អ្នកជំនាញជនជាតិអាមេរិកបានហៅប្រទេសកម្ពុជាក្រោមរបបកម្ពុជាប្រជាធិបតេយ្យរបស់ពួកខ្មែរក្រហមថា ជាសង្គមមួយបិទជិតដោយមិនមានទំនាក់ទំនងទៅមជ្ឈដ្ឋានខាងក្រៅនោះទេ។
លោកស្រី អេលីហ្ស៊ាបែត បេកឃើ (Elizabeth Becker) អតីតអ្នកយកព័ត៌មានអំពីសង្គ្រាមនៅកម្ពុជា និងជាអ្នកកាសែតម្នាក់ដែលត្រូវពួកខ្មែរក្រហមអញ្ជើញឲ្យធ្វើទស្សនកិច្ចនៅចុងឆ្នាំ១៩៧៨ បាននិយាយនៅក្នុងការកាត់ទោសសំណុំរឿង០០២វគ្គទី២នៅថ្ងៃច័ន្ទនេះថា ក្នុងរបបខ្មែរក្រហមគ្មានអ្វីទាំងអស់។
«គ្មានអ្នកកាសែតនៅក្នុងសម័យកម្ពុជាប្រជាធិបតេយ្យនោះទេ គឺជាសង្គមមួយបិទជិត គ្មានការប្រាស្រ័យទាក់ទងគ្នា គ្មានទូរស័ព្ទ គ្មានសារទូរលេខ គ្មានអ្វីទាំងអស់ គឺជាប្រទេសដែលឯកោដោយខ្លួនឯង»។
លោកស្រីបេកឃើបានមកដល់ប្រទេសកម្ពុជានៅខែធ្នូ ឆ្នាំ១៩៧៨ជាមួយជនបរទេសចំនួនពីរនាក់ផ្សេងទៀត។ ប៉ុន្តែជនបរទេសម្នាក់ក្នុងចំណោមនោះគឺលោក James Alexander Malcolm Caldwell ត្រូវបាញ់សម្លាប់ដោយពួកខ្មែរក្រហមនៅក្នុងបន្ទប់ស្នាក់នៅជិតបន្ទប់របស់លោកស្រី។
លោកស្រីអេលីហ្សាបែត បេកឃើ អតីតអ្នកឆ្លើយឆ្លងព័ត៌មានរបស់កាសែតThe Washington Post និងក្រោយមកកាសែត The New York Times បានពិពណ៌នាថា ការស្នាក់នៅនិងការជួបសម្ភាសផ្សេងៗក្នុងដំណើរទស្សនកិច្ចរបស់លោកស្រីត្រូវពួកខ្មែរក្រហមរៀបចំឲ្យទាំងអស់។ ពួកខ្មែរក្រហមហាមមិនឲ្យអ្នកស្រីថតរូប និងបានកាត់ផ្តាច់សំណួរទាំងឡាយណាដែលពាក់ព័ន្ធនឹងបញ្ហាសិទ្ធិមនុស្ស ឬចំណុចគួរចាប់អារម្មណ៍ដទៃទៀត។ មួយវិញទៀតពួកខ្មែរក្រហមមិនអនុញ្ញាតឲ្យអ្នកស្រីដើរហើរដោយខ្លួនឯងនោះទេ ពោលគឺទៅណាត្រូវតែមានរថយន្តជូន។
«យើងមិនអាចផ្លាស់ទីដោយគ្មានអ្នកអមដំណើរយើងទេ។ យើងមិនអាចជ្រើសរើសនូវអ្វីដែលយើងចង់បានទេ។ ខ្ញុំមិនដែលស្ថិតក្នុងដំណើរបែបនេះទេ ក្នុងជីវិតរបស់ខ្ញុំ ដែលការធ្វើដំណើរទៅណាទាំងអស់ត្រូវស្ថិតនៅក្រោមការត្រួតត្រា»។
ពួកខ្មែរក្រហមឡើងកាន់អំណាចនៅថ្ងៃទី១៧ខែមេសាឆ្នាំ១៩៧៥ និងបានបាត់បង់អំណាចទៅវិញនៅខែមករាឆ្នាំ១៩៧៩។ មានប្រជាពលរដ្ឋកម្ពុជាយ៉ាងតិច១,៧លាននាក់បានស្លាប់ និងត្រូវបានសម្លាប់។
មេដឹកនាំកំពូលរបស់ខ្មែរក្រហមគឺនួន ជា អតីតប្រធានសភា និងជាបងធំទី២ និងខៀវ សំផន អតីតប្រមុខរដ្ឋកំពុងស្ថិតក្រោមការកាត់ទោសចំពោះការទទួលខុសត្រូវអំពើឃោរឃៅនេះ។
លោកស្រីអេលីហ្សាបែត បេកឃើត្រូវពួកខ្មែរក្រហមដឹកតាមរថយន្តដើរមើលនៅក្នុងទីក្រុងភ្នំពេញ និងនៅតាមបណ្តាខេត្តមួយចំនួន។ លោកស្រីបានបរិភោគអាហារពេលល្ងាចជាមួយអៀង សារី អតីតរដ្ឋមន្ត្រីក្រសួងការបរទេស ដែលបានស្លាប់មុនការកាត់ទោសចប់ ហើយលោកស្រីបានជួបសម្ភាសជាមួយប៉ុល ពត មេស្ថាបនិកនៃរបបខ្មែរក្រហម។
អៀង សារី បានប្រាប់លោកស្រីថា គ្មានគុកទេនៅក្នុងរបបខ្មែរក្រហម ហើយយុត្តិធម៌ធ្វើឡើងនៅតាមសហករ៕
