ប្រធានាធិបតីហ្វីលីពីន លោក Rodrigo Duterte និយាយថា ប្រធានាធិបតីជាប់ឆ្នោតអាមេរិក លោក Donald Trump បានជូនពរលោកឲ្យទទួលបានជោគជ័យក្នុងការបង្រ្កាបអ្នកជួញដូរថ្នាំញៀន។ ការបង្រ្កាបនេះគឺជា យុទ្ធនាការមួយដែលបានបណ្តាលឲ្យមនុស្សជាង៤ពាន់នាក់ស្លាប់ចាប់តាំងពីខែកក្កដាមក។
លោក Duterte បានមានប្រសាសន៍ថា មេដឹកនាំរបស់អាមេរិកនាពេលអនាគតបានប្រាប់ដល់លោកថា លោកកំពុងតែបង្ក្រាបអ្នកជួញដូរថ្នាំញៀនក្នុងនាមជាប្រទេសដែលមានអធិបតេយ្យភាពមួយ។ វាគឺជា យុទ្ធសាស្រ្តត្រឹមត្រូវមួយ។
លោក Duterte បានឈ្នះការបោះឆ្នោតជ្រើសរើសប្រធានាធិបតីកាលពីដើមឆ្នាំនេះ ដោយសារតែការសន្យារបស់លោកក្នុងការបន្តកម្ចាត់ពួកអ្នកជួញដូរថ្នាំញៀន អ្នកប្រើប្រាស់ថ្នាំញៀន និងឧក្រិដ្ឋជន។
លោក Duterte បានមានប្រសាសន៍នៅក្នុងសេចក្តីថ្លែងការណ៍មួយថា លោកបានទូរស័ព្ទទៅលោក Trump កាលពីល្ងាចថ្ងៃសុក្រ ដើម្បីអបអរសាទរលោកចំពោះការឈ្នះឆ្នោតក្លាយជាប្រធានាធិបតីអាមេរិក។ មេដឹកនាំហ្វីលីពីនរូបនេះបាននិយាយទៀតថា លោកមានអារម្មណ៍ថា លោកមានការប្រាស្រ័យទាក់ទងយ៉ាងល្អជាមួយនឹងលោក Trump។
ចាប់តាំងពីឡើងកាន់តំណែងមក លោក Duterte បានបែរខ្នងដាក់រដ្ឋាភិបាលក្រុង Washington ដែលធ្វើឲ្យមានភាពស្រពិចស្រពិលក្នុងទំនាក់ទំនងរវាងសម្ព័ន្ធមិត្តយូរអង្វែងទាំងពីរ។ ទំនាក់ទំនងការទូតរវាងរដ្ឋាភិបាលក្រុងវ៉ាស៊ីនតោន និងរដ្ឋាភិបាលក្រុងម៉ានីល មានភាពជូរចត់ បន្ទាប់ពីលោក Duterte ប្រតិកម្មចំពោះការរិះគន់របស់អាមេរិកទៅលើការបង្រ្កាបការជួញដូរថ្នាំញៀនរបស់លោក៕
