ការបោះឆ្នោតព្រឹទ្ធសភា នីតិកាលទី៥ បានបិទបញ្ចប់នៅវេលាម៉ោង៣រសៀល ថ្ងៃអាទិត្យ ទី២៥ខែកុម្ភៈនេះ ដោយគណបក្សប្រជាជនកម្ពុជារំពឹងថានឹងឈ្នះអាសនៈលើសលប់ក្នុងចំណោមអាសនៈប្រកួតប្រជែងចំនួន៥៨។ លោក ហ៊ុន សែន អតីតនាយករដ្ឋមន្រ្តីកម្ពុជា និងជាតំណាងរាស្រ្តមួយរូបដែលជាអង្គបោះឆ្នោតនាថ្ងៃអាទិត្យនេះ នឹងឡើងកាន់តំណែងជាប្រធានស្ថាប័នព្រឹទ្ធសភានាពេលខាងមុខ។
អង្គបោះឆ្នោតនៃការបោះឆ្នោតជ្រើសតាំងសមាជិកព្រឹទ្ធសភានេះ ជាសមាជិកក្រុមប្រឹក្សាឃុំសង្កាត់ដែលជាប់ឆ្នោតមានប្រមាណ១២០០០នាក់ និងតំណាងរាស្រ្ត១២៥រូប ដែលភាគច្រើនមកពីគណបក្សប្រជាជនកម្ពុជា។
លោក ជា សារ៉េត អាយុ៤៩ឆ្នាំ ចៅសង្កាត់ស្ទឹងមានជ័យទី១ ខណ្ឌមានជ័យ រាជធានីភ្នំពេញមកពីគណបក្សប្រជាជនកម្ពុជា លើកឡើងថាការបោះឆ្នោតព្រឹទ្ធសភាអាណត្តិទី៥នេះ មានភាពល្អប្រសើរ ដោយសារវាជាការបោះឆ្នោតដោយសម្ងាត់ មិនមានការគំរាមកំហែង ឬគាបសង្កត់អ្វីឡើយ។
លោកថ្លែងថា៖ «ពាក់ព័ន្ធនឹងនីតិកាលទី៥ នៃព្រឹទ្ធសភានេះគឺខ្ញុំមានគោលបំណងមួយគឺថាចង់ធ្វើយ៉ាងណារួមគ្នា ទាំងព្រឹទ្ធសភាក្ដី ទាំងរដ្ឋសភាក្ដី ប្រជាពលរដ្ឋទាំងអស់ សំខាន់គោលដៅដែល គឺខ្ញុំចង់បាន សន្ដិភាពឱ្យបានគង់វង្សជាអមតៈទីមួយ។ ទីពីរខ្ញុំចង់ឱ្យមានការអភិវឌ្ឍឱ្យបានល្អថែមទៅមុខទៀតឱ្យប្រទេសយើងកាន់តែរីកចម្រើនទៅមុខទៀត»។
សមាជិកក្រុមប្រឹក្សាសង្កាត់ស្ទឹងមានជ័យទី១ មានចំនួន១១រូបដែល៨រូបមកពីគណបក្សប្រជាជនកម្ពុជា និង៣រូបទៀតមកពីគណបក្សភ្លើងទៀន។ នេះបើតាមលោក ជា សារ៉េត។
ការបោះឆ្នោតព្រឹទ្ធសភាអាណត្តិនេះមានការចូលរួមពីគណបក្សជំទាស់ គឺគណបក្សឆន្ទៈខ្មែរ តំណាងឱ្យគណបក្សភ្លើងទៀនដែលប្រកួតប្រជែងជាមួយគណបក្សកាន់អំណាច។
លោក ហង្ស វណ្ណនី អាយុ៦៦ឆ្នាំ ចៅសង្កាត់រងទី២នៃសង្កាត់ព្រែកព្នៅ ខណ្ឌព្រែកព្នៅ រាជធានីភ្នំពេញ មកពីគណបក្សភ្លើងទៀន ថ្លែងថាលោកចង់បានតំណាងមួយរបស់គណបក្សជំទាស់នៅក្នុងថ្នាក់ជាតិ។
លោកបញ្ជាក់ថា៖ «...បើមាន អាចមាន[គណបក្សជំទាស់] យើងអាចងាយស្រួលសហការគ្នា ដើម្បីក្នុងជួរគណបក្សនីមួយៗមានមេដឹកនាំជួយផ្ដល់មតិ ក៏ដូចជាផ្ដល់ការងារដល់ក្រុមប្រឹក្សាដែលជាប់ឆ្នោត»។
