ប្រមុខការទូតកម្ពុជា និងឥណ្ឌូណេស៊ី បានពិភាក្សាគ្នាឡើងវិញនៅថ្ងៃច័ន្ទនេះអំពីលទ្ធភាពនៃការដាក់ពង្រាយកងទ័ពសង្កេតការឥណ្ឌូណេស៊ី នៅតំបន់ព្រំដែន ដែលមានជម្លោះនៅក្បែតំបន់ប្រាសាទព្រះវិហាររបស់ខ្មែរ។
ការពិភាក្សាធ្វើឡើងស្របពេលដែលដំណើរការស្ដីពីដំណោះស្រាយបញ្ហាព្រំដែនមានការរីកចម្រើនតិចតួច។
លោក ហោ ណាំហុង ឧបនាយករដ្ឋមន្ដ្រី និងជារដ្ឋមន្រ្តីការបរទេសកម្ពុជា បានថ្លែងក្នុងសន្និសីទកាសែត ក្រោយពីជំនួបក្នុងទីក្រុងភ្នំពេញជាមួយសមភាគីឥណ្ឌូណេស៊ី របស់លោក គឺលោក ម៉ាទី ណាតាឡេហ្គាវ៉ា ថាលោក និងលោក ម៉ាទី បានពិភាក្សាគ្នាលើការជំរុញការដាក់ពង្រាយកងទ័ពសង្កេតការឯករាជ្យនៅតំបន់ជម្លោះ។ ក៏ប៉ុន្ដែពុំទាន់មានការកំណត់អ្វីជាក់លាក់នោះទេ ដោយរង់ចាំក្រុមការងាររួមនៃគណៈកម្មការទូទៅព្រំដែនរបស់ប្រទេសកម្ពុជា ថៃ ជួបប្រជុំគ្នាជាមុនសិន។
«បញ្ហាដែលយើងខ្ញុំបានពិភាក្សាគ្នាគឺបញ្ហាដាក់អ្នកសង្កេតការឥណ្ឌូណេស៊ីនៅតំបន់ឥតកងទ័ពបណ្ដោះអាសន្នដែលកំណត់ដោយតុលាការយុត្តិធម៌អន្ដរជាតិ»។
យោងតាមលោកឧត្តមសេនីយ៍ឯក ឈុំ សុជាតិ អ្នកនាំពាក្យក្រសួងការពារជាតិបានឲ្យដឹងនៅថ្ងៃនេះថា កម្ពុជា ថៃ ទើបតែបានបង្កើតក្រុមការងាររួមនេះកាលពីខែមករា សម្រាប់កម្ពុជា និងកាលពីខែកុម្ភៈ សម្រាប់ភាគីប្រទេសថៃ។ ថៃត្រូវកោះប្រជុំក្រុមការងារនេះ ក៏ប៉ុន្ដែរហូតមកទល់ពេលនេះ មិនទាន់មានការកោះហៅពីប្រទេសថៃនៅឡើយទេ។
កម្ពុជា និងថៃមានជម្លោះជាមួយគ្នានៅតាមព្រំដែនចាប់តាំងពីខែកក្កដា ឆ្នាំ ២០០៨ មកម្លេះ។ មានការប៉ះទង្គិចគ្នាដោយប្រដាប់អាវុធជាច្រើនលើក ហើយបានបណ្ដាលឲ្យមានការស្លាប់និងរបួសនៃពលទាហានទាំងសងខាង។
កាលពីខែកក្កដា ឆ្នាំ២០១១ តុលាការយុត្តិធម៌ក្រុងឡាអេ បានបង្គាប់ក្នុងសាលក្រមរបស់ខ្លួនឲ្យកងទ័ពភាគីជម្លោះដកចេញពីតំបន់ដែលមិនត្រូវមានកងទ័ព ហើយអនុញ្ញាតឲ្យមានការពង្រាយជំនួសវិញនូវកងទ័ពសង្កេតការណ៍របស់ឥណ្ឌូណេស៊ី។
