នៅថ្ងៃព្រហស្បតិ៍នេះ ប្រធានាធិបតីចិន លោក ស៊ី ជីនពីង (Xi Jinping) បានចាប់ផ្ដើមបំពេញទស្សនកិច្ចផ្លូវរដ្ឋលើកដំបូងរបស់លោកក្នុងនាមជាប្រធានាធិបតី ដោយបានចុះហត្ថលេខាលើកិច្ចព្រមព្រៀងនិងពិធីសារចំនួន៣១ជាមួយកម្ពុជា។
ក្នុងដំណើរទស្សនកិច្ចក្នុងថ្ងៃដំបូងនារសៀលថ្ងៃព្រហស្បតិ៍ លោក ស៊ី ជីនពីង បានជួបពិភាក្សាការងារជាមួយលោកនាយករដ្ឋមន្ត្រី ហ៊ុន សែន នៅឯវិមានសន្តិភាព ហើយថ្នាក់ដឹកនាំប្រទេសទាំងពីរក៏បានធ្វើជាសាក្សីនៅក្នុងពិធីចុះហត្ថលេខាលើកិច្ចព្រមព្រៀង និងពិធីសារផ្សេងៗ។
ក្រោយជំនួបនិងពិធីចុះហត្ថលេខាដែលមានរយៈពេលជាង២ម៉ោង ជំនួយការលោកនាយករដ្ឋមន្ត្រី ហ៊ុន សែន គឺលោក អ៊ាង សុផល្លែត បានថ្លែងប្រាប់ក្រុមអ្នកសារព័ត៌មានថា ភាគីទាំងពីរបានចុះហត្ថលេខាលើកិច្ចព្រមព្រៀង និងពិធីសារចំនួន៣១ តែលោកមិនបានបញ្ជាក់លម្អិតថា កិច្ចព្រមព្រៀងទាំងនោះគ្របដណ្ដប់លើវិស័យអ្វីខ្លះ និងក្នុងទំហំទឹកប្រាក់ប៉ុន្មាននោះទេ។
យ៉ាងនេះក្ដី លោកបានឱ្យដឹងថា ភាគីចិនបានយល់ព្រមជួយកម្ពុជាកសាងហេដ្ឋារចនាសម្ព័ន្ធ និងប្រព័ន្ធធារាសាស្ត្រមួយចំនួន ជួសជុលប្រាង្គប្រាសាទរបស់កម្ពុជា លើកទឹកចិត្តឱ្យក្រុមហ៊ុនចិនមកវិនិយោគកសាងរថភ្លើងល្បឿនលឿន និងអភិវឌ្ឍអាកាសយានដ្ឋាននៅក្នុងខេត្តសៀមរាប។
លោក អ៊ាង សុផល្លែត បានមានប្រសាសន៍ដូចនេះថា៖
«ចំពោះកិច្ចសន្យា ការចុះហត្ថលេខា និងផ្លាស់ប្ដូរពិធីសារទាំង៣១នេះ ខ្ញុំបាទអត់ដឹងទេទំហំទឹកប្រាក់ប៉ុន្មាននោះ ប៉ុន្តែនេះជាប្រវត្តិសាស្ត្រហើយដែលចំនួននៃការចុះកិច្ចសន្យាដែលមានទំហំធំបាទ»។
លោក អ៊ាង សុផល្លែត បានឱ្យដឹងដែរថា ភាគីចិនបានយល់ព្រមលុបបំណុលដែលកម្ពុជាជំពាក់ចិនកាលពីឆ្នាំ២០១៥ ចំនួន៦០០លានយ៉ន់ (៨៩លានដុល្លារ) និងផ្ដល់ជាជំនួយឥតសំណងដល់វិស័យយោធាកម្ពុជាចំនួន១០០លានយ៉ន់ (ជិត១៥លានដុល្លារ) ផងដែរ។
នេះជាដំណើរទស្សនកិច្ចផ្លូវរដ្ឋលើកដំបូងរបស់លោក ស៊ី ជីនពីង មកកាន់ប្រទេសកម្ពុជា ក្នុងនាមជាប្រធានាធិបតីចិន។ ក្នុងថ្ងៃដំបូងនេះ លោកបានចូលគាល់ព្រះមហាក្សត្រខ្មែរព្រះបាទ នរោត្ដម សីហមុនី និងព្រះមាតា នរោត្ដម មុនីនាថ នៅឯព្រះបរមរាជវាំង។ នៅយប់ថ្ងៃព្រហស្បតិ៍ លោក ស៊ី ជីនពីង និងលោក ហ៊ុន សែន ក៏បានចូលរួមពិធីជប់លៀងសាយភោជនជាមួយព្រះមហាក្សត្រខ្មែរនៅឯព្រះបរមរាជវាំងផងដែរ។
