ជាមួយកិច្ចចរចាបរមាណូជុំថ្មីមួយទៀតនឹងចាប់ផ្តើមធ្វើក្នុងសប្តាហ៍នេះរវាងរដ្ឋាភិបាលក្រុង Washington និងរដ្ឋាភិបាលក្រុង Tehran អ្នកការទូតកំពូលស.រ.អា.បាននិយាយថា ឧបសគ្គរារាំងមិនឲ្យមានកិច្ចព្រមព្រៀងមួយជាឧបសគ្គខាងនយោបាយដោយភាគច្រើន ហើយមិនមែនជាឧបសគ្គខាងបច្ចេកទេសទេ។
លោករដ្ឋមន្ត្រីការបរទេសស.រ.អា. John Kerry បានមានប្រសាសន៍កាលពីថ្ងៃអាទិត្យនៅក្នុងកម្មវិធី Face the Nation នៃបណ្តាញទូរទេស្សន៍អាមេរិកាំង CBSថា «ជាការច្បាស់លាស់មានការខ្វែងគំនិតគ្នាខ្លះដែលនៅតែផ្អែកលើការថ្លឹងថ្លែងខាងបច្ចេកទេស»។ក៏ប៉ុន្តែបើគិតឲ្យសព្វគ្រប់ទៅ ការខ្វែងគំនិតភាគច្រើនបំផុតនៅពេលនេះជាសេចក្តីសម្រេចចិត្តខាងនយោបាយ ដើម្បីបំពេញតាមការសន្យាក្នុងការបង្ហាញដល់ពិភពលោកថាកម្មវិធីបរមាណូរបស់ប្រទេស អ៊ីរ៉ង់ មានលក្ខណៈសន្តិវិធី»។
លោក Kerry នឹងជួបនៅក្នុងប្រទេស Suisse ជាមួយសមភាគី Iran របស់លោកគឺលោក Mohammed Javad Zarif នៅក្នុងកិច្ចចរចាជុំលើកក្រោយអំពីអនាគតនៃកម្មវិធីបរមាណូរបស់ប្រទេសអ៊ីរ៉ង់។
នៅពេលជាមួយគ្នានេះ លោក Mitch McConnell មេដឹកនាំពួកសាធារណរដ្ឋនៅក្នុងព្រឹទ្ធសភាស.រ.អា.បានចេញផ្សាយសេចក្តីថ្លែងការណ៍មួយប្រឆាំងនឹងកិច្ចចរចានេះ ដោយលោកបាននិយាយប្រាប់បណ្តាញទូរទស្សន៍អាមេរិកាំង CNN ថាលោកប្រធានាធិបតីបារ៉ាក់អូបាម៉ាបានទៅដល់ចំណុចសំខាន់មួយក្នុងការធ្វើឲ្យមាន «កិច្ចព្រមព្រៀងអាក្រក់ខ្លាំងណាស់» មួយជាមួយរដ្ឋាភិបាលក្រុង Tehran៕