បើតាម លោក ហង្ស វណ្ណនី សង្កាត់ព្រែកព្នៅ មានសមាជិកក្រុមប្រឹក្សាចំនួន១១រូបដែល៩រូបមកពីគណបក្សប្រជាជនកម្ពុជា និង២រូបមកពីគណបក្សភ្លើងទៀន។
អង្គបោះឆ្នោតមួយចំនួនប្រាប់វីអូអេថាពួកគេចង់ឃើញសមាជិកព្រឹទ្ធសភាជាប់ឆ្នោតហ៊ានលើកយកបញ្ហាប្រឈមរបស់ប្រជាពលរដ្ឋមកដោះស្រាយ។
លោក រស់ ជៀប អាយុ៧៣ឆ្នាំ ជាជំទប់ទី២នៃឃុំកំពង់ស្វាយ ស្រុកកៀនស្វាយ ខេត្តកណ្តាល មកពីគណបក្សភ្លើងទៀនដែលបានមកបោះឆ្នោតនាព្រឹកថ្ងៃអាទិត្យនេះ ប្រាប់អ្នកសារព័ត៌មានវីអូអេថាតាមរយៈការបោះឆ្នោតអសកលមួយនេះ លោកចង់ឃើញសមាជិកព្រឹទ្ធសភាដែលជាប់ឆ្នោតយកចិត្តទុកដាក់លើកស្ទួយជីវភាពរបស់ប្រជាពលរដ្ឋ។
លោកថ្លែងថា៖ «អ៊ីចឹងបានខ្ញុំមើលឃើញថាប្រទេសប្រកាន់ប្រជាធិបតេយ្យ សេរីពហុបក្ស គឺការកសាងប្រទេស អភិវឌ្ឍប្រទេសមានការជឿនលឿន។ ខ្ញុំឃើញគេអភិវឌ្ឍជឿនលឿនណាស់ អ៊ីចឹងបានខ្ញុំចង់បានភាពជឿនលឿនហ្នឹង ដើម្បីប្រទេសជឿនលឿនផង ដើម្បីជីវភាពប្រជាពលរដ្ឋ[និង]លើកស្ទួយជីវភាពរបស់ប្រជាពលរដ្ឋផង ដោយសារការដឹកនាំរបស់រដ្ឋាភិបាល»។
អង្គបោះឆ្នោតម្នាក់ទៀតដែលជាក្រុមប្រឹក្សាឃុំបន្ទាយដែក ស្រុកកៀនស្វាយ ខេត្ត កណ្តាល មកពីគណបក្សភ្លើងទៀន លោក ស៊ឹម មឿន ចង់ឃើញសមាជិកព្រឹទ្ធសភាយកបញ្ហាពលរដ្ឋទៅជជែកដោះស្រាយក្នុងព្រឹទ្ធសភា និងរដ្ឋសភា។
លោកប្រាប់អ្នកសារព័ត៌មានថា៖ «រាល់ការខ្វះខាត ការលំបាករបស់ប្រជាពលរដ្ឋ គាត់នឹងហ៊ានជជែកនៅក្នុងព្រឹទ្ធសភា នៅក្នុងរដ្ឋសភាអីបាន»។
ចំណែកអ្នកស្រី វ៉ា ប៉ិច ក្រុមប្រឹក្សាឃុំសំបួរមាស ស្រុកមុខកំពូល ខេត្តកណ្តាល ដែលមកបោះឆ្នោតនៅភូមិភាគ៣ ក្នុងខេត្តកណ្តាល បានសរសើរចំពោះការអភិវឌ្ឍ និងការយកចិត្តទុកដាក់របស់គណបក្សប្រជាជនកម្ពុជា ដែលអ្នកស្រីផ្តល់ក្តីរំពឹងថាគណបក្សប្រជាជនកម្ពុជានឹងទទួលបានអាសនៈព្រឹទ្ធសភាច្រើនលើសលប់បន្តទៀត។
អ្នកស្រីថ្លែងថា៖ «ខ្ញុំឃើញថាគណបក្សប្រជាជនកម្ពុជា គាត់អភិវឌ្ឍបានច្រើន អ៊ីចឹងធ្វើឱ្យប្រជាពលរដ្ឋ គាត់សប្បាយចិត្តជាច្រើនទាំងខ្ញុំ ទាំងគេ»។
ការបោះឆ្នោតព្រឹទ្ធសភានេះធ្វើឡើង៦ឆ្នាំម្តងសម្រាប់មួយអាណត្តិ។ កាលពី៦ឆ្នាំមុន ការបោះឆ្នោតជ្រើសតាំងសមាជិកព្រឹទ្ធសភានេះមិនមានវត្តមានគណបក្សជំទាស់ឡើយ ដោយសារការរំលាយគណបក្សសង្រ្គោះជាតិ ហើយអង្គបោះឆ្នោតដែលជាប់ឆ្នោតរបស់អតីតគណបក្សសង្រ្គោះជាតិត្រូវបានបែងចែកឱ្យគណបក្សកាន់អំណាច។
