Hello VOA៖ ការសិក្សានៅបរទេសនាំមកនូវការអភិវឌ្ឍខ្លួនដល់កម្រិតថ្មីមួយ
បើទោះបីជាការសិក្សានៅបរទេសមានកិច្ចការងារថ្មីៗនិងលំបាកៗដែលមិនធ្លាប់បានឆ្លងកាត់ពីមុនក៏ដោយក្តី ប៉ុន្តែអ្វីដែលយើងទទួលបានមកវិញគឺលើសពីការរំពឹងទុក ដោយសារតែនាំមកវិញនូវការអភិវឌ្ឍខ្លួនឯងទៅដល់កម្រិតថ្មីមួយទៀត នេះបើយោងតាមកញ្ញា ស៊ូ រ៉ូហ្សានិច និស្សិតអាហារូបករណ៍ Cheveningដែលទើបបញ្ចប់ការសិក្សាថ្នាក់អនុបណ្ឌិតផ្នែកគ្រប់គ្រងទីផ្សារអន្តរជាតិនៅឯសកលវិទ្យាល័យ Leeds ក្នុងចក្រភពអង់គ្លេស។ កញ្ញា រ៉ូហ្សានិចបានចូលរួមជាវាគ្មិនក្នុងកម្មវិធី Hello VOA សំឡេងជំនាន់ថ្មី សម្រាប់ខែ មករា ឆ្នាំ២០១៨ នៅក្នុងបន្ទប់ផ្សាយរបស់វីអូអេក្នុងរាជធានីភ្នំពេញ ពិភាក្សាក្រោមប្រធានបទ «ឱកាសនិងបញ្ហាប្រឈមនៃការសិក្សានៅបរទេស»។ កញ្ញាក៏បានផ្តល់ជាការណែនាំដើម្បីជាប់អាហារូបករណ៍យើងត្រូវដឹងពី មុខវិជ្ជា សកលវិទ្យាល័យ ឬប្រទេសដែលយើងចង់ទៅបន្តការសិក្សា ហើយត្រូវមានលក្ខណៈសម្បត្តិគ្រប់គ្រាន់ដែលអាចបំពេញតម្រូវការអាហារូបករណ៍នោះ ដូចជា មានសញ្ញាប័ត្របរិញ្ញាប័ត្រ បទពិសោធន៍ការងារ សមត្ថភាពភាសាអង់គ្លេស និងលិខិតណែនាំ (Recommendation letters) ពីសាស្ត្រាចារ្យឬនិយោជករបស់យើងជាដើម៕ (កញ្ញា ស្រេង លក្ខិណា, សំឡេងជំនាន់ថ្មី, វ៉ាស៊ីនតោន/ភ្នំពេញ, ១៥ មករា ២០១៨)
