ លោកមេឃុំ ស៊ាង ចែត មកពីគណបក្សប្រឆាំង ដែលត្រូវបានតុលាការកាត់ទោសឲ្យជាប់ពន្ធនាគាររយៈពេល៥ឆ្នាំពីបទសូកប៉ាន់សាក្សីពាក់ព័ន្ធនឹងករណីនេះ ក៏ត្រូវបានលើកលែងទោសពីព្រះមហាក្សត្រផងដែរ។
លោក កឹម សុខា ក៏បានវិលចូលសភាវិញនៅក្នុងខែធ្នូដដែលនោះ ហើយបានជួបពិភាក្សាជាលក្ខណៈឯកជនជាមួយលោកនាយករដ្ឋមន្ត្រី ហ៊ុន សែន និង លោកស ខេង រដ្ឋមន្ត្រីក្រសួងមហាផ្ទៃ។
លោក ស ខេង បានប្រាប់ក្រុមអ្នកយកព័ត៌មានថា ក្រុមអ្នកនយោបាយនៃគណបក្សនយោបាយទាំងពីរ នឹងពិនិត្យលើលទ្ធភាពជួបជជែកគ្នា លើករណីមន្ត្រីសិទ្ធិមនុស្ស និងមន្ត្រីគ.ជ.ប។
លោក ស ខេង បានថ្លែងនៅពេលនោះយ៉ាងដូច្នេះថា៖
«បើតាមខ្ញុំដឹង មុនដំណាច់ខែ១២ [ឆ្នាំ២០១៦]នេះ នឹងមានការដោះស្រាយករណីមន្ត្រីសិទ្ធិមនុស្ស សិទ្ធិមនុស្ស ហើយនិង អគ្គលេខាធិការរងគ.ជ.ប»។
ក៏ប៉ុន្តែ រហូតមកដល់ដើមខែមករានេះ ជំនួបនេះ មិនត្រូវបានធ្វើឡើងនោះឡើយ។
ការខកខានមិនបានធ្វើឲ្យមានការជួបជជែកគ្នារវាងក្រុមអ្នកនយោបាយនៃគណបក្សទាំងពីរ បានកើតឡើង នៅស្របពេលដែលប្រធានគណបក្សសង្គ្រោះជាតិលោក សម រង្ស៊ី ដែលកំពុងរស់នៅនិរទេសខ្លួននៅក្រៅប្រទេស បានធ្វើការអធិប្បាយជាបន្តបន្ទាប់តាមបណ្ដាញសារព័ត៌មាន និងទំព័រហ្វេសប៊ុករបស់លោក ដោយព្យាករណ៍ពីការឈ្នះឆ្នោតរបស់គណបក្សប្រឆាំង និងរិះគន់ធ្ងន់ៗលើប្រព័ន្ធយុត្តិធម៌កម្ពុជា។
អ្នកនាំពាក្យនៃគណបក្សធំៗទាំងពីរ មិនធ្វើការអធិប្បាយលើការថ្លែងរបស់លោក សម រង្ស៊ីនោះឡើយ។
លោក សំ ចន្ទគា អ្នកនាំពាក្យសមាគមការពារសិទ្ធិមនុស្សអាដហុក ថ្លែងថា គណបក្សកាន់អំណាច នឹងមិនទុកឲ្យរឿងក្តីក្តាំរបស់មន្ត្រីការពារសិទ្ធិមនុស្សរបស់សមាគមការពារសិទ្ធិនេះ អូសបន្លាយពេលបន្តទៀតនោះទេ ដោយលោកថា ករណីនេះអាចនឹងធ្វើឱ្យបក្សកាន់អំណាចខាតបង់ផលចំណេញខាងនយោបាយ។
«ខាងគណបក្សកាន់អំណាច លោកនឹងគិតគូរហើយពីព្រោះរឿងនេះ កាលណាគាត់ទុកបន្តទៀត ក៏វាអត់ចំណេញអីដល់គណបក្សកាន់អំណាចដែរ វាមានតែខាតទេ។ ដូច្នេះ ហើយ លោកនឹងជាការដោះលែង ឬមួយលោកនឹងជំរុញឲ្យតុលាការ ឆាប់ពន្លឿននីតិវិធីនេះ ជាមិនខានទេ»។
អ្នកវិភាគនយោបាយកម្ពុជា បានលើកឡើងកាលពីពេលកន្លងមកថា ការអត្ថាធិប្បាយរបស់លោក សម រង្ស៊ី អំពីជ័យជំនះនៅក្នុងការបោះឆ្នោត អាចជាកត្តាធ្វើឲ្យរាំងស្ទះដល់ដំណើរការចរចាខាងនយោបាយ សម្រាប់បំបែកសំណុំរឿងនានាដែលនៅសេសសល់ រួមមានមន្ត្រី និងសកម្មជនគណបក្សប្រឆាំងចំនួនជាង១០រូបនិងអ្នកស្រី ទេព វន្នី អ្នកការពារសិទ្ធិលំនៅដ្ឋាននៅតំបន់បឹងកក់ដែលកំពុងជាប់ក្នុងពន្ធនាគារ៕