គណបក្សនយោបាយចំនួន៤ បានចូលរួមប្រកួតប្រជែងការបោះឆ្នោតនាថ្ងៃអាទិត្យនេះ រួមមានគណបក្សប្រជាជនកម្ពុជា គណបក្សឆន្ទៈខ្មែរ គណបក្សហ្វ៊ុនស៊ិនប៉ិច និងគណបក្សកម្លាំងជាតិ។ គណបក្សប្រជាជនកម្ពុជា ត្រូវបានមើលឃើញថានឹងឈ្នះអាសនៈភាគច្រើន បើទោះមានគណបក្សជំទាស់មួយចំនួនចូលរួមប្រកួតប្រជែងក៏ដោយ។
នៅក្នុងការបោះឆ្នោតនេះ គណបក្សឆន្ទៈខ្មែរ រំពឹងថានឹងទទួលបានអាសនៈព្រឹទ្ធសភាចំនួន៩ ទៅតាមចំនួនក្រុមប្រឹក្សាដែលខ្លួនមានជាង២០០០នាក់។
ខេត្តកណ្តាល គឺជាភូមិភាគ៣ដែលមានអង្គបោះឆ្នោតសរុប៩២៦នាក់ ដែលភាគច្រើនមកពីគណបក្សប្រជាជនកម្ពុជា។ ចំពោះលទ្ធផលបឋមដែលមន្ត្រីរៀបចំការបោះឆ្នោតរាប់នៅក្នុងការិយាល័យចំនួន២នោះ គឺគណបក្សប្រជាជនកម្ពុជាទទួលបានសំឡេងគាំទ្រជាង៧៧០សំឡេង គណបក្សឆន្ទៈខ្មែរទទួលបាន១៣០សំឡេង គណបក្សហ៊្វុនស៊ិនប៉ិចទទួលបាន៤សំឡេង និងគណបក្សកម្លាំងជាតិទទួលបាន១២សំឡេង។ នេះបើតាមការរាប់សន្លឹកឆ្នោតជាក់ស្តែងនៅក្នុងភូមិភាគ៣នោះ។
អគ្គលេខាធិការគណបក្សភ្លើងទៀន លោក លី សុធារ៉ាយុត្តិ ប្រាប់វីអូអេក្រោយការបោះឆ្នោតថាក្នុងខេត្តកណ្តាលនេះ គណបក្សឆន្ទៈខ្មែរដែលជាគណបក្សសម្ព័ន្ធភាពរបស់គណបក្សភ្លើងទៀនមិនទទួលអាសនៈ ដូចការរំពឹងទុកនោះទេ ដោយសារអង្គបោះឆ្នោតមួយចំនួនមិនបានបោះឆ្នោតគាំទ្រដល់គណបក្សឆន្ទៈខ្មែរ។
លោកប្រាប់វីអូអេតាមប្រព័ន្ធតេឡេក្រាមថា៖ «អង្គបោះឆ្នោតមានចំនួន១៨៧រូប តាមលទ្ធផលមកយើងបានទទួលតែ១៣០សំឡេង។ ដូច្នេះយើងអាចមិនបានទទួលអាសនៈ នេះគឺជាលទ្ធផលបឋមតែប៉ុណ្ណោះ»។
លោក ហ៊ុន សែន ប្រធានគណបក្សប្រជាជនកម្ពុជា ដែលជាអង្គបោះឆ្នោតមួយរូបក្នុងនាមជាតំណាងរាស្រ្តមណ្ឌលខេត្តកណ្តាល ក៏បានមកបោះឆ្នោតនៅក្នុងភូមិភាគ៣ នាព្រឹកថ្ងៃអាទិត្យនេះដែរ។
នៅមុនពេលចុះចេញពីតំណែងជានាយករដ្ឋមន្រ្តី លោក ហ៊ុន សែន ធ្លាប់បានប្រកាសថាលោកនឹងក្លាយជាប្រធានព្រឹទ្ធសភា បន្ទាប់ពីការបោះឆ្នោតជ្រើសរើសសមាជិកព្រឹទ្ធសភា ដែលគណបក្សរបស់លោករំពឹងថានឹងឈ្នះអាសនៈច្រើនលើសលប់។
បើតាមគណៈកម្មាធិការជាតិរៀបចំការបោះឆ្នោត ហៅកាត់ថាគ.ជ.ប លទ្ធផលផ្លូវការណ៍នឹងត្រូវប្រកាសនៅថ្ងៃទី២ ខែមេសា ក្រោយដោះស្រាយពាក្យបណ្តឹងរួចរាល់៕
វេទិកាបញ្ចេញមតិ