បើតាមជំនួយការនាយករដ្ឋមន្ត្រីគឺលោក អ៊ាង សុផល្លែត ភាគីកម្ពុជា និងចិន បានស្នើគ្នាទៅវិញទៅមកពីការបន្តកិច្ចសហប្រតិបត្តិការទ្វេភាគី ហើយភាគីចិនបានសន្យាបន្តជួយកម្ពុជាទៅលើគ្រប់វិស័យ។
ជំនួយការនាយករដ្ឋមន្ត្រីរូបនេះមានប្រសាសន៍ថា៖
«ឯកឧត្ដមស៊ីបានមានប្រសាសន៍ថា កម្ពុជា សម្ដេច ជាមិត្តដែករបស់ចិន។ ចិននឹងជួយកម្ពុជាកសាង នឹងជួយកម្ពុជា។ ការកសាងខ្សែក្រវាត់មួយផ្លូវមួយ ផ្លូវមួយគឺដើម្បីជួយកសាងសង្គមកិច្ច និងសេដ្ឋកិច្ចកម្ពុជា និងជួយជំរុញធ្វើយ៉ាងណាធ្វើឱ្យទំហំពាណិជ្ជកម្មកម្ពុជានិងចិនបានកើនដល់៥ពាន់លានដុល្លារនៅឆ្នាំក្រោយ ឆ្នាំ២០១៧ និងជួយកម្ពុជាលើវិស័យហេដ្ឋារចនាសម្ព័ន្ធ»។
យ៉ាងណាក៏ដោយ ចំពោះទំនាក់ទំនងរវាងកម្ពុជានិងចិននេះ អ្នកវិភាគធ្លាប់បានព្រមានអំពីឥទ្ធិពល របស់ប្រទេសមហាអំណាចកុម្មុយនិស្តមួយនេះ មកលើនយោបាយក៏ដូចជាទំនាកទំនងរបស់កម្ពុជាជាមួយប្រទេសក្នុងអាស៊ាន។
លោក អ៊ូ វីរៈ ប្រធានវេទិកាអនាគតដែលជាមជ្ឈមណ្ឌលស្រាវជ្រាវគោលនយោបាយក្នុងស្រុកបានប្រាប់ VOA កាលពីកន្លងទៅថា ការកើនឡើងនៃចំណងទំនាក់ទំនងជាមួយចិនបាននាំឱ្យកម្ពុជាកាត់បន្ថយការពឹងផ្អែកជំនួយពីប្រទេសលោកខាងលិច ហើយងាកទៅពឹងផ្អែកលើជំនួយពីចិនច្រើនជាងដែលជំនួយទាំងនោះមិនមានកំណត់លក្ខខណ្ឌពីការគោរពសិទ្ធិមនុស្ស និងគោលការណ៍ប្រជាធិបតេយ្យ។
អ្នកវិភាគរូបនេះពន្យល់ថា៖
«ការពឹងផ្អែកលើប្រទេសចិនភាគច្រើននេះ គឺធ្វើឱ្យសេដ្ឋកិច្ចរបស់យើងនេះអត់ឯករាជ្យពីចិនទេ។ ហើយពេលណាដែលសេដ្ឋកិច្ចអត់ឯករាជ្យ នយោបាយក៏អត់អាចឯករាជ្យបានដែរ ហើយខ្ញុំមើលទៅ ដោយសារអ៊ីចឹងហើយ រឿងប្រជាធិបតេយ្យនៅក្នុងប្រទេសកម្ពុជានឹងប្រឈមកាន់តែខ្លាំងទៅអនាគត។ ១០ឆ្នាំខាងមុខនេះ ខ្ញុំមើលទៅប្រជាធិបតេយ្យនៅក្នុងប្រទេសកម្ពុជានឹងកាន់តែប្រឈមកាន់តែខ្លាំងជាងមុនបាទ»។
លោក ស៊ី ជីនពីង បានធ្វើដំណើរមកដល់ប្រទេសកម្ពុជានៅម៉ោងប្រមាណជាង១២ថ្ងៃត្រង់ថ្ងៃព្រហស្បតិ៍ ជាមួយនឹងការរឹតបន្តឹងសន្តិសុខជាខ្លាំង។ អ្នកសារព័ត៌មានចិនហាក់មានអាទិភាពជាងអ្នកសារព័ត៌មាននៅក្នុងស្រុកក្នុងការផ្ដិតយករូបភាពនៃដំណើរទស្សនកិច្ចនេះ។ ការនេះបានធ្វើឱ្យមានការមិនពេញចិត្ត និងការខឹងសម្បារពីក្រុមអ្នកសារព័ត៌មានកម្ពុជា។
តាមគម្រោង លោក ស៊ី ជីនពីង នឹងចាកចេញពីប្រទេសកម្ពុជានៅព្រឹកថ្ងៃសុក្រម៉ោងប្រមាណ៨និង៣០នាទីព្រឹកដោយលោកនឹងបន្តដំណើរទស្សនកិច្ចទៅកាន់ប្រទេសបង់ក្លាដេស និងប្រទេសឥណ្ឌា៕
