កិច្ចប្រជុំបិទទ្វាររយៈពេលប្រហែលជាង១ម៉ោងនៅរដ្ឋសភារវាងលោក ស ខេង ប្រធានក្រុមតំណាងរាស្ត្រគណបក្សប្រជាជនកម្ពុជា និងលោក កឹម សុខា ប្រធានស្តីទីនៃក្រុមតំណាងរាស្ត្រគណបក្សសង្គ្រោះជាតិ បានពិភាក្សាបញ្ហា៤ចំណុច រួមមានការវាយតម្លៃអត្ថប្រយោជន៍នៃវប្បធម៌សន្ទនា ការសម្រេចកញ្ចប់ថវិកាចំណាយសម្រាប់ក្រុមតំណាងរាស្ត្រទាំងពីរគណបក្សនៅរដ្ឋសភា ការព្រមព្រៀងគ្នាលើច្បាប់សហជីព និងការព្រមព្រៀងថា នឹងជួបគ្នាទៀត តែមិនទាន់កំណត់ថ្ងៃ។
ក្រោយកិច្ចប្រជុំដែលគ្មានលទ្ធផលជាដុំកំភួននេះ លោក ស ខេង រដ្ឋមន្ត្រីក្រសួងមហាផ្ទៃ និងលោក កឹម សុខា ប្រធានស្តីទីគណបក្សសង្គ្រោះជាតិ មិនបានផ្តល់បទសម្ភាសន៍ជាមួយអ្នកយកព័ត៌មានទេ ដោយគ្រាន់តែប្រកាសឲ្យលោក ឈាង វុន អ្នកនាំពាក្យក្រុមតំណាងរាស្ត្រសំឡេងភាគច្រើន និងលោក យ៉ែម បុញ្ញឫទ្ធិ អ្នកនាំពាក្យក្រុមតំណាងរាស្ត្រសំឡេងភាគតិចធ្វើសន្និសីទព័ត៌មាន។
ទាក់ទងនឹងច្បាប់សហជីព លោក ឈាង វុន បាននិយាយថា ភាគីទាំងពីរបានព្រមព្រៀងគ្នាធ្វើសិក្ខាសាលា ដើម្បីទទួលមតិសាធារណជន មតិសហជីព និងមតិសង្គមស៊ីវិលសម្រាប់ច្បាប់នេះ។
«យើងបានយកច្បាប់ សេចក្តីព្រៀងច្បាប់សហជីពយកមកធ្វើជាគោលក្នុងការអនុវត្តរួមគ្នា គឺវប្បធម៌សន្ទនានេះ។ ហើយសូមជម្រាបថា គណបក្សទាំងពីរបានយល់ស្របជាមួយគ្នាអស់ហើយនៅក្នុងសេចក្តីព្រៀងច្បាប់សហជីពនេះ»។
ទោះជាយ៉ាងណាក្តី មន្ត្រីសង្គមស៊ីវិលនិយាយថា ក្នុងការអនុម័តច្បាប់កន្លងមក អនុសាសន៍របស់សង្គមស៊ីវិលភាគច្រើនមិនត្រូវបានសភាពិចារណាសម្រាប់បញ្ចូលក្នុងច្បាប់ ឬសម្រាប់ធ្វើវិសោធនកម្មច្បាប់ទេ។
លោក យ៉ែម បុញ្ញឫទ្ធិ អ្នកនាំពាក្យភាគីគណបក្សសង្គ្រោះជាតិ បានឲ្យដឹងថា បញ្ហាតំណែងអនុប្រធានទីមួយនៃរដ្ឋសភា បញ្ហាតំណែងប្រធានក្រុមតំណាងរាស្ត្រសំឡេងភាគតិចរបស់លោក សម រង្ស៊ី ហើយនឹងបញ្ហាលោក ហុង សុខហួរ សមាជិកព្រឹទ្ធសភាគណបក្ស សម រង្ស៊ី ដែលកំពុងជាប់ឃុំឃាំងទាក់ទងនឹងរឿងព្រំដែននោះ មិនត្រូវបានលើកយកមកពិភាក្សានោះទេ។
លោកនិយាយថា បញ្ហាធំដែលនៅសេសសល់នេះត្រូវទុកឲ្យថ្នាក់ដឹកនាំពិភាក្សាគ្នាទៀត។
«បញ្ហាដែលនៅសេសសល់យើងនឹងជជែកពិភាក្សាគ្នាបន្តទៀត រវាងថ្នាក់ដឹកនាំគណបក្សសង្គ្រោះជាតិ និងថ្នាក់ដឹកនាំគណបក្សប្រជាជនកម្ពុជា ដើម្បីរកដំណោះស្រាយមួយដូចសេចក្តីសម្រេចចំណុចទីបួនដែលយើងប្រើពាក្យថា បង្រួបបង្រួមជាតិ ផ្សះផ្សារជាតិ ដើម្បីដោះស្រាយបញ្ហា»។
លោក ឈាង វុន បន្ថែមថា៖«ការជជែករបស់យើងល្ងាចនេះ យើងអត់មាននិយាយរឿងបុគ្គលណាៗទេ។ ហើយវាមិនមែនជាប្រធានបទដែលយើងត្រូវជជែកគ្នាផង»។
ទោះជាយ៉ាងណាក្តី ជំនួបរវាងថា្នក់ដឹកនាំកំពូលរបស់គណបក្សទាំងពីរគឺលោក សម រង្ស៊ី និងលោកនាយករដ្ឋមន្ត្រី ហ៊ុន សែន មិនទាន់មានពន្លឺថា នឹងត្រូវជួបគ្នានៅពេលណានោះទេ។
ទស្សនកិច្ចរបស់លោក ហ៊ុន សែន ទៅប្រជុំកំពូលពិសេសមេដឹកនាំអាស៊ាននិងអាមេរិក បានប្រឈមនឹងបាតុកម្មប្រឆាំង ដូចកាលពីឆ្នាំមុន ប៉ុន្តែក្រុមអ្នកគាំទ្ររបស់លោកអះអាងថា មិនមានទ្រង់ទ្រាយធំដែលធ្វើឲ្យពួកគេខឹងសម្បាររហូតដល់ធ្វើបាតុកម្មសងសឹកនោះទេ។ អ្នកគាំទ្រលោក ហ៊ុន សែន ក៏បានលុបចោលគម្រោងបាតុកម្មប្រឆាំងនឹងគណបក្សសង្គ្រោះជាតិនៅក្រុងភ្នំពេញផងដែរ។
លោក យ៉ែម បុញ្ញឫទ្ធិ បានប្រាប់អ្នកយកព័ត៌មានថា ភាគីគណបក្សសង្រ្គោះជាតិក៏បានលើកពីកង្វល់របស់គណបក្សនេះទាក់ទងនឹងបាតុកម្មរបស់អ្នកគាំទ្រគណបក្សកាន់អំណាច ដែលកន្លងមកបានធ្វើឲ្យតំណាងរាស្ត្រគណបក្សសង្គ្រោះជាតិពីរនាក់រងរបួសនោះ៕
