ការវាយប្រហារអត្តឃាតដោយបំផ្ទុះគ្រាប់បែកក្នុងរថយន្តពីរផ្សេងគ្នានៅរដ្ឋធានីប្រទេសអ៊ីរ៉ាក់បានសម្លាប់មនុស្សយ៉ាងតិច ២២នាក់ នៅព្រឹកថ្ងៃព្រហស្បតិ៍នេះបើយោងតាមប៉ូលិស។
ការបំផ្ទុះគ្រាប់បែកមួយ បានតម្រង់គោលដៅទៅរកផ្លូវដែលពោរពេញដោយហាងលក់ដូរ ស្ថិតនៅប៉ែកខាងកើតរដ្ឋធានីបាកដាដបានសម្លាប់ជនស៊ីវិលយ៉ាងតិច១៥នាក់ និងធ្វើឲ្យរបួស៣៥នាក់ទៀត។
ការផ្ទុះមួយទៀត ប៉ះចំឡានក្រុងមួយគ្រឿងនៅក្បែរបន្ទាយយោធាដ៏ធំជាងគេមួយរបស់ប្រទេសនេះ ដែលស្ថិតនៅប៉ែកខាងជើងរដ្ឋធានីបាកដាដ ដោយសម្លាប់មនុស្សយ៉ាងតិចអស់១២នាក់ និងរបួស២៨នាក់ទៀត។
ក្រុមរដ្ឋឥស្លាមបានអះអាងទទួលខុសត្រូវចំពោះការវាយប្រហារស្ទើរតែទាំងអស់នៅក្នុងរដ្ឋធានីបាកដាដក្នុងពេលប៉ុន្មានខែថ្មីៗនេះ។ ប៉ុន្តែមិនទាន់មានការបញ្ជាក់អះអាងទទួលខុសត្រូវចំពោះការបំផ្ទុះគ្រាប់បែកនៅថ្ងៃព្រហស្បតិ៍នេះនៅឡើយទេ។
អ្នកនាំពាក្យយោធាម្នាក់ក្នុង ទីក្រុងបាកដាដបានថ្លែងកាលពីថ្ងៃពុធថា ការវាយប្រហារនៅក្នុងរដ្ឋធានីនៃប្រទេសអ៊ីរ៉ាក់នេះ មិនបានថមថយដូចមនុស្សជាច្រើនបានរំពឹងទុកនោះទេ ទោះបីជាមានការវាយលុករបស់យោធាអ៊ីរ៉ាក់ប្រឆាំងនឹងក្រុមសកម្មប្រយុទ្ធរដ្ឋឥស្លាមនៅក្រុង Fallujah ក៏ដោយ៕
