ទឹកជំនន់លិចផ្ទះសម្បែងភូមិករ គ្រោះរាំងស្ងួត អាកាសធាតុកាន់តែក្តៅ និងខ្យល់ព្យុះដែលប្រទេសកម្ពុជាជួបប្រទះកន្លងមកដែលបំផ្លាញផលិតផលកសិកម្ម ទាំងនេះត្រូវក្រុមអ្នកវិទ្យាសាស្រ្តចាត់ទុកថាគឺជាផ្នែកមួយនៃផលប៉ះពាល់ពីការប្រែប្រួលអាកាសធាតុ។
មិនមែនតែប្រទេសកម្ពុជាទេដែលរងផលប៉ះពាល់ដូចនេះប្រទេសខ្លះទៀតក៏រងការគំរាមកំហែងពីកម្ពស់ទឹកសមុទ្រកាន់តែឡើងដែលអាចនឹងពន្លិចផ្នែកខ្លះនៃ ប្រទេសនិងការបាក់ដីចូលសមុទ្រនិងទន្លេជាដើម។ គ្រោះថ្នាក់ទាំងអស់នេះគឺ មនុស្សជាអ្នកបង្កើត។ នេះ បើតាមការអះអាងរបស់អ្នកវិទ្យាសាស្រ្ត។
លោកស្រីម៉ាហ្វាល់ដា ដូអាត ប្រធានគម្រោងនៃមូលនិធិវិនិយោគលើអាកាសធាតុបានបញ្ជាក់នៅក្នុងកម្មវិធី ជួបជាមួយនឹងអ្នកសារព័ត៌មាននៅស្នាក់ការរបស់វីអូអេកាលពីថ្ងៃសុក្រថា៖
«ការប្រែប្រួលអាកាសធាតុគឺជាការគំរាមកំហែងជាមូលដ្ឋានដល់ការអភិវឌ្ឍន៍នៅក្នុងជីវិតរបស់យើងនិងជីវិតរបស់កូនចៅយើងនិងមនុស្សជាច្រើនជំនាន់ទៀត។ប្រសិនបើយើងមិនប្រឈមមុខនឹងបញ្ហានេះទេយើងនឹងមិនអាចបញ្ចប់ភាពក្រីក្របានទេហើយយើងនឹងមិនអាចជំរុញវិបុលសុខសម្រាប់មនុស្សដែលយើងយកចិត្តទុកដាក់បំផុតហើយយើងដឹងថាបើយើងកាន់តែពន្យាពេលក្នុងការដោះស្រាយការប្រែប្រួលអាកាសធាតុតម្លៃនឹងកាន់តែថ្លៃ»។
ក្នុងរយៈពេល៤០ឆ្នាំចុងក្រោយនេះ សីតុណ្ហភាពមធ្យមរបស់ប្រទេសកម្ពុជាបានកើនជិត១អង្សាសេ។ នេះបើតាមការបញ្ជាក់របស់មន្ត្រីជំនាញក្នុងពេលកន្លងមក។
រាជរដ្ឋាភិបាលកម្ពុជាកំពុងតែដំណើរការរៀបចំផែនការសកម្មភាពឆ្លើយតបនឹងការប្រែប្រួលអាកាសធាតុតាមវិស័យនីមួយៗហើយរហូតមកដល់ពេលបច្ចុប្បន្ននេះក្រសួងនិងទីភ្នាក់ងាររដ្ឋាភិបាលចំនួន៨បានអនុម័តផែនការសកម្មភាពឆ្លើយតបនឹងការប្រែប្រួលអាកាសធាតុ។ នេះបើតាមការបញ្ជាក់របស់គេហទំព័រក្រសួងបរិស្ថាន។
លោកស្រីម៉ាហ្វាល់ដា ដូអាតបានផ្តល់ជាអនុសាសន៍ដល់កម្ពុជាសុំឱ្យបញ្ជូលគ្រប់ភាគីទាំងអស់ក្នុងការរៀបចំផែនការសកម្មភាពឆ្លើយតបណាមួយ ដែលក្នុងនោះ មានវិស័យឯកជន អង្គការសង្គមស៊ីវិលនិងពលរដ្ឋដែលអាចនឹងរងផលប៉ះពាល់ជាដើមក្នុងការកំណត់ថាតំបន់ណានិងវិស័យណាដែលងាយរងគ្រោះ។
ការធ្វើ«ការសាកល្បង»ដើម្បីឱ្យដឹងថាវិធីណាមួយដែលល្អប្រសើរដើម្បីជួយដល់កម្ពុជាជាកិច្ចការសំខាន់និងត្រូវសំឡឹងរកមើលធនធានណាដែលមានដើម្បីយកមកប្រើប្រាស់។
លោកស្រី បានបន្ថែមថាមូលនិធិវិនិយោគលើការប្រែប្រួលអាកាសធាតុ (Climate Investment Funds) នឹងមានលទ្ធភាពជួយតាមនោះដែរ៖
«ដូច្នេះអី្វដែលប្រទេសជាច្រើនកំពុងធ្វើការជាមួយនឹងមូលនិធិវិនិយោគលើការប្រែប្រួលអាកាសធាតុហើយប្រាប់យើងមកវិញយ៉ាងច្បាស់គឺថា«យើងកំពុងធ្វើការសាកល្បងនិងពិនិត្យមើលដើម្បីសាកល្បងដោយប្រើវិធីសាស្រ្តផ្សេងៗ» ដូច្នេះគេនឹងមើលថាតើវិធីណានឹងដំណើរការហើយបន្ទាប់មកយើងបង្កើនប្រតិបត្តិការទៅតាមនោះ»។
ប្រទេសកម្ពុជាទទួលថវិកាពីមូលនិធិវិនិយោគលើការប្រែប្រួលអាកាសធាតុដើម្បីអនុវត្តលើកម្មវិធី សាកល្បងសម្រាប់ការស៊ូទ្រាំនឹងការប្រែប្រួលអាកាសធាតុនិងបច្ចេកវិទ្យាស្អាត។
មូលនិធិវិនិយោគលើការប្រែប្រួលអាកាសធាតុមានថវិកាចំនួន៨ពាន់លានដុល្លារសម្រាប់អនុវត្តការងារនៅទូទាំងពិភពលោក។