នៅក្នុងសន្និសីទកាសែតដែលមិនផ្ដល់ឱកាសដល់ការចោទសួរនៅថ្ងៃច័ន្ទនេះដែរ លោករដ្ឋមន្ដ្រីការបរទេសឥណ្ឌូណេស៊ី ម៉ាទី ណាតាឡេហ្គាវ៉ា មិនបានផ្ដល់ព័ត៌មានលម្អិតលើបញ្ហាដាក់ពង្រាយក្រុមកងទ័ពសង្កេតការណ៍នោះទេ ដោយលោកគ្រាន់តែបញ្ជាក់ថា ការពិភាក្សាត្រង់ចំណុចនេះ «ប្រកបដោយលក្ខណៈស្ថាបនា»។ លោកក៏បានលើកបញ្ហានេះទៅពិភាក្សាជាមួយរដ្ឋមន្ដ្រីការបរទេសនៃប្រទេសថៃផងដែរ។ លោក ម៉ាទី ណាតាឡេហ្គាវ៉ា បង្ហាញជំហរសុទិដ្ឋិនិយម។
«យើងសង្ឃឹមថា នឹងធ្វើឲ្យការជឿនលឿនទៅមុខបានល្អ ហើយចលនានៃការរីកចម្រើនដែលយើងទទួលបានក្នុងពេលនេះត្រូវបានថែរក្សាការពារ។ ហើយថៃ និងកម្ពុជាអាចដោះស្រាយព្រំដែននេះ ស្របទៅតាមសាលក្រមនៃតុលាការយុត្តិធម៌អន្ដរជាតិ និងស្របទៅតាមបំណងប្រាថ្នារបស់សមាគមអាស៊ាន»។
លោក ហោ ណាំហុង មានប្រសាសន៍ថា លោកជំរុញឲ្យប្រទេសថៃកោះប្រជុំក្រុមការងាររួមឲ្យបានឆាប់ប្រយោជន៍ផ្ដល់លទ្ធភាពដល់ការដាក់ពង្រាយកងទ័ពសង្កេតការណ៍។
លោកឧត្តមសេនីយ៍ឯក ឈុំ សុជាតិ ជឿថា កិច្ចប្រជុំនោះអាចនឹងប្រព្រឹត្តិទៅក្នុងរយៈពេលឆាប់ៗនេះ។
«ឯកឧត្តម ទៀ បាញ់ បានធ្វើលិខិតមួយទៅកាន់ប្រទេសថៃកាលពីថ្ងៃទី ៩ ខែកុម្ភៈ ដើម្បីរំលឹកខាងភាគីថៃដើម្បីចាត់ការប្រជុំឲ្យបានឆាប់រហ័ស។ ដូច្នេះខ្ញុំគិតថា មិនយូរប៉ុន្មានទេ នឹងធ្វើការប្រជុំលើបញ្ហានេះហើយ»។
សូមបញ្ជាក់ថា លោករដ្ឋមន្ដ្រីការបរទេសឥណ្ឌូណេស៊ី ម៉ាទី ណាតាឡេហ្គាវ៉ា ត្រូវបំពេញទស្សនកិច្ចរយៈពេលមួយថ្ងៃនៅកម្ពុជា។ ទាំងរូបលោក ទាំងលោក ហោ ណាំហុង បានបញ្ជាក់ថា ក្នុងជំនួបការពីព្រឹកថ្ងៃច័ន្ទនេះ មានការពិភាក្សាពីឱកាសនៃការវិនិយោគពីឥណ្ឌូណេស៊ីផ្នែកអាកាសចរណ៍ ផ្នែកទូរគមនាគមន៍ និងផ្នែកកសិឧស្សាហកម្ម។ រួមទាំងការពិភាក្សាពីគម្រោងនៃកិច្ចប្រជុំកំពូលអាស៊ាននៅកម្ពុជាក្នុងខែមេសាខាងមុខ៕
